民數記 第 30 章 - 台語漢字羅馬本

1

摩西吩咐以色列逐支派的頭人，給講：「耶和華所命令的是按呢：

2

人若對耶和華下願抑是咒誓，用一個約家己約束，就呣通吞食伊的話，著照伊的嘴所講出的一盡行伊。

3

查某囝仔少年、猶佇老父的家的時，若對耶和華下願，用約來家己約束，

4

伊的老父聽見伊所下的願及約束家己的約，伊的老父若靜靜無插伊，伊所下諸個願的確成立，伊所家己約束的約也的確成立。

5

總是老父聽見的日無允准伊，伊所下諸個願及家己約束許個約，攏無成立；耶和華也欲赦免伊，因為伊的老父無允准。

6

伊出嫁的時，若已經有下願，抑是伊的嘴隨便講出約束家己的話佇伊的身上，

7

伊的丈夫若聽見，也佇聽見的日靜靜無插伊，就伊所下諸個願的確成立，伊家己約束的約也的確成立。

8

總是伊的丈夫聽見的日，無允准伊，就廢無伊所下的願，及伊的嘴隨便講出約束家己的話；耶和華也欲赦免伊。

9

守寡婦仁人抑是受離出的婦仁人所下的願，及伊家己約束的話，攏欲成立佇伊的身上。

10

婦仁人若佇丈夫的厝下願抑是咒誓，用約來約束家己，

11

丈夫聽見，靜靜無插伊，也無呣允准，伊所下諸個願攏欲成立，也伊約束家己的約也欲成立。

12

總是丈夫聽見的日，若給伊廢無，見若伊的嘴所出的或是所下的願抑是家己約的，就攏成立，因為伊的丈夫已經廢無伊；耶和華也欲赦免伊。

13

見若所下的願及約束的咒誓來刻苦家己，伊的丈夫通成立伊，伊的丈夫也通廢無伊。

14

總是伊的丈夫日日靜靜無插伊，就成立伊所下許個願及約束伊的話；因為伊的丈夫聽見的日靜靜無插伊，伊就成立伊。

15

總是丈夫聽見了後，廢無伊，就伊著擔當婦仁人的罪。」

16

諸個是耶和華所命令摩西的，論起丈夫對佇婦仁人，老父對佇少年的查某子、住佇家內的規例。