創世紀 第 16 章 - 台語漢字羅馬本

1
亞伯蘭的某撒萊無給伊生子。伊有一個女婢,名夏甲,是埃及人。
2
撒萊給亞伯蘭講:「耶和華禁我生子。請你及我的女婢同房,豈採我通對伊得著囝仔。」亞伯蘭聽趁撒萊的話。
3
對彼霎亞伯蘭的某撒萊將伊的女婢埃及人夏甲互伊丈夫亞伯蘭做某;彼時亞伯蘭已經住迦南十年。
4
伊及夏甲同房,夏甲就懷孕;伊知家己有娠,就看輕主母。
5
撒萊給亞伯蘭講:「我的冤枉歸佇你。我將我的女婢下佇你的心懷中,伊看家己有娠,就看輕我。願耶和華佇你我的中間判斷。」
6
亞伯蘭對撒萊講:「你的女婢佇你的手,你通隨意款待伊。」撒萊苦楚伊,伊就對撒萊的面前逃走。
7
耶和華的使者抵著伊佇曠野的水泉邊,彼個水泉佇書珥的路上,
8
對伊講:「撒萊的女婢夏甲,你對叨落來?欲叨落去?」伊講:「我對我的主母撒萊的面前走出來。」
9
耶和華的使者對伊講:「你倒去你的主母遐;降服佇伊的手下。」;
10
耶和華的使者閣對伊講:「我欲互你的後裔極其多,甚至算得。」
11
耶和華的使者閣對伊講:「你今懷孕欲生一個子,著給伊號名以實瑪利,因為耶和華聽見你的苦情。
12
伊做人欲親像野驢。伊的手欲攻擊眾人,眾人的手欲攻擊伊;伊欲徛起佇眾兄弟的頭前。」
13
夏甲就稱彼個對伊講話的耶和華的名講:「你是看見逐項的上帝」。因為講:「連佇遮我亦看見彼個看見我的嗎?」
14
所以此個井名叫庇耳拉海萊。就是加底斯及巴列的中間。
15
後來夏甲給亞伯蘭生一個子;亞伯蘭給伊的子號名叫以實瑪利。
16
就是夏甲所生的。夏甲給亞伯蘭生以實瑪利的時,亞伯蘭八十六歲。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!