申命記 第 24 章 - 台語漢字羅馬本

1

「人若娶某，然後看伊的某呣中意，因為伊知伊有無合宜的事，就通寫離書互伊，交伊的手差伊離開伊的家。

2

婦仁人離開伊的家了後，通去嫁別人。

3

若是後的丈夫怨恨伊，也寫離書交伊的手，教伊離開伊的家，抑是伊後的丈夫娶伊做某就死，

4

就彼個前的丈夫已經教伊去的，得通佇伊拍垃墋以後閣娶伊做某，因為這是耶和華所厭惡的；呣通互耶和華--你的上帝所賞賜你做業的地來罪。」

5

「新娶某的人呣通去交戰，也呣通交代伊辦理甚麼事，通互伊佇家內清閒一年，通互伊所娶的某歡喜。

6

「呣通用人的石磨抑是石磨的頂礅做準當，因為這是用人的生命做準當。

7

「若抵著人拐以色列中一個兄弟，款待伊做奴才，抑是賣伊，彼個拐棍就著互伊死。按呢，就對恁中間除去彼個歹。

8

「癩的歹症頭，你著真細膩，祭司利未人一切所教示恁的著照按呢來行。我所命令的，恁著執守來行。

9

早出埃及的時，耶和華──你上帝佇路裡對米利暗所行的，你著記得。

10

「你無論用甚麼借厝邊，呣通入伊的家提準當。

11

你著徛佇外面，聽候給你借的人提準當出來互你。

12

彼人若是喪鄉，你呣通留伊的準當過暝。

13

日落的時，的確著用彼個準當還伊，互伊用伊的衫蓋睏，伊就給你祝福；這佇耶和華──你上帝的面前欲算做你的義。

14

「困苦喪鄉的倩工人，無論是你的兄弟抑是出外人踮佇你的地，佇你的城門內的，你呣通欺負伊。

15

伊的工錢你彼日著互伊，呣通聽候到日落了──因為伊喪鄉，掛心佇彼個──驚了伊因為你來對耶和華喉叫，你就有罪。

16

「呣通因為子來互老父死，也呣通因為老父來互子死；逐人著為著家己的罪來死。

17

「你審判呣通冤枉出外人及無父的子，也呣通提寡婦的衣裳做準當。

18

你著記得你佇埃及曾做奴才。耶和華──你的上帝救贖你對遐出，所以我命令你著按呢行。

19

「你佇田裡收割五穀，若記得一束佇田裡，呣通閣越去提，著留互出外人及孤兒寡婦。致到耶和華──你的上帝欲佇你的手所做一切的事賜福你。

20

你拍你的橄欖樹以後，呣通閣巡許個樹枝；著留互出外人及孤兒寡婦。

21

你挽你的葡萄，所剩的，呣通閣挽；著留互出外人及孤兒寡婦。

22

你也著記得你佇埃及地曾做奴才，所以我命令你著按呢行。