箴言 第 13 章 - 台語漢字羅馬本

1
智慧的子聽老父的教督;侮慢的人呣聽責備。
2
人因為嘴所結的果子,欲享受福氣;奸詐的人欲抵著強暴。
3
約束嘴舌的,保全伊的活命;隨便開嘴的,致到敗無。
4
貧憚人的心欣慕,也無所得著;殷勤的人欲得著心滿意足。
5
義人厭賤白賊話;歹人有臭名閣見誚。
6
公義保護行正直的;邪惡敗壞犯罪的人。
7
有人家己妝做好額,也無半項;有人家己妝做喪鄉,實在有多多財物。
8
人的錢財通贖回伊的活命;若是喪鄉人無聽人的哄喝。
9
義人的光欲明亮;歹人的燈欲熄。
10
驕傲干單起相爭;相及參詳者,就有智慧。
11
呣是對著磨來得著的錢會消無;流汗來積聚者,欲愈加添。
12
所向望的延延久,就致到心痛疼;所意愛的一下到,就是活命的樹。
13
藐視道理的,家己取滅無;敬畏誡命的,欲得著報賞。
14
智慧的人的法度是活命的水泉,會互人離開死無的羅網。
15
善良的聰明互人得著恩典;奸詐的人的路是嵁硈。
16
通達的人攏用智慧行代誌;獨獨戇人報揚戇事。
17
歹的使者陷落佇災禍;忠信的欽差會互人康健。
18
棄絕教督者,欲抵著喪鄉及凌辱;願受責備者,欲得著榮光。
19
所愛的得著成,心就歡喜;離開歹代,是戇人所厭惡。
20
及智慧的人相及行,會成做智慧;及愚戇的人做伴,會受損傷。
21
災禍欲追歹人;若是義的人欲得著報賞。
22
好人留產業互子孫;歹人所積聚的錢財歸佇義人。
23
喪鄉人種作得著多多米糧,也有因為不義,來抵著滅無的。
24
呣甘用箠的,是怨恨伊的子;若是疼伊者,就照時責督伊。
25
義人得著食互伊的心滿足;歹人的腹肚的確枵。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!