傳道書 第 5 章 - 台語漢字羅馬本

1
你到上帝的厝,著謹慎你的腳步;因為近前來聽,贏過戇人獻祭,因為呣知所行的是歹。
2
你佇上帝的面前呣通隨便講話,也呣通心著急來講;因為上帝佇天裡,你佇地裡,所以你的言語著少。
3
因為代誌多,才有眠夢;言語多,才有戇人的聲。
4
你對上帝下願,謝伊呣通延延,因為伊無歡喜愚戇的人,你所下的願應該著謝。
5
你下願無謝,寧可無下。
6
呣通互你的嘴致到肉體犯罪,也呣通佇使者的面前講是錯誤下願。啥事互上帝因為你的聲受氣,來敗壞你的手所做的啊?
7
因為眠夢多多,言語多多,內中有空虛,獨獨著敬畏上帝。
8
你若佇省內看見喪鄉人受壓迫,抑是用強權搶公義公平的事,莫得因為按呢來卬愕;因為有一位卡高佇彼個坐高位的鑑察,佇的頂面猶有比卡高的。
9
閣地裡的利益歸佇眾人,就君王也受著田地的供奉。
10
愛揲銀者,無因為銀來知足;愛富有者,無因為得利來知足。這也是空虛。
11
貨財加添,食伊的人也加添,業主有得著甚麼利益啊?不過目睭看見若定!
12
勞碌的人不管食多食少,真好睏;好額人的豐盛互伊睏得。
13
我看見日光的下面有一件大災禍,就是財主定定守伊的錢,來害家己。
14
因為抵著不測的事,諸個錢財就無去;彼個人若生子,手內也無一項。
15
伊怎樣對老母的胎出來,也欲親像按呢褪裼去;伊所勞碌得著的,手內會帶一毫去。
16
伊來的情形怎樣,伊去也是按呢。這也是一項大災禍。伊為著風來勞碌有甚麼利益啊?
17
閣伊一世人佇黑暗中食,有多多煩惱,閣有病疼及受氣。
18
看啊,我所看做好做美妙的,就是人佇上帝賞賜伊一生的日子來飲食,享受日光的下面勞碌所得著的好,因為這是伊的份額。
19
見若得著上帝互伊有錢財好額,互伊會享受,來取伊的份額,佇伊的著磨來快樂,這是上帝的賞賜。
20
伊無大大想著一生的年日,因為上帝照伊的心所歡喜的應答伊。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!