約翰二書 第 1 章

1

(THR) Chòe tiúⁿ-ló ê phoe kià hō͘ siū kéng-sóan chun-kùi ê hū-jîn-lâng kap i ê kiáⁿ-jî, sī góa tī chin-lí só͘ thiàⁿ ê; koh m̄ nā góa, kìⁿ-nā bat chin-lí ê iā lóng sī án-ni;

(BCL) 做長老的批寄互受揀選尊貴的婦仁人及伊的子兒，是我佇真理所疼的；閣呣若我，見若識真理的亦攏是按呢。

2

(THR) thiàⁿ lín sī ūi-tio̍h chin-lí, chit ê chin-lí chiū-sī tiàm tī lán ê, iā beh éng-óan kap lán tī-teh.

(BCL) 疼恁是為著真理，此個真理就是佇咱的，也欲永遠及咱佇。

3

(THR) Un-tián, lîn-bín, pêng-an, tùi Pē Siōng-tè, iā tùi Pē ê Kiáⁿ, Iâ-so͘ Ki-tok, tī chin-lí kap thiàⁿ-thàng, beh kap lán tī-teh.

(BCL) 恩典、憐憫、平安對父上帝，也對父的子耶穌基督佇真理及疼痛欲及咱佇！

4

(THR) Góa chin hoaⁿ-hí, in-ūi tù-tio̍h lí ê kiáⁿ-jî ū tī chin-lí lâi kiâⁿ ê, chiàu lán tùi Pē niá-siū ê bēng-lēng.

(BCL) 我真歡喜，因為抵著你的子兒有佇真理來行的，照咱對父領受的命令。

5

(THR) Chun-kùi ê hū-jîn-lâng ah, taⁿ góa kiû lí, m̄ sī chhin-chhiūⁿ siá sin ê bēng-lēng hō͘ lí, sī lán tùi khí-thâu só͘ ū ê, chiū-sī tāi-ke tio̍h saⁿ-thiàⁿ.

(BCL) 尊貴的婦仁人啊，今我求你，呣是親像寫新的命令互你，是咱對起頭所有的，就是大家著相疼。

6

(THR) Lán chiàu I ê bēng-lēng lâi kiâⁿ, che chiū-sī thiàⁿ. Lín thàn i lâi kiâⁿ, chiàu lín tùi khí-thâu só͘ thiaⁿ-kìⁿ ê, che chiū-sī hit ê bēng-lēng.

(BCL) 咱照伊的命令來行，這就是疼。恁趁伊來行照恁對起頭所聽見的，這就是彼個命令。

7

(THR) In-ūi ū chōe-chōe bê-he̍k lâng ê chhut-lâi jı̍p sè-kan, chiū-sī m̄ jīn Iâ-so͘ Ki-tok tī jio̍k-thé lâi ê. Chit-ê chiū-sī hit ê bê-he̍k lâng ê, iā sī tùi-te̍k Ki-tok ê.

(BCL) 因為有多多迷惑人的出來入世間，就是呣認耶穌基督佇肉體來的；此個就是彼個迷惑人的、也是對敵基督的。

8

(THR) Lín tio̍h kín-sīn ka-kī, bián-tit lín sit-lo̍h lán só͘ tio̍h-bôa ê, thang tit-tio̍h móa-chiok ê pò-siúⁿ.

(BCL) 恁著謹慎家己，免得恁失落咱所著磨的，通得著滿足的報賞。

9

(THR) Kìⁿ-nā chìn-chêng, iā bô tiàm tī Ki-tok ê kà-sī ê, bô ū Siōng-tè; tiàm tī hit ê kà-sī ê, chiū ū Pē kap Kiáⁿ.

(BCL) 見若進前也無佇基督的教示的，無有上帝；佇彼個教示的，就有父及子。

10

(THR) Nā ū lâng kàu lín hia, iā bô thôan chit ê kà-sī, chiū m̄ thang chiap-la̍p i jı̍p chhù, iā m̄ thang kā i chhéng-an;

(BCL) 若有人到恁遐，也無傳此個教示，就呣通接納伊入厝，也呣通給伊請安；

11

(THR) in-ūi kā i chhéng-an ê, ū hūn tī i ê pháiⁿ só͘ kiâⁿ.

(BCL) 因為給伊請安的，有份佇伊的歹所行。

12

(THR) Góa ū chōe-chōe hāng beh siá hō͘ lín, m̄ ài ēng chóa kap ba̍k; sī ǹg-bāng kàu lín hia, tng-bīn saⁿ-kap kóng, hō͘ lín ê hoaⁿ-hí chhiong-móa.

(BCL) 我有多多項欲寫互恁，呣愛用紙及墨，是向望到恁遐，當面相及講，互恁的歡喜充滿。

13

(THR) Lí siū kéng ê chí-bē ê kiáⁿ-jî lóng kā lí chhéng-an.

(BCL) 你受揀的姊妹的子兒攏給你請安。

Bible Color Mark

• 台語漢字羅馬本
• 巴克禮全羅