申命記 第 34 章 - 台語漢字羅馬本

1

摩西對摩押平洋上尼波山，上彼個及耶利哥相對的毗斯迦山頭。耶和華互伊看基列全地直到但，

2

拿弗他利全地，以法蓮、瑪拿西的地，猶大全地到西海，

3

南方及叫做棗樹城的耶利哥山谷的平洋，到瑣珥。

4

耶和華對伊講：「此個地就是我對亞伯拉罕、以撒、雅各咒誓，講：『我欲賞賜你的後裔的。』今我互你親目看見，總是你得著過去到遐。」

5

耶和華的奴僕摩西就死佇遐，佇摩押的地，照耶和華所講的。

6

耶和華埋葬伊佇摩押地、伯毗珥相對的山谷，到今仔日無人知伊的墓。

7

摩西死的時一百二十歲；目睭無花，精力無衰退。

8

以色列人佇摩押平洋為著摩西哀哭三十日，為著摩西憂悶哀哭的日滿啦。

9

嫩的子約書亞得著智慧的神充滿；因為摩西曾按手佇伊的頂面，以色列人就聽趁伊，照耶和華所命令摩西的來行。

10

後來以色列中無閣興起先知親像摩西。伊是耶和華面對面所識的。

11

照耶和華差伊佇埃及地對法老及伊攏總的人臣，以及伊的全地所行逐樣的神蹟奇事，

12

也照大權能的手，大通驚的事，就是摩西所行佇以色列眾人的目睭前的。