申命記 第 17 章 - 台語漢字羅馬本

1
「見有破相,抑是有甚麼歹樣的牛羊,你呣通祭獻耶和華──你的上帝,因為這是耶和華──你的上帝所厭惡的。
2
「佇恁中間,佇耶和華──你上帝所賞賜你許個城的中間,若抵著有人,或是男或是女,行耶和華──你上帝所看做歹的,違背伊的約,
3
去服事別個上帝來敬拜伊,或是日、或是月,抑是天頂的萬象,是我所未曾命令的;
4
若有人給你講,你也已經聽見,就著詳細探聽,看啊!果然有影,實在有此個可惡的事行佇以色列中,
5
你著將行此個歹代的查甫人抑是婦仁人拖到城門外,用石頭擲彼個查甫人抑是婦仁人互伊死。
6
著憑二個干證抑是三個干證的嘴,應該死者著互伊死;若憑一人的嘴做干證就呣通互伊死。
7
干證者著做頭下手擲伊,然後眾百姓也下手互伊死。按呢,就對恁中間除去彼個歹。
8
「你城門內若有冤家的事,或是因為流血,或是因為相告,或是因為相拍,是你所曉得斷的,你就著起來,去耶和華──你上帝所欲揀的所在。
9
見祭司利未人,及當時的審判官,來問,欲將判詞指示你。
10
佇耶和華所欲揀的所在指示你的判詞,你著照按呢行,見所教示你的著執守來行伊。
11
著照所欲教示你法度的宗旨,也著照所給你講的判斷來行;所指示你的判詞,你呣通偏左偏右。
12
若有人自專行呣聽祭司,就是佇遐徛來服事耶和華──你的上帝的,抑是呣聽審判官,就著互彼人死;按呢,你就對以色列中除去彼個歹。
13
百姓欲攏聽見來驚,無閣自專行。」
14
「你到耶和華──你上帝所賞賜你的地,得著彼所在來徛起的時,若講:『我欲設立王做我的頭,親像我四圍的列國一樣。』
15
你的確著設立耶和華──你上帝所揀的人做王,做你的頭。對你的兄弟中設立一人做王,做你的頭;外國人呣是你的兄弟的,你呣通設立做你的頭。
16
總是王呣通為著家己加添多多隻馬,也呣通為著欲加添卡多隻馬,互百姓倒去埃及,因為耶和華曾命令恁講:『恁莫閣對彼條路倒去。』
17
伊也呣通為家己娶多多后妃,驚了伊的心悖謬;伊也呣通為本身積聚多多金銀。
18
伊坐伊的國位的時,著用一本冊抄寫此個律法,著對彼本存佇祭司利未人的面前的來抄伊,
19
彼本著下佇伊遐,一世人著讀伊,通學習敬畏耶和華──伊的上帝,著執守此個律法一切的話及諸個律例來行伊,
20
免得伊自高來看輕兄弟,閣免得伊偏左偏右,來離開此個誡命。通互伊及伊的子孫佇以色列中,國位久長。」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!