耶利米書 第 43 章 - 台語漢字羅馬本

1

耶利米對眾百姓講明白耶和華──的上帝一切的話，就是耶和華──的上帝差伊所講一切的話。

2

何沙雅的子亞撒利雅及加利亞的子約哈難，及一切驕傲的人，就對耶利米講：「你講無影話！耶和華──咱的上帝並無差你來講：『恁呣通去埃及，來寄腳佇遐。』

3

這是尼利亞的子巴錄教唆你害阮，欲將阮交佇迦勒底人的手，互死阮，抑是掠阮到巴比倫。」

4

對按呢加利亞的子約哈難及一切軍長，及眾百姓，呣聽趁耶和華的話來踮佇猶大地。

5

加利亞的子約哈難及一切的軍長就將剩的猶大人，就是對受趕去許個國倒來欲寄腳佇猶大地者，

6

不論查甫人、婦仁人、囝仔、及王許個查某子，及侍衛長尼布撒拉旦所留來交代沙番的孫亞希甘的子基大利的眾人，及先知耶利米，以及尼利亞的子巴錄，攏帶去埃及地，到答比匿。

7

這是因為呣聽趁耶和華的話。

8

佇答比匿，耶和華的話臨到耶利米講：

9

「你著用手提幾塊大粒石，佇猶大人的面前，囥佇疊磚的灰土內，就是佇答比匿法老的王宮門遐，

10

給講：『萬軍的耶和華──以色列的上帝按呢講：看啊，我欲召我的奴僕巴比倫王尼布甲尼撒來。佇所囥的石頭頂我欲安置伊的寶座；伊欲佇彼石頂搭娞的布棚。

11

伊欲來攻擊埃及地，應該死的就死；應該掠的就受掠；應該互刀的，就互刀。

12

我也欲起火佇埃及許個神明的廟，伊欲燒伊，掠去；伊欲得著埃及地，親像牧者穿伊的衫，對遐安然出去。

13

伊的確拍碎埃及地伯示麥雕刻的柱，用火燒埃及諸個神明的廟。』」