雅各書 第 4 章 - 台語漢字羅馬本

1

恁中間諸個爭戰對叨落來，諸個相爭對叨落來？豈呣是對恁的宴樂，交戰佇恁百體中的來嗎？

2

恁貪戀，也無所有；恁人、怨妒，也得著。恁相爭爭戰，恁無所有，因為恁無求。

3

恁求也無得著，因為濫糝求，是欲開用伊佇恁的宴樂。

4

恁諸個淫婦啊，豈呣知及世間做朋友是及上帝做對敵嗎？所以見若愛做世間的朋友的，就是做上帝的對敵。

5

抑是恁拍算聖經是空空講嗎？伊所賞賜咱的神，豈戀慕到佇怨妒嗎？

6

若是伊賞賜卡大的恩，所以講：上帝抵敵驕傲者，賞賜恩互謙卑者。

7

所以，恁著順服上帝。也著抵敵魔鬼，伊就走閃恁。

8

親近上帝，伊就親近恁。恁犯罪者，著洗恁的手！二樣心的人，著清氣恁的心！

9

著憂苦、哀傷、啼哭，恁的笑著換做哀傷，恁的歡喜著換做憂悶。

10

著家己謙卑佇主的面前，伊就欲高升恁。

11

兄弟啊，莫得相誹謗。誹謗兄弟，抑是批評伊的兄弟的，就是誹謗律法，批評律法。你若批評律法，就呣是行律法的，就是做批評的。

12

立法的、批評的，只有一個，伊會救也會滅。你是甚麼人，批評厝邊啊？

13

今，恁講：「今仔日抑是明仔日，阮欲去某個城，住佇遐一年久，做生理趁錢。」

14

若是明仔日的事，恁猶呣知。恁的活命是怎樣？恁是雲霧暫時出現，後來就無看見。

15

恁卡好著按呢講：「主若願，阮就會活，也欲做此項、彼項。」

16

今恁用諸個品嗙的事誇口；凡若此號的誇口攏是歹。

17

所以知有好著行，也呣行的，就是伊的罪。