民數記 第 28 章 - 台語漢字羅馬本

1

耶和華吩咐摩西講：

2

「你著命令以色列人講：『我的禮物，就是獻互我做芳芳諸個火祭的食物，恁著照日期謹慎獻互我』；

3

閣著給講：恁著獻互耶和華的火祭，就是無瑕疵、未滿年的羊仔，逐日二隻，做久長獻的燒祭。

4

早起時著獻羊仔一隻，黃昏的時著獻羊仔一隻；

5

閣著獻幼麵粉伊法十份一，及調和夾好的油一欣四份一，做素祭。

6

這是佇西奈山所定著做常常獻的燒祭，就是獻互耶和華做芳芳的火祭。

7

為著此一隻羊仔，著續獻灌奠的酒一欣四份的一份。佇聖所中，你著將厚的酒獻互耶和華做灌奠。

8

下昏時，著獻第二隻羊仔，親像早起時的素祭也親像伊的灌奠，獻伊互耶和華做芳芳的火祭。」

9

「閣佇安息日，著獻二隻無瑕疵、未滿年的羊仔，也用調和油的幼麵粉伊法十份的二份做素祭，及伊的灌奠。

10

這是逐個安息日的燒祭；彼個常常獻的燒祭，及伊的灌奠以外。」

11

「逐月的初一，恁著獻燒祭互耶和華，就是牛仔二隻，綿羊一隻，無瑕疵、未滿年的羊仔七隻。

12

為逐隻牛仔，著用調和油的幼麵粉伊法十份的三份做素祭；為彼隻羊也著用調和油的幼麵粉伊法十份的二份做素祭；

13

為著逐隻羊仔著用調和油的幼麵粉十份的一份做素祭及芳芳的燒祭，是獻互耶和華的火祭。

14

伊的灌奠著用酒，為著一隻牛仔用半欣，為著一隻羊用一欣的三份一，為著一隻羊仔就用一欣的四份一。這是逐月的燒祭，一年的中間逐月著按呢。

15

閣著用一隻山羊做贖罪祭，獻互耶和華；著佇常常獻的燒祭及伊的灌奠以外來獻伊。」

16

「正月十四日是耶和華的過節。

17

此月十五日是節筵，著食無酵餅七日久。

18

佇伊的頭一日著有聖會；攏呣通做勞動的工。

19

你著獻火祭做燒祭互耶和華，就是牛仔二隻，綿羊一隻，未滿年的羊仔七隻，恁攏著用無瑕疵的。

20

的素祭，用調和油的幼麵粉；為著一隻牛獻十份三；為著一隻羊獻十份二；

21

為著彼七隻羊仔，逐隻著獻十份一。

22

閣獻一隻山羊做贖罪祭，給恁贖罪。

23

恁獻諸個，著佇早起時的燒祭，就是常常獻的燒祭以外。

24

連連七日久，逐日照此個例用芳芳的火祭的食物獻互耶和華，著佇常常獻的燒祭及伊的灌奠，以外來獻。

25

第七日恁著有聖會，攏呣通做甚麼勞動的工。」

26

「七個七日節，起頭熟的土產，恁獻新的素祭互耶和華的日，著有聖會；攏呣通做勞動的工。

27

恁著獻芳芳的燒祭互耶和華，就是牛仔二隻，綿羊仔一隻，未滿年的羊仔七隻。

28

的素祭用調和油的幼麵粉；為著一隻牛獻十份三；為著一隻羊獻十份二；

29

為著彼七隻羊仔，逐隻著獻十份一。

30

閣獻一隻山羊給恁贖罪。

31

恁著獻諸個，及伊的灌奠佇常常獻的燒祭及伊的素祭以外，恁攏著用無瑕疵的。」