民數記 第 12 章 - 台語漢字羅馬本

1

米利暗及亞倫嫌摩西為著伊所娶古實的查某子。因為摩西曾娶古實人的查某子做某，講：

2

「耶和華豈單單及摩西講話，豈也無及阮講話嗎？」此個話耶和華聽見。（

3

彼個摩西做人極其溫柔，贏過世上的眾人。）

4

耶和華忽然對摩西、亞倫、米利暗講：「恁三人出來，到會幕遮。」三人就出來。

5

耶和華佇雲柱中降臨，徛佇布棚門口，召亞倫及米利暗，二人就出來。

6

伊講：「著聽我的話：恁中間若有先知，我──耶和華欲用異象互識我，佇眠夢中及講話。

7

我的奴僕摩西呣是按呢；伊盡忠佇我的全家。

8

我欲面對面及伊講話，就是明明講，無用猜語，閣伊欲看見耶和華的形容。恁嫌我的奴僕摩西，啥事無驚啊？」

9

耶和華受氣就去。

10

雲對布棚頂徙開，看啊，米利暗癩親像雪。亞倫看米利暗，看啊，伊是癩，

11

亞倫對摩西講：「我的主啊，求你莫得因為阮的愚戇犯罪，將此個罪歸佇阮。

12

求你呣通互伊親像已經死，才對老母的胎出、肉已經爛一半。」

13

摩西就哀求耶和華講：「上帝啊，求你醫好伊！」

14

耶和華對摩西講：「設使伊的老父呸涎佇伊的面，伊豈無見誚七日嗎？今著給伊關佇營外七日，然後才通導伊入來。」

15

對按呢關米利暗佇營外七日。百姓無起身，聽候米利暗閣入來。

16

後來百姓對哈洗錄起身，佇巴蘭的曠野安營。