傳道書 第 2 章 - 台語漢字羅馬本

1
我心內講:「來啊,我用歡喜試你,你通享受安樂!」看啊,這也是空虛。
2
論好笑我就講:「這是癲狂。」論歡喜就講:「這欲啥事?」
3
我的心講究,著怎樣用酒互我的肉體快活,總是我的心猶原著互智慧引導;也著怎樣擒住愚戇,聽候我看明世間人,佇天下一生著行甚麼事是好。
4
我為著家己興起大的工程,為家己起厝,為家己栽葡萄園,
5
為家己修造花園果子園,佇彼內面栽種逐號的果子樹;
6
為家己開水池,來灌沃培養發生樹的樹林。
7
我也買奴僕女婢,亦有出世佇我家內的;亦有多多牛群羊群,贏過我以前佇耶路撒冷許個人所有的。
8
我閣為家己積聚金銀及列王,以及逐省的財寶;閣得著唱歌的男女及世間人所歡喜的物,多多宮妃。
9
按呢,我就做大,贏過我以前攏總佇耶路撒冷的人。我的智慧猶原及我佇。
10
我的目睭所愛的,我無阻擋伊;我的心所歡喜的,我無禁止伊;因為我的心為著我所著磨的來快樂,這就是我對一切所著磨來得著的份額。
11
我看我的手所做一切的工以及我所著磨的勞碌。看啊,這攏是空虛,攏是掠風;佇日光的下面攏無利益。
12
我家己越轉來看智慧、癲狂,及愚戇。佇君王後輩的人猶會做甚麼啊?就是前所做的若定。
13
我就看出智慧贏過愚戇,親像光明贏過黑暗。
14
智慧的人的目睭光明,愚戇的人行佇黑暗。總是我知的結局攏相同。
15
我就心內講:「戇人所抵著,我也欲按呢抵著,我乜使比卡智慧啊?」我心內講,這也是空虛。
16
智慧的人及戇的人,平平無得著人永遠的記念,因為到將來的日攏互人紀得;嗐啊!智慧的人死,及愚戇的人無各樣。
17
所以我怨身慼命;因為佇日光的下面所做的工攏是互我勞苦,因為這攏是空虛,攏是掠風。
18
我怨恨我一切的勞碌,就是我佇日光的下面所勞碌的,因為欲留互我以後的人。
19
彼個人是智慧抑是愚戇,是誰會知?猶久我佇日光的下面用智慧勞碌所做成的,伊欲管轄伊。這也是空虛。
20
因為按呢,我倒轉想為著我佇日光的下面所著磨的勞碌,互我的心失望。
21
因為有人用智慧、用知識、用本事來勞碌的,總是欲留互未曾勞碌佇彼個工的人做業。這也是空虛,也是大陷害。
22
因為人佇日光的下面所勞力勞心的,有得著甚麼啊?
23
因為伊一生憂慮,伊的勞碌成做苦痛,連暝時心也無安息。這也是空虛。
24
人呣值著來食來飲,閣互心享福佇伊所著磨的,我看此個也是出佇上帝的手。
25
論到食、抑是享福,是誰會贏過我啊?
26
因為上帝所歡喜的人伊就互伊有智慧、知識、快樂;獨獨有罪的人,伊互伊勞苦,來收拾、來積聚通歸佇上帝所歡喜的人。這也是空虛,也是掠風。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!