申命記 第 33 章 - 台語漢字羅馬本

1

上帝的奴僕摩西佇伊猶未死的代先給以色列人祝福，所祝福的話記佇下底：

2

伊講：耶和華對西奈來，為著對西珥起來，對巴蘭的山照出光，對萬萬聖者遐來，對伊的正手為著發出烈火的律法。

3

伊不止疼痛許個百姓；伊許個聖者攏佇你的手。坐佇你的腳下，聽受你許個話。

4

摩西用律法傳互咱，做雅各會眾的產業。

5

百姓的首領，以色列的眾支派，相及聚會的時，伊佇耶書崙做王。

6

願流便活，無死；願伊的人額無少。

7

伊給猶大祝福按呢講：求耶和華聽猶大的聲，導伊到伊的百姓遐；伊曾用伊的手為家己交戰，你欲幫助伊抵當伊的對敵。

8

論利未講：你的土明及你的烏陵及你聖潔的人相及佇。你佇瑪撒曾試伊，佇米利巴的水曾及伊相爭。

9

伊論到伊的老父伊的老母就講：我呣曾看見伊；也無承認伊的兄弟，也無承認伊的子兒。因為行你的話，守你的約。

10

欲用你的法度教示雅各，用你的律法教示以色列。欲用香下佇你的面前，及全牲隻的燒祭佇你的壇頂。

11

願耶和華賜福伊的產業，接納伊的手所做的工。許個起來攻擊伊及怨恨伊的人，願你拍折的腰，互閣起來，

12

論便雅憫就講：耶和華所疼的欲及伊安然徛起；耶和華通日保護伊，伊也欲踮佇伊的肩頭中。

13

論約瑟就講：願伊的地得著耶和華賜福，得著天頂的寶物、及露水，以及地下所囥的水源；

14

得著日頭所生的寶物，月所出的寶物；

15

得著古早的山的至寶，及永世代的山嶺的寶物；

16

得著地的寶物及其中所充滿的，以及踮佇莿帕內者的恩惠。願許個攏歸佇約瑟的頭殼，歸佇彼個及伊的兄弟分開者的頭殼頂。

17

親像牛的頭上生的，榮光屬佇伊；伊的角是野牛的角，用來觸萬百姓，到佇地極。這是以法蓮的萬萬，瑪拿西的千千。

18

論西布倫就講：西布倫啊，你出外通歡喜。以薩迦啊，佇你的布棚內通快樂。

19

欲召諸個百姓到山裡，佇遐欲獻公義的祭；因為欲吸收海裡的豐盛，及山裡所囥的寶貝。

20

論迦得就講：開闊迦得的得著謳咾！伊匿親像母的獅；伊拆裂手骨及頭殼。

21

伊為家己備辦代先得著的業，因為佇遐有設律法者的分額留。伊及百姓的首領相及來；行耶和華的公義及以色列相及行伊的判斷。

22

論但就講：但是細隻獅，對巴珊跳出。

23

論拿弗他利就講：拿弗他利啊，得著恩惠充足，也得著耶和華的賜福滿滿的，欲得著西勢及南勢做業。

24

論亞設就講：願亞設因為子多來得著福氣，得著的兄弟的歡喜，通用伊的腳搵佇油裡。

25

你的門楗是鐵的，銅的。你的日子怎樣，你的氣力也欲按呢。

26

耶書崙啊，無有親像上帝的。伊坐天來幫助你，也坐穹蒼，顯明伊的榮光。

27

永活的上帝做你徛起的所在；永遠的手佇你的下面。伊佇你的面前趕對敵，閣講：毀滅伊。

28

以色列安然徛起；雅各的後裔家己住佇五穀及酒的地。伊的天也滴落露水。

29

以色列啊，你有福氣！是誰親像你此個互耶和華所拯救的百姓啊？伊是你的盾牌，保護你，是你榮耀的刀劍。你的對敵欲投降你；你欲踏佇高的所在。