耶利米書 第 27 章 - 台語漢字羅馬本

1

猶大王約西亞的子約雅敬起頭坐位的時，有一個話對耶和華臨到耶利米講：

2

「耶和華對我按呢講：你為家己做索及軛，下佇你的頷頸，

3

託仗來耶路撒冷見猶大王西底家許個使者的手，互帶許個物到以東王、摩押王、亞捫族的王、推羅王、西頓王遐，

4

閣命令使者，對的主講，萬軍的耶和華──以色列的上帝按呢講：恁著對恁的主按呢講，

5

我用我的大權能及我伸出的手，創造地及地上的人，以及精牲。將伊賞賜我所看做合宜的。

6

今我將諸個地攏交互我的奴僕巴比倫王尼布甲尼撒的手，我亦將田野的走獸互伊，做伊的差用。

7

列國攏欲服事伊以及伊的子，伊的孫，直到伊本國抵著報應的日到。彼時，多多國及大君王欲用伊做奴僕。

8

「若有甚麼百姓，甚麼國，呣肯服事此個巴比倫王尼布甲尼撒，亦呣肯將頷頸掛巴比倫王的軛者，我欲用刀劍、用飢荒、用瘟疫刑罰彼個百姓，直到我借伊的手來一盡滅。這是耶和華講的。

9

總是恁，恁呣通聽恁的先知、恁的卜卦的、恁的圓夢的、恁的行邪術的，恁的師公；給恁講：『恁致到服事巴比倫王。』

10

對恁讖語白賊，欲互恁遷徙，離開本所在遠遠，致到我趕恁出，互恁滅無。

11

獨獨若有甚麼百姓肯將頷頸掛巴比倫王的軛來服事伊的，我欲互伊猶原住佇本所在，通種作，通徛起。這是耶和華講的。」

12

我就照諸個一切的話對猶大王西底家講：「著將恁的頷頸掛巴比倫王的軛，來服事伊及伊的百姓，才會得著活。

13

你及你的百姓啥事欲因為刀劍、因為飢荒、因為瘟疫來死，照耶和華論起呣肯服事巴比倫王彼號國的話啊？

14

許個先知給恁講：『恁致到服事巴比倫王』，莫得聽，因為對恁所宣傳的是白賊。

15

耶和華講：『我無差，總是託我的名宣傳白賊，致到我將恁及許個對恁宣傳的先知攏趕出，相及滅無。』」

16

我閣對諸個祭司及此國的眾百姓講：「耶和華按呢講：恁呣通聽許個先知對恁所讖語的。講：『看啊，耶和華的厝的器具無偌久欲對巴比倫帶倒來』；其實對恁所宣傳的，是白賊。

17

莫得聽，著服事巴比倫王來得著活。乜使互此個城變做拋荒？

18

若果然是先知，有耶和華的話到佇，就著求萬軍的耶和華，互許個佇耶和華的厝及猶大的王宮，及耶路撒冷剩的器具，無搬去巴比倫。（

19

因為萬軍的耶和華按呢講，論到諸個銅柱、銅海、盆座，及留佇此個城所剩的器具，

20

就是巴比倫王尼布甲尼撒掠猶大王約雅敬的子耶歌尼雅，及猶大、耶路撒冷諸個尊貴的人對耶路撒冷到巴比倫的時所無搶去的。）

21

實在萬軍的耶和華──以色列的上帝按呢講：論到留佇耶和華的厝及猶大王宮，及耶路撒冷的器具，

22

許個欲搬到巴比倫留佇遐，到我眷顧的日。就我欲帶上來，閣歸此個所在。這是耶和華講的。」