約伯記 第 27 章 - 台語漢字羅馬本

1
約伯閣續接提起伊的言論講:
2
上帝奪我的理由,全能者苦楚我的心神。我指伊的永活來講:
3
因為我的活命猶久完全佇我的內面;上帝的氣猶久佇我的鼻孔。
4
我的嘴唇決斷無講不義;我的舌也無講詭詐。
5
我斷斷無稱恁做義;我到死也呣算我做無完全!
6
我執守我的義,無欲放拺;我的心一世人無責備我。
7
願我的對敵親像歹人;願彼個起來攻擊我的,親像不義的人。
8
無敬虔的人雖然搶著財利,上帝取伊的活命的時猶有甚麼向望?
9
患難臨到伊的時,上帝豈欲聽伊的求叫?
10
伊豈會用全能者做歡喜,伊時常求叫上帝嗎?
11
上帝所做的,我欲教示你;全能者所有者,我也無隱瞞。
12
看啊,恁本身攏有看見,啥事一盡虛假啊?
13
歹人對上帝所受的份額,強暴的人對全能者所得著的產業就是此個;
14
伊的子兒若加添多多,是欲互刀死;伊的後裔無通食夠額。
15
伊所剩的人欲抵著瘟疫來埋葬;也伊的寡婦無啼哭。
16
伊雖然積聚銀親像塵埃,閣備辦衣裳親像土;
17
伊做伊備辦,總是義人欲穿伊;無罪的人欲分伊的銀。
18
伊親像蛀蟲起厝,閣親像守更的搭伊的寮仔。
19
伊好額倒,總是無得著收埋,伊展開目睭就無去。
20
驚惶欲親像大水著伊;暝時的大風欲掃伊去。
21
東風吹伊,伊就去,閣趕伊離開本所在。
22
因為上帝射著伊,也無寬恕;伊苦通脫離伊的手。
23
人欲對伊拍噗仔,也欲出口號,趕伊離開本所在。

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!