撒母耳記上 第 13 章

1

(THR) Sò-lô tú-á chē-ūi ê nî-hè chòe Í-sek-lia̍t ông nn̄g-nî.

(BCL) 掃羅抵仔坐位的年歲；做以色列王二年，

2

(THR) Sò-lô chiū ūi ka-kī tùi Í-sek-lia̍t tiong kéng saⁿ-chheng lâng; nn̄g-chheng kun-tè Sò-lô tī Bı̍t-bo̍at kap Pek-te̍k-lī soaⁿ, chı̍t-chheng kun-tè Iok-ná-tan tī Piān-ngá-bín ê Ki-pí-a; kî-û ê lâng, i chhe in tò-khì ta̍k-lâng ê pò͘-pîⁿ.

(BCL) 掃羅就為家己對以色列中揀三千人：二千跟隨掃羅佇密抹及伯特利山，一千跟隨約拿單佇便雅憫的基比亞；其餘的人伊差倒去逐人的布棚。

3

(THR) Iok-ná-tan phah Ka-pa Hui-lī-sū lâng ê kun-iâⁿ, Hui-lī-sū lâng thiaⁿ-kìⁿ. Sò-lô chiū pûn sàu-kak tī chôan-tōe, kóng, Hi-pek-lâi lâng tio̍h thiaⁿ ah.

(BCL) 約拿單拍迦巴非利士人的軍營，非利士人聽見。掃羅就歕哨角佇全地，講，希伯來人著聽啊。

4

(THR) Í-sek-lia̍t chèng-lâng thiaⁿ-kìⁿ Sò-lô phah Hui-lī-sū lâng ê kun-iâⁿ, koh thiaⁿ-kìⁿ Í-sek-lia̍t lâng hō͘ Hui-lī-sū lâng iàm-ò͘ⁿ, peh-sìⁿ chiū kun-tè Sò-lô, chū-chı̍p tī Kiat-kah.

(BCL) 以色列眾人聽見掃羅拍非利士人的軍營，閣聽見以色列人互非利士人厭惡，百姓就跟隨掃羅聚集佇吉甲。

5

(THR) Hui-lī-sū lâng chū-chı̍p beh kap Í-sek-lia̍t lâng kau-chiàn; ū chhia saⁿ-bān tiuⁿ, bé-peng la̍k-chheng, pō͘-peng chhin-chhiūⁿ hái-piⁿ ê soa hiah-chōe; chiū chiūⁿ-lâi, tī Pek-a-bûn tang-sì ê Bı̍t-bo̍at chat-iâⁿ.

(BCL) 非利士人聚集欲及以色列人交戰，有車三萬張，馬兵六千，步兵親像海邊的沙許多，就上來佇伯亞文東勢的密抹紮營。

6

(THR) Í-sek-lia̍t lâng khòaⁿ-kìⁿ ka-kī gûi-kip, in-ūi peh-sìⁿ khún-pek, chiū ka-kī bih tī soaⁿ-tōng, chhiū-nâ, chio̍h-hia̍t, hiám-iàu ê só͘-chāi, kap chhim-khiⁿ.

(BCL) 以色列人看見家己危急，因為百姓窘迫，就家己匿佇山洞、樹林、石穴險要的所在，及深坑。

7

(THR) Iā ū Hi-pek-lâi lâng kè Iok-tàn kàu Ka-te̍k kap Ki-lia̍t tōe. Sò-lô iáu-kú tī Kiat-kah; peh-sìⁿ lóng ngia̍uh-ngia̍uh-chhoah lâi kun-tè i.

(BCL) 也有希伯來人過約但，到迦得及基列地。掃羅猶久佇吉甲，百姓攏愕愕惙來跟隨伊。

8

(THR) Sò-lô chiàu Sat-bó͘-jíⁿ só͘ tiāⁿ-tio̍h ê jı̍t-kî, thèng-hāu chhit-jı̍t. Sat-bó͘-jíⁿ iáu-bē lâi Kiat-kah, peh-sìⁿ lī-khui i sì-sòaⁿ khì.

(BCL) 掃羅照撒母耳所定著的日期聽候七日。撒母耳猶未來吉甲，百姓離開伊四散去。

9

(THR) Sò-lô kóng, Chiong sio-chè kap siā-un-chè tòa-lâi góa chia; i chiū hiàn sio-chè.

(BCL) 掃羅講：「將燒祭及謝恩祭帶來我遮。」伊就獻燒祭。

10

(THR) I hiàn sio-chè tú-á bêng-pe̍k, khòaⁿ ah, Sat-bó͘-jíⁿ kàu lah; Sò-lô chhut-khì ngiâ-chih i, beh kā i chhéng-an.

(BCL) 伊獻燒祭抵仔明白，看啊，撒母耳到啦。掃羅出去迎接伊，欲給伊請安。

11

(THR) Sat-bó͘-jíⁿ kóng, Lí chòe sím-mı̍h tāi ah? Sò-lô kóng, In-ūi góa khòaⁿ-kìⁿ peh-sìⁿ sì-sòaⁿ lī-khui góa, lí iā bô chiàu só͘ tiāⁿ-tio̍h ê jı̍t-kî kàu, koh Hui-lī-sū lâng í-keng chū-chı̍p tī Bı̍t-bo̍at;

(BCL) 撒母耳講：「你做甚麼代啊？」掃羅講：「因為我看見百姓四散離開我，你也無照所定著的日期到，閣非利士人已經聚集佇密抹。

12

(THR) só͘-í góa kóng, Hui-lī-sū lâng beh kàu Kiat-kah kong-kek góa, iā góa iáu-bē kiû Iâ-hô-hoa si-un, góa chiū bián-kióng hiàn sio-chè.

(BCL) 所以我講：非利士人欲到吉甲攻擊我，也我猶未求耶和華施恩，我就勉強獻燒祭。」

13

(THR) Sat-bó͘-jíⁿ tùi Sò-lô kóng, Lí chòe gōng-sū lah, in-ūi lí bô chun-siú Iâ-hô-hoa lí Siōng-tè só͘ bēng-lēng lí ê kài-bēng; beh sī ū siú, Iâ-hô-hoa chiū kian-kò͘ lí ê ông-ūi tī Í-sek-lia̍t tiong kàu éng-óan.

(BCL) 撒母耳對掃羅講：「你做戇事啦，因為你無遵守耶和華──你上帝所命令你的誡命。欲是有守，耶和華就堅固你的王位，佇以色列中到永遠。

14

(THR) Taⁿ lí ê ông-ūi bô kú-tn̂g; Iâ-hô-hoa í-keng chhē-tio̍h ha̍p I ê sim-ì ê chı̍t-lâng; koh Iâ-hô-hoa iā tiāⁿ-tio̍h i chòe I ê peh-sìⁿ ê thâu, in-ūi lí bô chun-siú Iâ-hô-hoa só͘ bēng-lēng lí ê.

(BCL) 今你的王位無久長。耶和華已經尋著合伊的心意的一人，閣耶和華也定著伊做伊的百姓的頭，因為你無遵守耶和華所命令你的。」

15

(THR) Sat-bó͘-jíⁿ chiū khí-lâi, tùi Kiat-kah chiūⁿ-khì Piān-ngá-bín ê Ki-pí-a. Sò-lô tiám-sǹg tè i ê lâng, iok-lio̍k ū la̍k-pah lâng.

(BCL) 撒母耳就起來，對吉甲上去便雅憫的基比亞。掃羅點算隨伊的人，約略有六百人。

16

(THR) Sò-lô kap i ê kiáⁿ Iok-ná-tan, kap tè in ê lâng, lóng tiàm tī Piān-ngá-bín ê Ka-pa. Chóng-sī Hui-lī-sū lâng chat-iâⁿ tī Bı̍t-bo̍at;

(BCL) 掃羅及伊的子約拿單，及隨的人，攏踮佇便雅憫的迦巴；總是非利士人紮營佇密抹。

17

(THR) Ū chhiúⁿ-kiap-ê tùi Hui-lī-sū ê kun-iâⁿ-tiong chhut-lâi, pun-chòe saⁿ tūi; chı̍t-tūi oat tùi Gô-hut-la̍h ê lō͘, kàu Su-a ê tōe khì;

(BCL) 有搶劫的對非利士的軍營中出來，分做三隊：一隊越對俄弗拉的路到書亞的地去，

18

(THR) koh chı̍t-tūi oat tùi Pek-hô-lûn ê lō͘ khì; koh chı̍t-tūi oat tùi Sé-pho-im ê soaⁿ-kok tùi-bīn tōe-kài ê lō͘, ǹg khòng-iá khì.

(BCL) 閣一隊越對伯和崙的路去，閣一隊越對洗波音的山谷對面地界的路，向曠野去。

19

(THR) Hit-sî Í-sek-lia̍t chôan-tōe bô chı̍t ê phah-thih sai-hū, in-ūi Hui-lī-sū lâng kóng, Kiaⁿ-liáu Hi-pek-lâi lâng chè-chō kiàm kap chhiuⁿ.

(BCL) 彼時，以色列全地無一個拍鐵師傅；因為非利士人講，驚了希伯來人製造劍及槍。

20

(THR) Í-sek-lia̍t lâng beh bôa-lāi i ê lôe, pē, pó͘-thâu, tî-thâu, ta̍k-lâng tio̍h lo̍h-khì Hui-lī-sū lâng hia;

(BCL) 以色列人欲磨利伊的犁、耙、斧頭、鋤頭，逐人著落去非利士人遐。

21

(THR) nā beh lòe tî-thâu, lôe, saⁿ-khí ê chhe, pó͘-thâu, kap kóaⁿ-gû ê thih-chhì, tio̍h chı̍t-pim ê kang-chîⁿ;

(BCL) 若欲鑢鋤頭、犁、三齒的叉、斧頭，及趕牛的鐵刺，著一賓的工錢。

22

(THR) só͘-í kàu kau-chiàn ê jı̍t, tè Sò-lô kap Iok-ná-tan ê lâng bô chı̍t-ê chhiú-nih ū kiàm ū chhiuⁿ ê; to̍k-to̍k Sò-lô kap i ê kiáⁿ Iok-ná-tan ū.

(BCL) 所以到交戰的日，隨掃羅及約拿單的人無一個手裡有劍有槍的，獨獨掃羅及伊的子約拿單有。

23

(THR) Hui-lī-sū hông-siú ê peng chhut-khì kàu Bı̍t-bo̍at ê ài-kháu.

(BCL) 非利士防守的兵出去到密抹的隘口。

Bible Color Mark

• 台語漢字羅馬本
• 巴克禮全羅