申命記 第 15 章 - 台語漢字羅馬本

1
「逐擺到七年的路尾,你著行解放。
2
解放的例就是按呢:凡若債主借厝邊的著解放;呣通對你的厝邊及兄弟追討,因為耶和華的解放已經宣佈啦。
3
若是外國人,你通給伊追討所欠的;獨獨你的物佇你的兄弟的,你的手著解放伊。
4
(見申15:4)。
5
你若留心聽耶和華──你上帝的話,執守來行我今仔日所命令你這一切的誡命,就欲佇恁中間無喪鄉人(因為佇耶和華──你的上帝所賞賜你做業的地,耶和華欲大大賜福你。)
6
因為耶和華──你的上帝欲照伊所應允賜福你。你欲借互多多國,也你呣免借;你欲管轄多多國,也管轄你。
7
「佇耶和華──你的上帝所賞賜你的地,若佇你一個城門內,你的兄弟中有一個喪鄉人及你佇,就呣通對你喪鄉的兄弟硬你的心、勼你的手。
8
的確著對伊開你的手,照伊所欠用的借伊,補伊的無夠。
9
你著家己謹慎,驚了你心內有歹念頭,講:『第七年解放的年近啦』,你就眥你喪鄉的兄弟,攏呣互伊,致到伊為著你求叫耶和華,你就有罪。
10
你的確著互伊,互伊的時心內呣通煩惱;因為對此個事耶和華──你的上帝欲佇你一切所行的,及你的手所做的,賜福你。
11
因為佇彼所在喪鄉人永斷;所以我命令你講:『佇你的境內的確著對你的兄弟喪鄉的欠缺的來開你的手。』」
12
「你的兄弟中,若有一個希伯來的查甫人抑是希伯來的查某人賣互你,服事你六年,到第七年就解放伊去自由。
13
你解放伊去自由的時,呣通互伊空手去,
14
著對你的羊群、五穀場、酒窟中多多互伊;照耶和華──你上帝所賜福你的,來互伊。
15
著記得你佇埃及地做奴才,耶和華──你的上帝救贖你;因為按呢,我今仔日命令你此個事。
16
伊若對你講:『我無欲離開你』,因為伊疼你及你的家眷,閣因為踮你遐徛真好,
17
你著用鑽仔對門裡貫伊的耳仔,伊就永永做你的奴僕。你款待你的女婢也是按呢。
18
你解放伊去自由的時,呣通掠做剋虧,因為伊服事你六年,比倩工的重倍值。耶和華──你的上帝欲佇你所做一切的事賜福你。」
19
「見若牛群羊群頭水生的,公的,你著分別做聖,歸互耶和華──你的上帝。牛群頭水生的,呣通做工;羊群頭水生的,呣通剪伊的毛。
20
你及你的家眷,逐年著食伊佇耶和華──你上帝的面前,就是佇耶和華所欲揀的所在。
21
若有破相的、或是跛腳、或是睛暝,無論有甚麼歹的破相,攏呣通做祭獻互耶和華──你的上帝;
22
通佇你的門內食伊;無清氣及清氣的人攏通,親像食羚羊及鹿一樣;
23
獨獨呣通食伊的血;著傾佇地裡,親像傾水一樣。」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!