馬太福音 第 18 章 - 台語漢字羅馬本

1

當彼時，學生就近耶穌講：「佇天國甚麼人最大？」

2

耶穌就叫一個細漢囝仔，互伊徛佇中間，

3

講：「我實在給恁講，恁若無越轉來成做親像細漢囝仔的，決斷入天國。

4

所以見若家己謙卑親像此個細漢囝仔的，伊佇天國就是最大。

5

見若佇我的名接納此號細漢囝仔的一個，就是接納我。」

6

「見若互諸個信我的微小的一個受塞礙，彼人寧可有大石磨吊伊的頷頸，沈佇深海。

7

此世間有災禍啊，對有塞礙人的事；因為塞礙的事免得有，總是塞礙的事對是誰來，彼人有災禍！

8

設使你一手、一腳，塞礙你，就著斬擲。你破相抑是跛腳，入佇活是好，卡得二手二腳落永遠的火。

9

設使你一目塞礙你，就著挖擲。你一目入佇活是好，卡得二目落地獄的火。」

10

「恁著謹慎，莫得看輕諸個微細中的一個；因為我給恁講，的天使佇天裡，常常見我佇天裡的父的面。

11

恁拍算怎樣？人若有一百隻羊來拍呣見一隻，豈無且放下彼九十九隻，去山裡尋彼隻拍呣見的嗎？

12

｛人子到，是欲拯救失落的。」〔台語羅馬譯本無此節！〕｝

13

若果然尋著，我實在給恁講，伊為著彼隻歡喜，贏過九十九隻無拍呣見的！

14

按呢諸個微細中的一個沈淪，也呣是恁佇天裡的父的旨意。」

15

「設使你的兄弟得罪你，就著去，干單你及伊佇的時，指明伊的呣著。伊若聽你，就得著你的兄弟；

16

伊若呣聽，就著導一二人相及去，用二三人的嘴做干證，逐句話通做憑準。

17

若呣肯聽，就給教會講；若閣呣肯聽教會，就著看伊親像外邦人及抽餉的一樣。

18

「我實在給恁講，凡若恁佇地裡縛的，佇天裡也欲縛；凡若恁佇地裡解的，佇天裡也欲解。

19

我閣給恁講，設使恁中間二人佇地裡無論求甚麼，若是同心，就我佇天裡的父欲給做成。

20

因為不論甚麼所在，有二三人佇我的名聚集，我也佇中間。」

21

彼時，彼得倚來，給伊講：「主啊，我的兄弟得罪我，我赦免伊著幾擺？著七擺嗎？」

22

耶穌給伊講：「我無給你講著到七擺，就是到七十個七擺。

23

所以天國比並人君愛欲及伊的奴僕算數。

24

起頭算的時，有導一個欠伊千萬銀的來。

25

既然無通還，伊的主人命令著賣伊本身及伊的某子，連伊一切所有的來還。

26

彼個奴僕就仆拜伊，講：『主啊，著寬容我，我欲攏總還。』

27

奴僕的主人就憐憫，來放伊，閣赦免伊的債。

28

「彼個奴僕出去，抵著伊一個同做奴僕的欠伊一百個銀仔，就掠伊，叉伊的頷頸，講：『你所欠的著還！』

29

同做奴僕的仆求伊，講：『著寬容我，我欲還你。』

30

若是伊呣肯，就去給伊關落監，來聽候伊還所欠的。

31

諸個同做奴僕的看見此個代誌真憂悶，將攏總的事對主人講明。

32

對按呢伊的主人召伊來，給伊講：『歹的奴僕啊！因為你對我求，我就將你所欠的攏赦免，

33

你豈呣著憐憫你同做奴僕的，親像我憐憫你？』

34

伊的主人受氣，將伊交代刑杖，聽候伊一盡還所欠的。

35

按呢恁逐人無用心赦免恁的兄弟，就我的天父也欲按呢款待恁。」