希伯來書 第 5 章 - 台語漢字羅馬本

1

因為對人的中間所揀的祭司頭，攏是為著人佇關係上帝的事來設立，通為著罪過獻禮物及祭祀。

2

伊既然互軟茈所圍困，才會體諒呣知影及失迷的人。

3

所以，伊應該因為本身，親像因為百姓為著罪來獻祭。

4

閣此個尊貴，呣是人家己取，只有互上帝召的，親像亞倫一樣。

5

親像按呢，基督亦呣是家己尊做祭司頭，就是彼個對伊講「你就是我的子，我今仔日生恁」者；

6

佇別位亦講：「你永遠做祭司，照麥基洗德的班列。」

7

基督佇伊肉體的日，用出力喉叫，閣流目屎，獻祈禱，懇求互彼個會救伊出死者，閣因為伊的敬虔得著聽見。

8

雖然做子，亦對所受諸個苦難來學順服。

9

已經成做完全，就做凡若順服伊的人永遠拯救的根源，

10

互上帝稱伊做祭司頭，照麥基洗德的班列。

11

論到此個，阮有多多話愛講，呣拘得解明，因為恁耳孔鈍的緣故。

12

因為論到時的久，恁著家己做先生，若是猶欠用人將上帝的話諸個小學的起頭教恁，閣成做欠用奶、無欠用五殼。

13

凡若食奶的無老練義的道理，因為伊是嬰仔；

14

獨獨長成的人食五穀；的心竅對練習來練達，到會分別好歹。