士師記 第 19 章 - 台語漢字羅馬本

1

當以色列無王的時，有寄腳佇以法蓮山地彼旁的一個利未人，娶一個猶大伯利恆的查某囝仔做細姨。

2

細姨行淫背伊的丈夫，離開伊倒去猶大伯利恆，到老父的家，住遐四月日。

3

伊的丈夫起來，帶一個奴僕、二隻驢去伊，欲用好話安慰伊導伊倒來。伊就導伊入老父的厝。婦仁人的老父看見，就歡迎伊。

4

伊的丈人，就是查某囝仔的老父，留伊，伊就及伊住三日。就相及飲食，踮佇遐。

5

到第四日，透早起來伊欲起身去，查某囝仔的老父給子婿講：「請你食淡薄餅做點心，後來才通起身行。」

6

二人就坐落去相及飲食。查某囝仔的老父對彼人講：「請你歡喜閣踮一暝，互你的心快樂。」

7

彼人起來欲起身，伊的丈人強強留伊，伊就閣歇一暝。

8

到第五日，伊透早起來欲起身，查某囝仔的老父給伊講：「請你閣點心，聽候到日斜西。」二人就相及食。

9

彼人及伊的細姨及奴僕起來欲起行，伊的丈人，就是查某囝仔的老父，給伊講：「看啊，日欲暗，請你閣歇一暝；日欲落啦，你著歇遮，互你的心快樂。明仔日透早起身倒去恁兜。」

10

彼人呣肯閣歇一暝，就起來起身，到耶布斯的對面（耶布斯就是耶路撒冷。）二隻掛鞍的驢，以及伊的細姨及伊去。

11

行近耶布斯的時，日已經欲落，奴僕給主人講：「來啊，咱呣值著越入耶布斯人此個城歇暝佇遐。」

12

主人講：「咱無欲越入外邦人的城就是無屬以色列人的，卡好咱著過來基比亞」；

13

閣給奴僕講：「來，咱著去諸個所在的一個，來歇佇基比亞，抑是拉瑪。」

14

就進前去。將近便雅憫的基比亞，日已經落；

15

就越入去欲歇佇基比亞，就入去坐佇城內的街路，因為無人接納入厝歇暝。

16

日暗，有一個老人對田裡做工倒來。伊本是以法蓮山地的人，寄腳佇基比亞；總是彼所在的人是便雅憫人。

17

老人抬目看見人客佇城內的街路，就問伊講：「你對叨落來？欲去叨落？」

18

伊應講：「阮對猶大伯利恆來，欲去以法蓮山地彼旁。我本佇遐，過去猶大伯利恆，今我去耶和華的厝，佇遮無人接納我入伊的厝。

19

總是我有草有糧通互驢，也有餅有酒通互本身及你的女婢，及隨你的奴僕的少年人，攏無欠一項。」

20

老人講：「願你平安！你所欠用的是我代，獨獨你呣通佇街路裡過暝。」

21

對按呢導到伊的厝，飼伊的驢，就洗腳飲食。

22

的心抵快樂的時，城內許個匪類圍纍伊的厝，直直拍門，對厝主老人講：「你將彼個入你的厝的人帶出來，阮欲及伊交合。」

23

彼個厝主出來遐給講：「我的兄弟啊，呣通，莫得做此個歹；此人既然入我的厝，恁就莫得做此個見誚的事。

24

我有查某子，猶是在室女，閣有伊的細姨，我導伊出來恁通凌辱伊出在恁的意思款待，獨獨對此人恁呣通行此個見誚事。」

25

總是許個人呣聽伊的話。彼人就將伊的細姨牽出去外面交，就及伊交合，通暝凌辱伊，到早起天欲光的時，才放伊去。

26

天昲光的時，婦仁人來到伊的主人所歇彼個厝門口，就倒佇遐，直到天光。

27

天光早，伊的主人起來開厝的門，出去欲起身，看見彼個婦仁人就是伊的細姨倒佇厝門口，二支手靠佇戶椗裡；

28

就給婦仁人講：「起來，咱欲起身！」總是伊無應。伊就給伊扶佇驢的頂面，起身去伊的本所在。

29

到伊的厝，就用刀將伊的細姨的身屍及骨割做十二塊，差人提去通以色列的全境。

30

見若看見的人攏講：「對以色列人出埃及的日，直到今仔日，未曾按呢行，也無看見。今恁著想，著參詳然後才講。」