列王紀上 第 10 章

1

(THR) Sī-pa ê lú-ông thiaⁿ-kìⁿ Só͘-lô-bûn ê miâ-siaⁿ, ūi-tio̍h Iâ-hô-hoa ê miâ só͘ tit-tio̍h ê, chiū lâi beh ēng oh-tit kóe-bêng ê sū chhì i.

(BCL) 示巴的女王聽見所羅門的名聲，為著耶和華的名所得著的，就來欲用得解明的事試伊。

2

(THR) I kàu Iâ-lō͘-sat-léng, tè i ê lâng chin-chōe; ū lo̍k-tô chài hiuⁿ-liāu, kap n̂g-kim chin-chōe; iā ū pó-chio̍h; i kìⁿ Só͘-lô-bûn ê sî, chiū chiong sim-lāi it-chhè só͘ chûn--ê, kap i kóng.

(BCL) 伊到耶路撒冷隨伊的人真多，有駱駝載香料、及黃金真多，也有寶石。伊見所羅門的時，就將心內一切所存的及伊講。

3

(THR) Só͘-lô-bûn chiàu i só͘ mn̄g-ê lóng ìn i; bô chı̍t-hāng ông bōe hiáu-tit thang kā i kóng.

(BCL) 所羅門照伊所問的攏應伊，無一項王曉得通給伊講。

4

(THR) Sī-pa lú-ông khòaⁿ-kìⁿ Só͘-lô-bûn it-chhè ê tì-hūi, kap i só͘ khí ê chhù;

(BCL) 示巴女王看見所羅門一切的智慧，及伊所起的厝，

5

(THR) toh-téng ê chia̍h-mı̍h, jîn-sîn pâi-lia̍t teh-chē, lô͘-po̍k kun-sûi ho̍k-sāi, í-kı̍p in ê i-ho̍k, kap i ê chiú-chèng, koh khòaⁿ-kìⁿ i chiūⁿ Iâ-hô-hoa tiān ê kiā-á, chiū hûn put-hū-thé.

(BCL) 桌頂的食物，人臣排列坐，奴僕跟隨服事，以及的衣服及伊的酒政，閣看見伊上耶和華殿的崎仔，就魂不附體；

6

(THR) I chiū tùi ông kóng, Góa tī pún-kok thiaⁿ-kìⁿ lí ê tāi-chì, kap lí ê tì-hūi, lóng sī chin-sı̍t.

(BCL) 伊就對王講：「我佇本國聽見你的代誌及你的智慧攏是真實！

7

(THR) Chóng-sī góa m̄-sìn hiah ê ōe, kàu góa lâi chhin-ba̍k khòaⁿ-kìⁿ, chiah chai; lâng só͘ kā góa kóng ê, iáu bô chı̍t-pòaⁿ; lí ê tì-hūi kap lí ê heng-thong iâⁿ-kè góa só͘ thiaⁿ-kìⁿ ê miâ-siaⁿ.

(BCL) 總是我呣信許個話，到我來親目看見才知人所給我講的猶無一半。你的智慧及你的亨通贏過我所聽見的名聲。

8

(THR) Hok-khì ah, lí ê lâng, hok-khì ah, lí ê lô͘-po̍k, siông-siông khiā tī lí ê bīn-chêng, thiaⁿ lí ê tì-hūi.

(BCL) 福氣啊！你的人，福氣啊！你的奴僕常常徛佇你的面前聽你的智慧。

9

(THR) Iâ-hô-hoa lí ê Siōng-tè sī eng-kai o-ló ê; I hoaⁿ-hí lí, hō͘ lí chē Í-sek-lia̍t ê kok-ūi; in-ūi Iâ-hô-hoa éng-óan thiàⁿ Í-sek-lia̍t, só͘-í siat-lı̍p lí chòe ông, hō͘ lí péng-kong kiâⁿ-gī.

(BCL) 耶和華──你的上帝是應該謳咾的！伊歡喜你，互你坐以色列的國位；因為耶和華永遠疼以色列，所以設立你做王，互你秉公行義。」

10

(THR) I ēng chı̍t-pah tha-liân-tek ê kim, kap chōe-chōe ê hiuⁿ-liāu, kap pó-chio̍h, sàng ông; í-āu só͘ lâi ê hiuⁿ-liāu, m̄-bat koh chhin-chhiūⁿ Sī-pa lú-ông sàng Só͘-lô-bûn ông ê hiah-chōe.

(BCL) 伊用一百二十他連得的金，及多多的香料，及寶石，送王。以後所來的香料，呣曾閣親像示巴女王送所羅門王的許多。（

11

(THR) Hi-lân ê chûn-chiah tùi Gô-hui tòa kim lâi-ê, koh tùi Gô-hui tòa chōe-chōe tôaⁿ-hiuⁿ-chhâ, kap pó-chio̍h lâi.

(BCL) 希蘭的船隻對俄斐帶金來的，閣對俄斐帶多多檀香柴，及寶石來。

12

(THR) Ông ēng tôaⁿ-hiuⁿ-chhâ, ūi Iâ-hô-hoa ê tiān kap ông-kiong, chòe lân-kan; koh ūi chhiùⁿ-koa ê lâng chòe khîm sek; í-āu m̄-bat koh ū hit hō tôaⁿ-hiuⁿ-chhâ lâi, iā bô lâng khòaⁿ-kìⁿ, tı̍t-kàu kin-á-jı̍t.

(BCL) 王用檀香柴為耶和華的殿及王宮做欄杆，閣為唱歌的人做琴瑟。以後呣曾閣有彼號檀香柴來，也無人看見，直到今仔日。）

13

(THR) Só͘-lô-bûn chiàu ông ê lé, ēng mı̍h sàng Sī-pa ê lú-ông; í-gōa koh ēng lú-ông kìⁿ só͘ ài, kìⁿ só͘ kiû--ê, sàng i. Tùi án-ni i kap i ê jîn-sîn tò-tńg khì i pún-kok.

(BCL) 所羅門王照王的禮用物送示巴的女王，以外閣用女王見所愛，見所求的，送伊。對按呢伊及伊的人臣倒轉去伊本國。

14

(THR) Só͘-lô-bûn ta̍k-nî só͘ tit-tio̍h ê kim, kiōng la̍k-pah la̍k-cha̍p-la̍k tha-liân-tek.

(BCL) 所羅門逐年所得著的金共六百六十六他連得。

15

(THR) Í-gōa ū iû-le̍k-ê, kap óng-lâi ê seng-lí lâng, í-kı̍p cha̍p-cho̍k chiah ê ông, kap kok-lāi chiah ê siú-léng só͘ la̍p ê.

(BCL) 以外有遊歷的及往來的生理人以及雜族諸個王，及國內諸個首領所納的。

16

(THR) Só͘-lô-bûn ông ēng kè-phah ê kim, chòe tōa-pâi nn̄g-pah bīn; múi-bīn tōa-pâi ê kim la̍k-pah sià-khek-le̍k;

(BCL) 所羅門王用過拍的金做大牌二百面，每面大牌的金六百舍客勒；

17

(THR) koh ēng kè-phah ê kim chòe pîn-pâi saⁿ-pah bīn, múi-bīn ēng kim saⁿ bî-ná; ông hē i tī Lī-pa-lùn chhiū-nâ ê chhù.

(BCL) 閣用過拍的金做屏牌三百面，每面用金三彌那，王下伊佇黎巴嫩樹林的厝。

18

(THR) Ông koh ēng chhiūⁿ-gê chòe chı̍t ê tōa pó-chō, ēng hó-kim an i.

(BCL) 王閣用象牙做一個大寶座，用好金安伊。

19

(THR) Pó-chō ū la̍k-chàn ê kiā-á, chō-ūi-the ê téng-bīn sī îⁿ ê; siang-pêng ū khò-chhiú, khò-chhiú-piⁿ ū nn̄g chiah sai khiā--teh;

(BCL) 寶座有六層的崎仔，座位撐的頂面是圓的，雙旁有靠手，靠手邊有二隻獅徛。

20

(THR) koh ū cha̍p-jī chiah sai, khiā tī la̍k chàn kiā-á ê chit-pêng kap hit-pêng; pa̍t-kok lóng bô chè-chō chhin-chhiūⁿ án-ni.

(BCL) 閣有十二隻獅徛佇六層崎仔的此旁及彼旁；別國攏無製造親像按呢。

21

(THR) Só͘-lô-bûn ông it-chhè lim ê khì-kū lóng sī kim--ê; Lī-pa-lùn chhiū-nâ ê chhù it-chhè ê khì-kū iā sī hó-kim--ê, lóng bô gûn--ê; Só͘-lô-bûn ê nî-kan lâng khòaⁿ gûn chòe bô mı̍h.

(BCL) 所羅門王一切飲的器具攏是金的。黎巴嫩樹林的厝一切的器具也是好金的，攏無銀的。所羅門的年間，人看銀做無物。

22

(THR) In-ūi ông ū Tha-si ê chûn-chiah chı̍t-tīn, kap Hi-lân ê chûn-chiah chı̍t-tīn, saⁿ-kap kè-hái; chiah ê Tha-si kui-tīn ê chûn chài kim, gûn, chhiūⁿ-gê, kâu, khóng-chhiok, saⁿ-nî tò-lâi chı̍t-pái.

(BCL) 因為王有他施的船隻一陣及希蘭的船隻一陣相及過海，諸個他施歸陣的船載金銀、象牙、猴、孔雀，三年倒來一擺。

23

(THR) Só͘-lô-bûn ông ê hó-gia̍h kap tì-hūi iâⁿ-kè thiⁿ-ē lia̍t-ông.

(BCL) 所羅門王的好額及智慧贏過天下列王。

24

(THR) Thiⁿ-ē ê lâng lóng lâi ài kìⁿ Só͘-lô-bûn ê bīn, thiaⁿ i ê tì-hūi, chiū-sī Siōng-tè siúⁿ-sù tī i ê sim ê.

(BCL) 天下的人攏來愛見所羅門的面，聽伊的智慧就是上帝賞賜佇伊的心的。

25

(THR) In ta̍k-ê tòa chìn-kòng ê mı̍h, chiū-sī gûn-khì, kim-khì, i-ho̍k, kun-khì, hiuⁿ-liāu, bé, kap lô; ta̍k-nî ū tiāⁿ-tio̍h ê lē.

(BCL) 逐個帶進貢的物，就是銀器、金器、衣服、軍器、香料、馬，及騾，逐年有定著的例。

26

(THR) Só͘-lô-bûn chiū chū-chı̍p chiàn-chhia, bé-peng; ū chiàn-chhia chı̍t-chheng sì-pah tiuⁿ, bé-peng chı̍t-bān nn̄g-chheng miâ; an-tì in tī hiah ê tún-chhia ê siâⁿ, iā kap ông tī Iâ-lō͘-sat-léng.

(BCL) 所羅門就聚集戰車馬兵，有戰車一千四百張，馬兵一萬二千名，安置佇許個囤車的城也及王佇耶路撒冷。

27

(THR) Ông tī Iâ-lō͘-sat-léng hō͘ gûn chhin-chhiūⁿ chio̍h-thâu, hō͘ pek-hiuⁿ-chhâ chhin-chhiūⁿ pîⁿ-iûⁿ ê sng-châi-chhiū, sī in-ūi chin-chōe.

(BCL) 王佇耶路撒冷互銀親像石頭，互柏香柴親像平洋的桑材樹，是因為真多。

28

(THR) Só͘-lô-bûn ê bé sī tùi Ai-kı̍p tòa--lâi-ê, sī ông ê seng-lí lâng, chı̍t-tīn chı̍t-tīn, chiàu kè-chîⁿ tit-tio̍h ê.

(BCL) 所羅門的馬是對埃及帶來的，是王的生理人一陣一陣照價錢得著的。

29

(THR) Tùi Ai-kı̍p chiūⁿ-lâi ê chhia, múi-tiuⁿ kè-gûn la̍k-pah sià-khek-le̍k; bé múi-phit chı̍t-pah gō͘-cha̍p. Hek-lâng chiah ê ông, kap A-lân chiah ê ông, lóng tùi in keng-chhiú, chiàu án-ni tòa--chhut-lâi.

(BCL) 對埃及上來的車，每張價銀六百舍客勒，馬每匹一百五十。赫人諸個王及亞蘭諸個王，攏對經手照按呢帶出來。

Bible Color Mark

• 台語漢字羅馬本
• 巴克禮全羅