以斯拉記 第 4 章 - 台語漢字羅馬本

1

猶大、便雅憫的對敵聽見許個受掠倒來的人為以色列的上帝──耶和華起殿，

2

就來見所羅巴伯及族中的老大，給講：「請准阮及恁相及起；因為阮尋恁的上帝，及恁一樣。對亞述王以撒哈頓帶阮上此個地以來，阮常常獻祭互上帝。」

3

總是所羅巴伯、耶書亞，及其餘以色列族中的老大給講：「阮欲起阮的上帝的殿恁無份，阮家己欲為耶和華──以色列的上帝協力起造，是照波斯王古列王所命令阮的。」

4

對按呢彼所在的百姓，互猶大人手軟落去，佇起造的時攪擾；

5

對波斯王古列的年間，到波斯王大利烏坐位的時，倩議士，阻止欲敗壞的計劃。

6

佇亞哈隨魯做王坐位的起頭，對敵寫奏章告猶大及耶路撒冷徛起的百姓。

7

閣佇亞達設西的年間，比施蘭、米特利達、他別，及的黨上表奏波斯王亞達設西。此個表是用亞蘭的文字寫的，翻譯亞蘭的腔口。

8

總督利宏、書記伸帥欲告耶路撒冷人，也上表奏亞達設西王彼個表親像按呢。

9

總督利宏、書記伸帥，及其餘的同伴底拿人、亞法薩提迦人、他毗拉人、亞法撒人、亞基衛人、巴比倫人、書珊迦人、底亥人、以攔人，

10

及大尊貴的亞斯那巴所遷徙其餘的百姓、安置佇撒瑪利亞的城，及大河外其餘的百姓，

11

攏寫，云云。彼個奏亞達設西王表章的抄稿記佇下面：「你的奴僕河外諸個人云云：

12

王著知，對你遐來到阮遮的猶大人，已經到耶路撒冷閣起此個反叛閣歹的城，，已經起城牆，下地基。

13

今王著知，若起此個城，城牆起好就進貢，關稅，錢糧，攏呣納，到尾王欲受損失。

14

因為阮食王宮的鹽，呣應該看王受虧損，所以上表奏王。

15

請查考列祖的記錄，佇記錄會尋著就知此個城是反叛的城，做列王及逐省的害；對早以來，彼中間常常有反叛的事，此個城受毀壞就是對此個緣故。

16

阮謹慎奏王知，此個城若閣起造，城牆起好，對按呢河外的地你就無份。」

17

彼時王就出諭旨互總督利宏、書記伸帥，及其餘的同伴，就是徛起佇撒瑪利亞及河外其餘的人，講：「願恁平安云云。

18

恁所上互阮的表，已經明明讀佇我的面前。

19

我已經出命令，查考了就知此個城對早以來真正背叛列王，其中常常有謀反悖逆的事。

20

從前耶路撒冷歷來有大君王統轄河外全地，進貢，關稅，錢糧攏納互。

21

今恁著發命令互許個人停工，無起此個城，聽候我降旨。

22

恁著謹慎，呣通延延，啥事容允此個害卡重，致到列王受虧損啊？」

23

亞達設西王的上諭讀佇利宏及書記伸帥，及的同伴的面前，就趕緊去耶路撒冷見猶大人，用勢力強迫停工。

24

對按呢，耶路撒冷上帝殿的工程就停止，停到波斯王大利烏坐位的第二年。