哈巴谷書 第 3 章 - 台語漢字羅馬本

1

先知哈巴谷的祈禱，用「詩祈謳樂」調。

2

耶和華啊，我聽見你的消息就驚惶。耶和華啊，求你佇諸個年的中間，閣興起你的所做，佇諸個年的中間顯現；佇受氣的時記得憐憫。

3

上帝對提幔來；聖者對巴蘭山到。（細拉）伊的榮光遮蓋諸個天；伊的名聲充滿地。

4

伊的燦爛親像光；對伊的手有出光線，佇遐伊的能力囥。

5

佇伊的頭前有瘟疫流行；佇伊的後面有熱症發出。

6

伊徛，就量大地，伊觀看，趕散列邦。永遠佇的山裂開；久長的山嶺崩陷；伊的所行對早以來是按呢。

7

我看見古珊的布棚抵著患難，米甸地的帳簾栗栗惙。

8

耶和華啊，你騎你的馬，坐佇你拯救的車，豈是無歡喜諸個江、受氣諸個河、痛恨洋海嗎？

9

你的弓攏露出，對諸個支派所咒誓的攏是真實的話。（細拉）你用江河分開大地。

10

山嶺看見你，就驚惶；大水透風經過，深淵出伊的聲，大湧淐高。

11

因為你的箭射出光，你的槍的光炎炎閃，日及月停止佇伊的位處。

12

你受氣來遍行地上，你大受氣拍列國，親像拍五穀。

13

你出來欲救你的百姓，拯救你的受抹油者，歹人家中的頭目你拍碎伊，露現伊的根基，到盡頭。（細拉）

14

你用伊家己的槍鑿透伊戰士的頭；來親像捲螺風，欲趕散我。所歡喜者是暗靜吞食喪鄉人。

15

你騎馬踏佇海裡，就是踏夯湧的大水。

16

我聽見我的心腸攪絞，為著彼個聲，我的嘴唇喀喀抖，骨骸朽壞；我佇我的所在愕愕惙。我只有恬恬聽候災難的日到，侵犯境內的百姓上來。

17

雖然無花果樹無發樣，葡萄樹無結果子，橄欖樹也無收成，田園無出五穀，朝（tiau）內無半隻羊，朝（tiau）內也無牛；

18

我猶久欲因為耶和華來歡喜，因為救我的上帝來快樂。

19

主耶和華是我的氣力；伊互我的腳親像鹿母，閣互我行佇我高的所在。

20

此個歌交互樂官，用我絲弦的樂器來唱。