馬太福音 第 25 章 - 台語漢字羅馬本

1

「彼時，天國欲比並十個在室女，抬的燈，出去迎接新子婿。

2

其中五個戇的，五個智識的，

3

戇的抬的燈，無另外帶油；

4

獨獨智識的，抬的燈另外帶油佇的器具內。

5

新子婿延延，就攏盹瞌睡睏。

6

半暝有大聲叫講：『新子婿來啦，恁出來接伊！』

7

彼時，諸個在室女攏起來修整的燈。

8

戇的給智識的講：『請將恁的油分阮，因為阮的燈欲熄啦。』

9

智識的應講：『驚了恁阮攏無夠；卡好去對賣的人家己買。』

10

去買的時，新子婿到。許個便的，及伊入婚姻的筵桌，門就關。

11

然後其餘的在室女亦來，講：『主啊，主啊，給阮開！』

12

若是伊應講：『我實在給恁講：，我呣識恁。』

13

所以，著張持，因為恁呣知，彼個日，彼個時。」

14

「因為親像一人欲去外國，就召伊家己的奴僕，將所有的交代；

15

一個互伊銀五千，一個互伊二千，一個互伊一千，各照的才調，就去外國。

16

領五千的隨時去做生理，閣趁五千。

17

領二千的亦是按呢閣趁二千。

18

獨獨彼個領一千的去就掘地，來囥密伊的主人的銀。

19

過久久，諸個奴僕的主人到，及算數。

20

領五千的來閣帶五千，講：『主啊，你交代我五千。你看，我有閣趁五千。』

21

伊的主人給伊講：『好啊，好閣盡忠的奴僕，你佇少的已經盡忠，我欲設立你來管多的；通入你的主人的快樂。』

22

領二千的亦來，講：『主啊，你交代我二千。你看，我有閣趁二千。』

23

伊的主人給伊講：『好啊，好閣盡忠的奴僕，你佇少的已經盡忠，我欲設立你來管多的；通入你的主人的快樂。』

24

領一千的亦來，講：『主啊，我知你是嚴轄的人，未撒的所在就欲收割，未分散的所在就欲拾做堆，

25

所以我驚，就將你一千銀去埋佇地裡。今你的原物還你。』

26

伊的主人就應伊講：『歹閣貧憚的奴僕啊，你既然知我無撒的所在就欲收割，未分散的所在就欲拾做堆，

27

就著將我的銀下佇錢店，我來的時，通得著我的本銀及利息。

28

所以著對伊提彼一千來，互彼個有十千的。

29

因為見若有的，欲互伊，互伊有剩；無的，連伊所有的亦欲提伊。

30

亦彼個無利益的奴僕趕伊佇外面黑暗的所在；佇遐欲有啼哭咬牙切齒。』」

31

「當人子佇伊的榮光，及攏總的天使來的時，伊欲坐伊榮光的座位。

32

聚集萬邦佇伊的面前。伊就欲分別，親像牧者分別綿羊離開山羊，

33

將綿羊下佇伊的正旁，山羊下佇伊的倒旁。

34

彼時王欲給正旁的講：『恁對我的父得著恩典的，進前來承接國，就是對創造世間以來給恁備辦的；

35

因為我枵，恁曾互我食，我嘴乾，恁互我飲；我出外，恁互我住；我褪腹裼，恁互我穿；

36

我破病，恁看顧我；我佇監裡，你來尋我。』

37

彼時義人欲應伊講：『主啊，阮甚麼時看見你枵，來互你食，嘴乾，來互你飲？

38

甚麼時看見你出外，來互你住，褪腹裼，來互你穿？

39

甚麼時看見你破病，抑是佇監裡，來尋你？』

40

王欲應伊講：『我實在給恁講，恁既然行伊佇我的兄弟至微細的的一個，就是行伊佇我。』

41

閣欲給倒旁的講：『恁受咒詛的，著離開我！入永遠的火就是為著魔鬼及伊諸個使者所備辦的！

42

因為我枵，恁呣曾互我食，我嘴乾，恁呣曾互我飲；

43

我出外，恁呣曾互我住；我褪腹裼，恁呣曾互我穿；我破病，及佇監裡，恁呣曾看顧我。』

44

亦欲應講：『主啊，阮甚麼時看見你枵，抑是嘴乾，抑是出外，抑是褪腹裼，抑是破病，抑是佇監裡，來無服事你啊？』

45

伊就欲應伊講：『我實在給恁講，恁既然無行伊佇諸個至微細者的一個，就是無行伊佇我。』

46

諸個人欲去入永遠的刑罰；若是義的人入永遠活。」