申命記 第 27 章 - 台語漢字羅馬本

1
摩西及以色列諸個長老命令百姓講:「恁著守我今仔日所命令恁一切的誡命。
2
恁過約但,到耶和華──你上帝所賞賜你的地,彼日著 幾塊大石,用灰抹伊,
3
你已經過去,著寫此個律法一切的話佇彼頂面,通互你入去耶和華──你的上帝所賞賜你的地,就是流奶及蜜的地,照耶和華──你列祖的上帝所應允你的。
4
恁已經過約但,就著佇以巴路山徛我今仔日所命令恁許個石,用灰抹伊。
5
佇遐著為耶和華──你的上帝起一座壇;就是石的壇佇彼頂面呣通動著鐵器。
6
著用無過拍的石起耶和華──你上帝的壇,
7
佇彼頂面著獻燒祭互耶和華──你的上帝。閣著獻謝恩祭,也佇遐食,佇耶和華──你上帝的面前歡喜。
8
你著將此個律法一切的話寫明佇許個石裡。」
9
摩西及祭司利未人吩咐以色列眾人講:「以色列啊,著靜靜來聽。今仔日你成做耶和華──你上帝的百姓。
10
所以著聽趁耶和華──你上帝的話,行伊的誡命律例,就是我今仔日所命令你的。」
11
當彼日,摩西命令百姓講:
12
「恁過約但了後,西緬、利未、猶大、以薩迦、約瑟、便雅憫諸個支派著徛佇基利心山來祝福百姓。
13
流便、迦得、亞設、西布倫、但、拿弗他利諸個支派著徛佇以巴路山來宣佈咒詛。
14
利未人著大聲對以色列眾人講:
15
「『見若人製造偶像,刻的,抑是鑄的,耶和華所厭惡的,就是師傅的手所做的,祀佇暗靜的所在,彼人著受咒詛!』百姓攏著應講:『阿們!』
16
「『看輕老父抑是老母的,著受咒詛!』百姓攏著講:『阿們!』
17
「『移徙厝邊的界址的,著受咒詛!』百姓攏著講:『阿們!』
18
「『互睛暝人行呣著路的,著受咒詛!』百姓攏著講:『阿們!』
19
「『審判來冤枉出外人及孤兒寡婦的,著受咒詛!』百姓攏著講:『阿們!』
20
「『及老父的後某同房的,著受咒詛!因為伊有掀開伊的老父的衫仔裾。』百姓攏著講:『阿們!』
21
「『無論及甚麼獸交合的,著受咒詛!』百姓攏著講:『阿們!』
22
「『人及像父的姊妹,抑是像母的姊妹同房,彼人著受咒詛!』百姓攏著講:『阿們!』
23
「『及丈姆同房的,著受咒詛!』百姓攏著講:『阿們!』
24
「『暗靜拍死厝邊的,著受咒詛!』百姓攏著講:『阿們!』
25
「『受賄賂來害死無罪的人的,著受咒詛!』百姓攏著講:『阿們!』
26
「『無堅守諸個律法的話來行的,著受咒詛!』百姓攏著講:『阿們!』」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!