約伯記 第 10 章 - 台語漢字羅馬本

1
我的心呣愛活,我欲大膽講出我的哀怨;我心內的苦痛,我才欲講,
2
我欲對上帝講:莫得定我有罪,著指示我,你為甚麼因端及我爭辯?
3
你行壓制,閣看輕你的手所造的,閣用光照歹人的計謀。你豈掠諸個做好嗎?
4
你的目睭豈是肉的?抑是你看親像人看嗎?
5
你的日子豈親像人的日子,抑是你的年親像人的年嗎?
6
你即究勘我的罪孽,查察我的罪過?
7
你是呣知我無罪,也無一個會救我脫離你的手嗎?
8
你的手有創造我,雕琢我的四肢百體,你猶久毀滅我。
9
求你紀念──你曾製造我親像摶土一般,你欲互我閣歸佇土粉嗎?
10
你豈呣是傾出我親像奶,互我結歸團親像奶餅嗎?
11
你用皮及肉互我穿,閣用骨及筋互我連絡。
12
你用活命及慈愛互我;你的眷顧保全我的生命。
13
諸個事你攏囥佇你的心;我知你本有此個意思。
14
我若犯罪,你就注意我,也無欲掠我做無罪。
15
我若行歹,就有災禍;我若做義,也呣敢抬起頭,滿心見誚,親目看見我的艱苦。
16
我若頭抬高,你就欲掠我親像獅,閣顯出你的奇異佇我。
17
你閣設你的干證攻擊我,加添你的受氣佇我,軍兵一隊過一隊攻擊我;
18
你啥事互我出胎?呣值著彼時斷氣,無互人的目睭看見我;
19
按呢,我就有那親像無,一下出胎就送入墓。
20
我的日子豈呣是真少嗎?求你請停,放寬我,
21
互我佇去無倒轉──就是去黑暗及死蔭的地的代先──通略仔得著安慰。
22
彼個地暗暗親像黑墨,是死蔭混沌;伊的光親像黑墨。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!