雅歌 第 2 章 - 台語漢字羅馬本

1
我是沙崙的玫瑰花,是山谷中的百合花。
2
我所疼者佇諸個查某子的中間,親像茦仔內的百合花。
3
我所戀愛者佇諸個查甫子的中間,親像樹林中的蘋果樹。我真歡喜坐佇伊的蔭影,伊的果子,我食了真甜。
4
伊導我入筵席的所在,用疼做旗佇我的頂面。
5
求恁用葡萄餅來補我的力,用蘋果來養我精神,因為我對愛情來致病。
6
伊的倒手扶我的頭殼;伊的正手抱我。
7
耶路撒冷的眾查某囝仔啊,我指羚羊以及田野的鹿母切切吩咐你:莫得拍醒伊!莫得攪擾我所疼者,聽候伊家己情願。
8
啊!我所戀愛者的聲看啊;伊來啦!趒佇山裡跳佇嶺裡。
9
我所戀愛者親像羚羊,抑是鹿仔。看啊,伊徛佇阮的牆壁後,對窗仔看,對窗仔子探。
10
我所戀愛者出聲對我講:我所疼者,我的美人,起來,及我相及去!
11
看啊,因為冬天已經過,雨已經晴息啦!
12
遍地的花已經開,鳥仔哮的時到啦;佇咱的境內聽見鳩鵻的聲。
13
無花果樹的果子漸漸成熟;葡萄樹開花吐出伊的芳。我所疼者,我的美人,起來,及我相及去!
14
我的鴿啊,你佇石縫內,佇山巖隱密的所在。求你准我看見你的面,聽見你的聲;因為你的聲溫和,你的面生做娞。
15
著給阮掠狐狸,細隻狐狸就是敗壞葡萄園的,因為阮的葡萄抵仔欲開花。
16
我所戀愛者屬我,我也屬伊;伊佇百合花中飼伊的羊群。
17
我所戀愛者啊,願你日涼冷,影伸長的時,倒轉來,親像羚羊,抑是鹿仔佇比特的山裡。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!