使徒行傳 第 5 章

1

(THR) Nā-sī ū chı̍t lâng miâ A-ná-nî-a, kap i ê bó͘ Sat-hui-lat, bōe i ê sán-gia̍p, chiong só͘ bōe ê gûn, àm-chīⁿ lâu kúi-nā hūn, i ê bó͘ iāh chai;

(BCL) 若是有一人，名亞拿尼亞，及伊的某撒非喇賣伊的產業，將所賣的銀，暗靜留幾若份，伊的某亦知，

2

(THR) kî-û ê tòa lâi hē tī sù-tô͘ ê kha-ē.

(BCL) 其餘的帶來下佇使徒的腳下。

3

(THR) Pí-tek kóng, A-ná-nî-a, siáⁿ-sū Sat-tàn chhiong-móa lí ê sim lâi phiàn Sèng Sîn, chiong bōe hn̂g ê gûn àm-chīⁿ lâu kúi-nā hūn?

(BCL) 彼得講：「亞拿尼亞！啥事撒但充滿你的心，來騙聖神，將賣園的銀暗靜留幾若份？

4

(THR) Hn̂g iáu-bē bōe, kiám m̄ sī lí ê? bōe liáu, hit ê gûn kiám m̄ sī lí chú-ì? Lí sim-lāi siáⁿ-sū siūⁿ-chhut chit ê tāi-chì ah? Lí m̄ sī phiàn lâng, chiū-sī phiàn Siōng-tè.

(BCL) 園猶未賣，豈呣是你的？賣了，彼個銀豈呣是你主意？你心內啥事想出此個代誌啊？你呣是騙人，就是騙上帝。」

5

(THR) A-ná-nî-a thiaⁿ-kìⁿ chiah ê ōe, chiū lek-lo̍h-khì, tn̄g khùi; thiaⁿ-kìⁿ ê lâng lóng tōa kiaⁿ.

(BCL) 亞拿尼亞聽見諸個話，就慄落去，斷氣；聽見的人攏大驚。

6

(THR) Chiah ê siàu-liân lâng khí-lâi, siu-sı̍p i ê sin-si, kng chhut-khì bâi-chòng.

(BCL) 諸個少年人起來，收拾伊的身屍，扛出去埋葬。

7

(THR) Iok-lio̍k kè saⁿ tiám cheng kú, i ê bó͘ ia̍h jı̍p-lâi, iáu-bē chai chit ê sū.

(BCL) 約略過三點鐘久，伊的某亦入來，猶未知此個事。

8

(THR) Pí-tek ìn i kóng, Lí kā góa kóng, lín bōe hn̂g ê kè-chîⁿ sī chiah chōe mah? Kóng, Tio̍h, sī chiah chōe.

(BCL) 彼得應伊講：「你給我講，恁賣園的價錢是即多嗎？」講：「著，是即多。」

9

(THR) Nā-sī Pí-tek tùi i kóng, Lín siáⁿ-sū tâng-sim lâi chhì Chú ê Sîn ah? Lí khòaⁿ, bâi-chòng lí ê tiōng-hu ê, in ê kha í-keng kàu mn̂g-kháu, ia̍h beh kng lí chhut-khì.

(BCL) 若是彼得對伊講：「恁啥事同心來試主的神啊？你看，埋葬你的丈夫的，的腳已經到門口，亦欲扛你出去。」

10

(THR) Hū-jîn-lâng chek-sî lek tī i ê kha-chêng, tn̄g khùi; hiah ê siàu-liân lâng jı̍p-lâi, khòaⁿ i í-keng sí, chiū kng i chhut-khì, bâi-chòng tī i tiōng-hu ê sin-piⁿ.

(BCL) 婦仁人即時慄佇伊的腳前，斷氣。許個少年人入來，看伊已經死，就扛伊出去，埋葬佇伊丈夫的身邊。

11

(THR) Chôan kàu-hōe kap kìⁿ-nā thiaⁿ-kìⁿ chiah ê tāi-chì ê, lóng tōa kiaⁿ.

(BCL) 全教會及見若聽見諸個代誌的攏大驚。

12

(THR) Tùi sù-tô͘ ê chhiú ū kiâⁿ chōe-chōe sîn-jiah kap kî-sū tī peh-sìⁿ ê tiong-kan; chèng lâng lóng tâng-sim chū-chı̍p tī Só͘-lô-bûn ê léng-lông.

(BCL) 對使徒的手有行多多神蹟及奇事佇百姓的中間；眾人攏同心聚集佇所羅門的兩廊。

13

(THR) Kî-û ê lâng bô chı̍t-ê káⁿ kūn-óa in; nā-sī peh-sìⁿ chun-tiōng in;

(BCL) 其餘的人無一個敢近倚，若是百姓尊重。

14

(THR) sìn lâi kui Chú ê lâng it-hoat ke-thiⁿ, lâm-lú lóng chin chōe;

(BCL) 信來歸主的人益發加添，男女攏真多。

15

(THR) sīm-chì ū kng pīⁿ-lâng kàu tī koe-lō͘, hē tī pho͘-á, ǹg-bāng Pí-tek keng-kè ê sî, in ū-ê ōe hō͘ i ê iáⁿ ìm-tio̍h.

(BCL) 甚至有扛病人到佇街路，下佇舖仔，向望彼得經過的時，有的會互伊的影蔭著。

16

(THR) Iáu ū chōe-chōe lâng tùi Iâ-lō͘-sat-léng sì-ûi ê siâⁿ lâi; chhōa pīⁿ-lâng kap hō͘ siâ-sîn só͘ khó͘-chhó͘ ê; in lóng tit-tio̍h i-hó.

(BCL) 猶有多多人對耶路撒冷四圍的城來，導病人及互邪神所苦楚的，攏得著醫好。

17

(THR) To̍k-to̍k chè-si-thâu, í-kı̍p lóng-chóng tâng--i ê lâng, (chiū-sī Sat-thó͘-kai tóng,) khiā-khí-lâi, móa-sim òan-tò͘,

(BCL) 獨獨祭司頭以及攏總同伊的人，就是撒都該黨，徛起來，滿心怨妒，

18

(THR) hē chhiú lia̍h sù-tô͘, koaiⁿ in tī kong ê kaⁿ.

(BCL) 下手掠使徒，關佇公的監。

19

(THR) Nā-sī Chú ê thiⁿ-sài mî-sî khui kaⁿ mn̂g, chhōa in chhut, kóng,

(BCL) 若是主的天使暝時開監門，導出，

20

(THR) Lín tio̍h khì khiā tī tiān-nı̍h, ēng chit ê O̍ah-miā ê ōe lóng tùi peh-sìⁿ kóng.

(BCL) 講：「恁著去徛佇殿裡，用此個活命的話攏對百姓講。」

21

(THR) In thiaⁿ-kìⁿ chiah ê ōe, thiⁿ phú-kng chiū jı̍p tiān lâi kà-sī. Chè-si-thâu kap tâng--i ê lâng kàu, chio-chı̍p kong-hōe, kap Í-sek-lia̍t peh-sìⁿ ê lāu-tōa, chhe lâng khì kaⁿ-nı̍h tòa in lâi.

(BCL) 聽見諸個話，天昲光就入殿來教示。祭司頭及同伊的人到，招集公會及以色列百姓的老大，差人去監裡帶來。

22

(THR) Gê-ia̍h kàu tè, chhē in bô tī kaⁿ-nı̍h; chiū tò-lâi pò, kóng,

(BCL) 衙役到地，尋無佇監裡，就倒來報講：

23

(THR) Góan khòaⁿ-kìⁿ kaⁿ koaiⁿ kàu chin kian-kò͘, kò͘-siú ê lâng khiā tī ta̍k ê mn̂g-kháu; kàu khui ê sî, chhē bô lâng tī lāi-bīn.

(BCL) 「阮看見監關到真堅固，顧守的人徛佇逐個門口；到開的時，尋無人佇內面。」

24

(THR) Tiān-si kap chiah ê chè-si-thâu thiaⁿ-kìⁿ chiah ê ōe, chiū ūi-tio̍h in tōa tiû-tû, m̄ chai chit ê sū beh cháiⁿ-iūⁿ.

(BCL) 殿司及諸個祭司頭聽見諸個話，就為著大躊躇，呣知此個事欲怎樣。

25

(THR) Ū chı̍t lâng lâi pò in kóng, Lín só͘ koaiⁿ tī kaⁿ-nı̍h ê lâng hiān-chāi khiā tī tiān-nı̍h kà-sī peh-sìⁿ.

(BCL) 有一人來報講：「恁所關佇監裡的人，現在徛佇殿裡教示百姓。」

26

(THR) Tiān-si kap gê-ia̍h chiū khì chhōa in lâi, m̄ káⁿ ēng kiông; in-ūi kiaⁿ peh-sìⁿ, kiaⁿ-liáu hō͘ in ēng chio̍h-thâu tìm.

(BCL) 殿司及衙役就去導來，呣敢用強，因為驚百姓，驚了互用石頭擲。

27

(THR) Chhōa lâi liáu, chiū hō͘ in khiā tī kong-hōe ê bīn-chêng. Chè-si-thâu mn̄g in, kóng,

(BCL) 導來了，就互徛佇公會的面前；祭司頭問，講：

28

(THR) Góan bat giâm-giâm kìm lín bo̍h-tit ēng chit ê miâ kà-sī lâng, lín chiū chiong lín ê kà-sī piàn thôan tī Iâ-lō͘-sat-léng, beh ēng chit lâng ê huih kui tī góan.

(BCL) 「阮曾嚴嚴禁恁，莫得用此個名教示人，恁就將恁的教示遍傳佇耶路撒冷，欲用此人的血歸佇阮！」

29

(THR) Pí-tek kap kî-û ê sù-tô͘ ìn, kóng, Sūn-thàn Siōng-tè khah kè-thâu tī sūn-thàn lâng, sī ha̍p-gî.

(BCL) 彼得及其餘的使徒應講：「順趁上帝卡過頭佇順趁人，是合宜。

30

(THR) Lín só͘ tiàu tī chhâ-nı̍h, lâi hāi-sí ê Iâ-so͘, lán lia̍t-chó͘ ê Siōng-tè í-keng hō͘ I koh-o̍ah.

(BCL) 恁所吊佇柴裡來害死的耶穌，咱列祖的上帝已經互伊復活。

31

(THR) Chit ê Iâ-so͘, Siōng-tè ēng ka-kī ê chiàⁿ chhiú kú-khí I chòe Jîn-kun, chòe Kiù-chú, beh chiong hóan-hóe kap sià-chōe siúⁿ-sù Í-sek-lia̍t peh-sìⁿ.

(BCL) 此個耶穌，上帝用家己的正手舉起伊，做人君，做救主，欲將反悔及赦罪賞賜以色列百姓。

32

(THR) Koh góan ūi-tio̍h chiah ê sū chòe kan-chèng; Siōng-tè só͘ siúⁿ-sù hō͘ sūn-thàn I ê lâng ê Sèng Sîn iā chòe kan-chèng.

(BCL) 閣阮為著諸個事做干證，上帝所賞賜互順趁伊的人的聖神也做干證。」

33

(THR) In thiaⁿ-liáu, chīn-chāi siū-khì, ài hāi-sí in.

(BCL) In聽了盡在受氣，愛害死in。

34

(THR) To̍k-to̍k ū chı̍t ê Hoat-lī-sài lâng, miâ ka-má-lia̍t, sī chèng peh-sìⁿ só͘ kèng-tiōng ê kàu-hoat-su, khí-lâi khiā tī kong-hōe tiong, hoan-hù hō͘ hiah ê lâng chiām-sî chhut-khì.

(BCL) 獨獨有一個法利賽人，名迦瑪列，是眾百姓所敬重的教法師，起來徛佇公會中，吩咐互許個人暫時出去，

35

(THR) Chiū tùi tāi-ke kóng, Í-sek-lia̍t lâng ah, lín tio̍h ka-kī kín-sīn, beh cháiⁿ-iūⁿ pān chiah ê lâng.

(BCL) 就對大家講：「以色列人啊，恁著家己謹慎，欲怎樣辦諸個人。

36

(THR) In-ūi chêng ū Tiu-tāi chhut-thâu, ka-kī khoa-kháu chòe tōa; óa i ê lâng iok-lio̍k sì pah; i siū thâi, tè i ê lâng sì-sòaⁿ, bô-lô-khì.

(BCL) 因為前有丟大出頭，家己誇口做大，倚伊的人約略四百，伊受thai，隨伊的人四散，無囉去。

37

(THR) Chit lâng í-āu chō ke-kah ê sî koh ū Ka-lī-lī ê Iû-tāi chhut-thâu ín-iú peh-sìⁿ thàn i; i iā bia̍t-bô, tè i ê lâng lóng sì-sòaⁿ.

(BCL) 此人以後，造家甲的時，閣有加利利的猶大出頭，引誘百姓趁伊；伊也滅無，隨伊的人攏四散。

38

(THR) Taⁿ góa kā lín kóng, Bo̍h-tit chhap chiah ê lâng, pàng kù-chāi in; in-ūi chit ê kè-bô͘, chit ê só͘ chòe, nā chhut tī lâng, tek-khak beh pāi-hōai;

(BCL) 今我給恁講，莫得插諸個人，放據在in！因為此個計謀、此個所做，若出佇人，的確欲敗壞；

39

(THR) nā chhut tī Siōng-tè, lín chiū bōe pāi-hōai in; koh kiaⁿ-liáu lín iā sī kap Siōng-tè kau-chiàn.

(BCL) 若出佇上帝，恁就boe敗壞in，閣驚了恁也是及上帝交戰。」

40

(THR) In chiū thàn i; tiàu sù-tô͘ lâi phah in, bēng-lēng in bo̍h-tit ēng Iâ-so͘ ê miâ lâi kóng, chiū pàng in.

(BCL) In就趁伊，召使徒來，拍in，命令in莫得用耶穌的名來講，就放in。

41

(THR) Sù-tô͘ lī-khui kong-hōe chêng, lóng hoaⁿ-hí, sī in-ūi in tit-tio̍h khòaⁿ-chòe ōe kham-tit ūi-tio̍h chit ê Miâ siū lêng-jio̍k.

(BCL) 使徒離開公會前，攏歡喜，是因為in得著看做會堪得為著此個名受凌辱。

42

(THR) Chiū tī tiān-nı̍h, tī jîn-ke, kà-sī lâng, thôan Iâ-so͘ chòe Ki-tok, ta̍k jı̍t bô soah.

(BCL) 就佇殿裡、佇人家教示人，傳耶穌做基督，逐日無息。

Bible Color Mark

• 台語漢字羅馬本
• 巴克禮全羅