撒迦利亞 第 8 章 - 台語漢字羅馬本

1

萬軍的耶和華的話臨到講：

2

「萬軍的耶和華按呢講：我為著錫安極其熱心，我為著伊熱心，發出大受氣。

3

耶和華按呢講：我今倒來錫安，欲踮佇耶路撒冷的中間。耶路撒冷欲稱做誠實的城，萬軍的耶和華的山欲稱做聖的山。

4

萬軍的耶和華按呢講：將來欲有老的查甫人、老的婦仁人坐佇耶路撒冷闊的街路，因為年老逐個抬柺仔。

5

城內闊的街路欲有查甫囝仔、查某囝仔滿滿佇彼個街路中。

6

萬軍的耶和華按呢講：當日所剩的百姓看這做奇怪，我豈也看做奇怪嗎？這是萬軍的耶和華講的。

7

萬軍的耶和華按呢講：看啊，我欲救我的百姓對日出的所在也對日落的所在倒來。

8

我欲導來，欲徛起佇耶路撒冷的中間。欲做我的百姓，我欲做的上帝，憑誠實及公義。」

9

萬軍的耶和華按呢講：「當下萬軍的耶和華的厝的地基、通起殿堂，彼日先知所講的話，現在恁聽見，今著勇壯恁的手。

10

彼日以前，人無得著工錢，精牲也無得著工錢；閣因為對敵的緣故，出入的人無得著平安，因為我互眾人相攻擊。

11

總是，我今款待諸個剩的百姓無欲親像前的日。這是萬軍的耶和華講的。

12

因為欲有平安的種子，葡萄樹欲結果子，地欲出土產，天欲落露水。我欲互諸個剩的百姓承受諸個一切。

13

猶大家及以色列家啊，前佇列國中引起恁來咒詛；按呢，我欲拯救恁，互人引起恁來祝福。恁莫得驚，恁的手著勇壯。」

14

因為萬軍的耶和華按呢講：「恁的列祖惹我的受氣的時，我想欲降災禍佇恁，也無退悔。

15

今我也按呢想欲施恩互耶路撒冷及猶大家，恁莫得驚。這是耶和華講的。

16

恁所應該行的是按呢：逐人及厝邊講話誠實，佇恁的城門行誠實及和平的審判。

17

心內呣通計謀歹代害厝邊，呣通愛濫糝咒誓，因為諸個事攏是我所怨恨的。這是耶和華講的。」

18

萬軍的耶和華的話臨到我講：

19

「萬軍的耶和華按呢講：四月的禁食、五月的禁食、七月的禁食、十月的禁食，佇猶大家欲做歡喜快樂得意的節期；所以恁著意愛誠實及和平。」

20

萬軍的耶和華按呢講：「將來有列國的人及多多城徛起的百姓欲到。

21

徛起此個城的百姓欲到彼個城，講：『咱著緊緊去求耶和華的恩，去尋萬軍的耶和華；論到我，我也欲去。』

22

欲有多多百姓及強大的國來耶路撒冷尋萬軍的耶和華，求耶和華的恩。

23

萬軍的耶和華按呢講：當許個日，對列國萬族中欲有十人擒一個猶大人的衫仔裾，擒伊，講：『阮欲及恁相及去，因為阮聽見上帝及恁佇。』」