申命記 第 25 章 - 台語漢字羅馬本

1
「人若有冤家來對訊,官府判斷伊就著定義人做義,定歹人做歹。
2
歹人若應該受拍,審判官著互伊仆佇地裡,佇伊的面前照伊的罪,照數額拍伊。
3
獨獨通拍伊四十下,呣通過數額;若過數額,拍伊卡多下就你的兄弟互你看輕。
4
「牛碖五穀,呣通籠伊的嘴。」
5
「兄弟相及徛起,其中若一個死,無子,死人的某呣通嫁外人,伊丈夫的小弟著入去伊遐,娶伊做某,來盡小叔的本份。
6
伊所生的大子,著續接死的兄的名份,免得伊的名佇以色列中消滅。
7
彼人若呣願意娶伊的兄嫂,伊的兄嫂就著到城門的長老遐,講:『我的丈夫的小弟呣肯佇以色列中給伊的兄傳一個名字,無欲給我盡小叔的本份。』
8
伊城內的長老就著叫伊來給伊講,伊若執意講:『我無欲娶伊』,
9
伊的兄嫂就著佇長老的面前就近伊,褪彼人腳裡的鞋,呸涎佇伊的面,講:『見若無欲為著兄建立伊的家的著按呢款待伊。』
10
佇以色列中,伊的名欲稱做褪鞋者的家。」
11
「若有二人相拍,其中一人的某近倚來,欲救伊的丈夫脫離拍伊的人的手,伸手擒住彼人的下體,
12
就著斬斷婦仁人的手,目睭呣通可憐伊。
13
「你的袋仔內呣通有二樣的秤子,有粒大有粒細。
14
厝內呣通有二樣的升斗,有的大有的細。
15
著用準準公平的秤子,準準公平的升、斗。通互你佇耶和華──你上帝所賞賜的地食長歲壽。
16
因為見若行諸個代誌及行不義的,攏是耶和華──你上帝所厭惡的。」
17
「你著記得恁出埃及的時,亞瑪力人佇路裡所款待你的。
18
伊佇路裡抵著你,當你困苦厭倦的時,有怎樣拍你後隊就是佇你後面的軟弱的,伊也無驚畏上帝。
19
所以到耶和華──你上帝救你脫離四圍攏總的對敵,佇耶和華──你上帝賞賜你做業的地得著平安。彼時,你著將亞瑪力的名字對天下擦消,呣通記得。」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!