使徒行傳 第 1 章

1

(THR) Thê-o-hui-lô ah, góa í-keng chiong Iâ-so͘ tùi khí-thâu só͘ kiâⁿ só͘ kà-sī ê,

(BCL) 提阿非羅啊，我已經將耶穌對起頭所行所教示的，

2

(THR) tı̍t-kàu I thok-tiōng Sèng Sîn bēng-lēng só͘ kéng ê sù-tô͘ liáu-āu siū chih-chiap chiūⁿ thiⁿ ê jı̍t, ta̍k hāng kì-chài tī chêng ê chheh.

(BCL) 直到伊託仗聖神命令所揀的使徒了後，受接接上天的日，逐項記載佇前的冊。

3

(THR) I siū hāi liáu-āu, bat ēng chōe-chōe pîn-kù, tī sì-cha̍p jı̍t ê tiong-kan, chhut-hiān hō͘ sù-tô͘ khòaⁿ-kìⁿ, lâi hián-bêng I ka-kī sī o̍ah, sòa káng-lūn Siōng-tè kok ê sū.

(BCL) 伊受害了後，曾用多多憑據，佇四十日的中間，出現互使徒看見，來顯明伊家己是活，續講論上帝國的事。

4

(THR) I kap in chū-chı̍p ê sî, bēng-lēng in, kóng, M̄-thang lī-khui Iâ-lō͘-sat-léng, tio̍h thèng-hāu Pē só͘ èng-ún ê, chiū-sī lín bat tùi góa thiaⁿ-kìⁿ ê;

(BCL) 伊及聚集的時，命令，講：「呣通離開耶路撒冷，著聽候父所應允的，就是恁曾對我聽見的。

5

(THR) in-ūi Iok-hān ēng chúi kiâⁿ sóe-lé; to̍k-to̍k lín, koh bô kúi jı̍t, beh tī Sèng Sîn siū sóe.

(BCL) 因為約翰用水行洗禮，獨獨恁閣無幾日，欲佇聖神受洗。」

6

(THR) Án-ni in chū-chı̍p ê sî, mn̄g I, kóng, Chú ah, lí tī chit sî beh chiong kok ho̍k-tò hō͘ Í-sek-lia̍t mah?

(BCL) 按呢聚集的時，問伊講：「主啊，你佇此時欲將國復倒互以色列嗎？」

7

(THR) I chiū kā in kóng, Pē só͘ hē tī I ka-kī kôan-lāi ê sî kap kî m̄ sī lín só͘ thang chai.

(BCL) 伊就給講：「父所下佇伊家己權內的時及期，呣是恁所通知。

8

(THR) To̍k-to̍k Sèng Sîn lîm-kàu lín ê sî, lín beh tit-tio̍h châi-lêng; koh tī Iâ-lō͘-sat-léng, piàn Iû-thài, kap Sat-má-lī-a, tı̍t-kàu tōe ke̍k, beh chòe góa ê kan-chèng.

(BCL) 獨獨聖神臨到恁的時，恁欲得著才能，閣佇耶路撒冷、遍猶太，及撒瑪利亞，直到地極，欲做我的干證。」

9

(THR) Chiah ê ōe kóng liáu, in teh khòaⁿ ê sî, Iâ-so͘ siū kú-khí chiūⁿ thiⁿ; ū hûn chih-chiap I, in chiū khòaⁿ bōe kìⁿ.

(BCL) 諸個話講了，看的時，耶穌受舉起上天，有雲接接伊，就看見。

10

(THR) I khì ê sî, in ǹg thiⁿ chù-ba̍k khòaⁿ, hut-jiân ū nn̄g lâng chhēng pe̍h saⁿ, khiā tī sin-piⁿ;

(BCL) 伊去的時，向天注目看，忽然有二人穿白衫，徛佇身邊，

11

(THR) kóng, Ka-lī-lī lâng ah, siáⁿ-sū khiā-teh khòaⁿ thiⁿ? Chit ê Iâ-so͘ lī-pia̍t lín siū chih-chiap chiūⁿ thiⁿ, lín khòaⁿ I án-ni chiūⁿ thiⁿ, I ia̍h beh chiàu án-ni lâi.

(BCL) 講：「加利利人啊，啥事徛看天？此個耶穌離別恁受接接上天，恁看伊按呢上天，伊亦欲照按呢來。」

12

(THR) Hit sî in tùi hit ê miâ kiò Kaⁿ-ná ê soaⁿ tò-khì Iâ-lō͘-sat-léng, chit ê soaⁿ kūn Iâ-lō͘-sat-léng, saⁿ lī-khui ū an-hioh-jı̍t ê lō͘-chām.

(BCL) 彼時對彼個名叫橄欖的山，倒去耶路撒冷，此個山近耶路撒冷，相離開有安息日的路站。

13

(THR) Í-keng jı̍p, chiū chiūⁿ in só͘ tòa ê lâu-téng; ū Pí-tek, Iok-hān, Ngá-kok, An-tek-lia̍t, Hui-le̍k kap To-má, Pa-to-lô-mái kap Má-thài, A-le̍k-hui ê kiáⁿ Ngá-kok kap Se-lô-tí ê Se-bûn, kap Ngá-kok ê kiáⁿ Iû-tāi.

(BCL) 已經入，就上所住的樓頂；有彼得、約翰、雅各、安得烈、腓力、及多馬、巴多羅買、及馬太、亞勒腓的子雅各，及西羅底的西門，及雅各的子猶大。

14

(THR) Chiah ê lâng, kap kúi-nā ê hū-jîn-lâng, í-kı̍p Iâ-so͘ ê lāu-bú Má-lī-a, chham I ê hiaⁿ-tī, lóng tâng-sim choan-bū kî-tó.

(BCL) 諸個人及幾若個婦仁人以及耶穌的老母馬利亞，參伊的兄弟，攏同心專務祈禱。

15

(THR) Tong-sî tâng chū-chı̍p ê chèng lâng iok-lio̍k chı̍t-pah jī-cha̍p miâ, Pí-tek tī hiaⁿ-tī tiong khiā-khí lâi kóng,

(BCL) 當時，同聚集的眾人，約略一百二十名，彼得佇兄弟中徛起來，

16

(THR) Hiaⁿ-tī ah, Sèng Sîn chioh Tāi-pı̍t ê chhùi só͘ chhàm-gú chhōa lâng lia̍h Iâ-so͘ ê Iû-tāi ê, chit ê sèng-keng èng-giām sī eng-kai.

(BCL) 講：「兄弟啊，聖神借大衛的嘴，所讖語導人掠耶穌的猶大的，此個聖經應驗是應該。

17

(THR) In-ūi i bat kap góan tâng-lia̍t, koh tī chit ê kang ia̍h ū hūn.

(BCL) 因為伊曾及阮同列，閣佇此個工亦有份。

18

(THR) (Taⁿ chit lâng ēng i kiâⁿ put-gī só͘ tit-tio̍h ê kang-chîⁿ lâi bóe hn̂g; seng-khu phak-lo̍h-lâi, pak-tó͘ piak-lı̍h, tn̂g-á lóng lâu-chhut.

(BCL) 今此人用伊行不義所得著的工錢來買園，身軀仆落來，腹肚爆裂，腸仔攏流出。

19

(THR) Tiàm-tī Iâ-lō͘-sat-léng ê lâng lóng chai; só͘-í chiàu in ê khiuⁿ-kháu kiò hit khu hn̂g chòe A-kek-tāi-má, chiū-sī Huih-hn̂g )

(BCL) 佇耶路撒冷的人攏知，所以照的腔口叫彼區園做亞革大馬，就是「血園」。

20

(THR) In-ūi Si-phian kì-chài, kóng, Hō͘ i ê chhù pha-hng, Bô lâng tī hia khiā: koh kóng, I kàm-tok ê chit hō͘ pa̍t lâng tam-tng.

(BCL) 因為詩篇記載，講：互伊的厝拋荒，無人佇遐徛；閣講：伊監督的職互別人擔當。

21

(THR) Só͘-í Chú Iâ-so͘ tī lán tiong-kan chhut-jı̍p ê sî,

(BCL) 所以，主耶穌佇咱中間出入的時，

22

(THR) tùi Iok-hān kiâⁿ sóe-lé khí, kàu Iâ-so͘ lī-pia̍t lán siū chih-chiap ê jı̍t, só͘ ū siông-siông kap góan chòe-phōaⁿ ê lâng, tī in tiong-kan tio̍h ū chı̍t-ê kap góan saⁿ-kap chòe I koh-o̍ah ê kan-chèng.

(BCL) 對約翰行洗禮起，到耶穌離別咱受接接的日，所有常常及阮做伴的人，佇中間著有一個及阮相及做伊復活的干證。」

23

(THR) Tùi án-ni kú nn̄g lâng, chiū-sī Iok-sek, kiò chòe Pa-sat-pa, ia̍h miâ Iû-sū-to͘, koh chı̍t-ê sī Má-thê-a.

(BCL) 對按呢舉二人，就是約瑟叫做巴撒巴，亦名猶士都，閣一個是馬提亞。

24

(THR) Chiū kî-tó, kóng, Chú ah, lí sī bat chèng lâng ê sim ê, tī chit nn̄g lâng tiong chí-bêng tá-lo̍h chı̍t lâng sī lí só͘ kéng ê,

(BCL) 就祈禱講：「主啊，你是識眾人的心的，佇此二人中，指明叨落一人是你所揀的，

25

(THR) lâi ū hūn tī chit ê kang, kap sù-tô͘ ê chit, chiū-sī Iû-tāi só͘ lī-khui beh khì i ka-kī ê só͘-chāi ê.

(BCL) 來有份佇此個工及使徒的職。就是猶大所離開，欲去伊家己的所在的。」

26

(THR) Tùi án-ni kā in liam-khau; liam-tio̍h Má-thê-a; i chiū kap cha̍p-it ê sù-tô͘ tâng lia̍t.

(BCL) 對按呢給拈鬮，拈著馬提亞；伊就及十一個使徒同列。

Bible Color Mark

• 台語漢字羅馬本
• 巴克禮全羅