申命記 第 10 章 - 台語漢字羅馬本

1

「彼時，耶和華給我講：『你著拍二塊石碑，親像前的款，上山來我遮，閣著做一個柴的櫃。

2

你前所拍折許個碑，彼頂面的話我欲寫佇諸個碑的頂面；你著下佇櫃內。』

3

我就用皂莢柴做一個櫃，閣拍二塊石碑，親像前的款，我親手提此二塊碑上山。

4

耶和華將伊佇大會的日、佇山頂對火中給你講的十誡，照前所寫的款，寫佇許個碑裡，耶和華就將許個交代我。

5

我越轉身落山，將許個碑下佇我所做的櫃，照耶和華的命令，到今猶佇遐。」（

6

以色列人對比羅比尼亞干起身，到摩西拉。亞倫死佇遐，就埋葬佇遐。伊的子以利亞撒續接伊擔當祭司的職。

7

對遐起身，到谷歌大，閣對谷歌大到約巴他，就是有溪水的地。

8

彼時，耶和華分別利未支派，扛耶和華的約櫃，徛佇耶和華的面前來服事伊，奉伊的名來祝福，到今仔日。

9

所以利未佇伊的兄弟中無份無業，耶和華是伊的產業，照耶和華──你的上帝所對伊講的。）

10

「我閣親像頭擺踮佇山頂四十日四十暝。彼擺耶和華也聽我，耶和華呣甘滅你。

11

耶和華給我講：『你起來做頭行佇百姓的面前，互入去承接我所對的列祖咒誓欲互的地。』」

12

「以色列啊，今耶和華──你的上帝愛你甚麼啊？豈呣是獨獨愛你敬畏耶和華──你的上帝，行伊一切的道路，疼伊，盡心盡性服事耶和華──你的上帝，

13

守耶和華諸個誡命及伊的律例，就是我今仔日所命令你的，為著欲互你得著福氣嗎？

14

看啊，天及諸個天的天，地及地上所有的，攏屬耶和華──你的上帝。

15

耶和華獨獨歡喜你的列祖，疼，揀的後裔佇萬百姓中，就是恁諸個，親像今仔日就是。

16

所以恁著給恁的心行割禮，呣通硬恁的頷頸。

17

因為耶和華──恁的上帝──伊是諸個上帝的上帝，諸個主的主，伊是至大的上帝，有能力閣通驚畏的，無用外貌取人，也無受賄賂。

18

伊為著孤兒及寡婦判斷，閣疼出外人，互伊食穿。

19

所以恁著疼出外人，因為恁也曾出外佇埃及地。

20

你著敬畏耶和華──你的上帝，服事伊，結聯伊，指伊的名來咒誓。

21

伊是你所謳咾的，是你的上帝，為著你做彼個大閣通驚的事，是你親目所看見的。

22

你的列祖七十人落埃及；今耶和華──你的上帝互你親像天頂的星許呢多。」