利未記 第 6 章 - 台語漢字羅馬本

1
耶和華吩咐摩西講:
2
「若有人犯罪,干犯耶和華,對伊的厝邊行詭詐,或是所交代伊物件,或是交關買賣,或是搶人的財物,或是欺壓厝邊,
3
或是拾著失落的物行詭詐,白賊來咒誓,佇人所行一切的事的中間犯著一項來有罪;
4
伊若犯著,致到有過失,就著還所搶的,抑是因為欺壓所得著的,抑是所交代伊的物,抑是人失落互伊所拾著的物,
5
抑是伊因為甚麼物白賊咒誓,就著照數額來還,另外加五份的一份,佇查出伊有過失的日著還本主。
6
也著照你所估的,用伊補過失的祭──就是羊群中一隻無瑕疵的綿羊──牽到耶和華的面前,交互祭司做補過失的祭。
7
祭司著佇耶和華的面前替伊贖罪;伊無論行甚麼事,互伊有罪,攏欲得著赦免。」
8
耶和華吩咐摩西講:
9
「你著命令亞倫及伊的子孫講,燒祭的例是按呢:燒祭著下佇壇的柴頂,一暝到光,壇頂的火著常常。
10
祭司著穿幼苧布的衣服,下身也著穿幼苧布的褲,將壇頂的火所燒做燒祭的灰收起來,傾佇壇邊;
11
然後著褪去此個衣服,穿別號的衣服,將火灰帶出營外到清氣的所在。
12
壇頂的火著佇頂面常常,呣通熄。祭司著逐早起佇彼頂面燒柴,閣將燒祭排佇壇頂,佇彼頂面燒謝恩祭的油。
13
佇壇頂的火著常常,呣通熄。」
14
「素祭的例是按呢:亞倫的子孫著佇壇前將這獻佇耶和華的面前。
15
伊著對彼中間,提出素祭的麵粉一把,及油及素祭中所有的乳香,燒佇壇頂,做紀念獻互耶和華做芳味。
16
所剩的,亞倫及伊的子孫著食伊,著佇聖的所在呣通參酵來食,著佇會幕的院內食。
17
呣通參酵來伊。這是我對我的火祭中賞賜的份額,是至聖的,及贖罪祭以及補過失的祭一樣。
18
見若亞倫子孫中查甫的攏著食伊,對耶和華的火祭中,做永遠的份額,直到恁的萬代。摸諸個祭物的,攏欲成做聖。」
19
耶和華吩咐摩西講:
20
「亞倫及伊的子孫佇伊受抹油的日,所著獻互耶和華的禮物,就是幼的麵粉伊法十份的一份,做常常獻的素祭:早起時一半,下昏時一半。
21
著佇煎盤用油來做,調和了,你就著提入來;好一塊一塊,做素祭獻互耶和華做芳味。
22
伊的子孫中,續接伊受抹油做祭司,著獻伊,著一盡燒互耶和華。這是永遠的例。
23
祭司的素祭著一盡燒,呣通食伊。」
24
耶和華吩咐摩西講:
25
「你著吩咐亞倫及伊的子孫講,贖罪祭的例就是按呢:著佇耶和華的面前、燒祭的精牲的所在來贖罪祭的精牲;這是至聖的物。
26
為贖罪獻此個祭的祭司著食伊,著佇聖的所在,就是佇會幕的院內食伊。
27
見若摸伊的肉的欲成做聖;伊的血若灑佇甚麼衣服的頂面,所灑著彼領你著佇聖的所在洗。
28
若煮佇磁的器具著給伊摃破;若煮佇銅的器具,此個器具著過磨,才用水洗。
29
見若祭司中的查甫丁攏著食伊,這是至聖的物。
30
見若贖罪祭,伊的血若帶入會幕佇聖所贖罪,攏呣通食伊,著用火燒伊。」

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!