約書亞記 第 4 章 - 台語漢字羅馬本

1

百姓已經一盡過約但，耶和華就吩咐約書亞講：

2

「著對百姓中揀十二人，每支派一人，

3

命令講：『恁對遐，對約但河中、祭司的腳定定徛的所在，取十二塊石，帶伊及恁過去，下佇恁今暝欲歇的所在。』」

4

約書亞就照伊對以色列人中所備辦的彼十二人，每支派一人，攏叫來。

5

約書亞就給講：「恁過去佇耶和華──恁上帝約櫃的頭前，到約但河中，照以色列人支派的數額，逐人取一塊石頭夯佇肩頭裡。

6

通用此個佇恁中間做證據。日後，恁的子孫問恁講：『諸個石頭對佇恁甚麼意思？』

7

恁就對講：『是因為前約但的水佇耶和華的約櫃前截斷；約櫃過約但的時，約但的水截斷。諸個石欲做以色列人永遠的紀念。』」

8

以色列人照約書亞所命令的來行，照以色列人支派的數額，對約但河中取十二塊石，攏照耶和華對約書亞所講的。就續帶過去，到歇睏的所在，就下佇遐。

9

約書亞另外用十二塊石　佇約但河中，佇扛約櫃的祭司腳徛的所在；到今仔日，許個石猶久佇遐。

10

扛約櫃的祭司徛佇約但河中，聽候耶和華命令約書亞對百姓講的事做明白，是照摩西所命令約書亞一切的話。百姓就緊緊過去。

11

眾百姓一盡過去，耶和華的約櫃及祭司就佇百姓的面前過去。

12

流便人、迦得人、瑪拿西半支派的人攏照摩西所對講的，帶軍器佇以色列人的頭前過去。

13

約略有四萬人攏備辦交戰，佇耶和華的面前過去，到耶利哥的平洋，便便欲交戰。

14

當彼日，耶和華互約書亞佇以色列眾人的目睭前做大。佇伊一生的日，百姓敬畏伊，親像早前敬畏摩西一樣。

15

耶和華吩咐約書亞講：

16

「你命令扛法櫃的祭司對約但河上來。」

17

約書亞就命令祭司講：「恁對約但河上來。」

18

扛耶和華約櫃的祭司對約但河上來，祭司的腳掌抵抵跨上乾地的時，約但河的水就流到原位，照舊漲滿雙旁的岸。

19

正月初十日，百姓對約但上來，就安營佇吉甲，佇耶利哥東勢的界。

20

對約但所取彼十二塊石，約書亞就　伊佇吉甲，

21

就對以色列人講：「日後恁的子孫問的老父講：『諸個石甚麼意思？』

22

彼時就著報恁的子知，講：『以色列人曾行乾地過此個約但河；

23

因為耶和華──恁的上帝佇恁的頭前互約但的水乾去，聽候恁過來，親像耶和華──恁上帝前佇紅海所做一樣，就是互伊佇咱的頭前乾去，聽候咱過來，

24

欲互地上萬百姓攏知，耶和華的手有大能力，也欲互恁永遠敬畏耶和華──恁的上帝。』」