馬可福音 第 1 章 - 台語漢字羅馬本

1

上帝的子，耶穌基督福音的起頭。

2

親像佇先知以賽亞的冊所記載講：我差我的使者佇你的面前，來修整你的路。

3

有叫佇曠野的伊的聲講：著備辦主的路，修直伊的小路，

4

約翰來，佇曠野行洗禮，傳反悔的洗禮，互人得著赦罪。

5

通猶太地及耶路撒冷的眾人攏出來就近伊，認的罪，佇約但河對伊受洗禮。

6

此個約翰穿駱駝毛，腰縖皮帶，食草蜢及山野的蜜。

7

伊傳講：「有一個比我卡有權能的，隨尾我來，就屈落來解伊的鞋帶我也堪得。

8

我曾用水給恁行洗禮，伊欲用聖神給恁洗。」

9

當諸個日，耶穌對加利利的拿撒勒來，佇約但河對約翰受洗禮。

10

即時對水起來，就看見天裂開，聖神親像鴿仔，降臨佇伊的頂面。

11

閣對天有聲，講：「你是我所疼的子，我歡喜你。」

12

聖神即時迫伊去曠野。

13

佇曠野四十日，抵著撒但試，也及野獸相及住，有天使伺候伊。

14

約翰已經關監，耶穌到加利利，傳上帝的福音，

15

講：「日期滿啦，上帝的國近啦。恁著反悔來信福音！」

16

耶穌經過加利利的海墘，看見西門及伊的兄弟安得烈拋網佇海裡；因為是討漁人。

17

耶穌給講：「恁來隨我，我欲互恁得著人親像討魚的。」

18

連鞭離開網，來隨伊。

19

略仔進前，看見西庇太的子雅各及伊的兄弟約翰佇船裡補網。

20

伊連鞭招，就拜別老父西庇太及倩工人佇船裡，來隨佇伊的後面。

21

入迦百農，耶穌佇安息日入會堂教示人。

22

人奇怪伊的教示；因為伊教示人，親像有權的，無親像經學士。

23

抵仔會堂內，有一個患著鬼的人。喉叫講：

24

「拿撒勒人耶穌，阮及你甚麼干涉？你來欲滅阮嗎？我知你是是誰，就是上帝的聖者。」

25

耶穌責備伊講：「你著靜靜！對此人出去。」

26

邪神抽惙彼人，大聲叫，就對伊出去。

27

眾人攏卬愕，致到相辯論講：「此個是怎樣？是新的教示！伊用權命令邪神，邪神也順趁伊。」

28

伊的名聲隨時遍傳加利利的四方。

29

已經出會堂，隨時及雅各、約翰，入西門及安得烈的家。

30

西門的丈姆患著熱病倒，隨時有人將這給耶穌講。

31

伊近倚牽伊的手，互伊起來，熱就退，婦仁人就伺候。

32

到黃昏暗，日落了，有人導攏總有破病的，及患著鬼的人，就近伊。

33

通城攏聚集佇門口。

34

耶穌醫好逐樣病的人多多，閣趕多多鬼，因為鬼識伊，所以呣准講。

35

隔早起，天猶不止暗，耶穌起來，出去曠野的所在，佇遐祈禱。

36

西門及同伴的人追尋伊，

37

已經抵著就給伊講：「眾人攏尋你。」

38

伊給講：「咱來去別位，到附近的埠頭，互我通佇遐傳道，因為我為著此個事才出來。」

39

就去遍加利利，入的會堂，宣傳道理，閣趕鬼。

40

有一個癩的就近伊求伊，跪伊，給伊講：「你若肯，就會互我清氣。」

41

耶穌可憐，伸手摸伊，給伊講：「我肯，你通清氣！」

42

癩即時除去，伊就清氣。

43

耶穌嚴嚴警戒伊，隨時教伊去，

44

也給伊講：「著謹慎，莫得給人講甚麼，獨獨著去將本身互祭司驗，亦為著你得著清氣，獻摩西所吩咐的，來做證據佇人。」

45

總是伊出去，就大大宣傳，四界報揚此個事，致到耶穌無通閣顯然入城，獨獨住佇外面曠野的所在。人對四方就近伊。