使徒行傳 第 6 章

1

(THR) Tng hit sî, ha̍k-seng ke-thiⁿ chōe-chōe, ū kóng Hi-lī-nî ōe ê Iû-thài lâng, tùi Hi-pek-lâi lâng chhut òan-giân, in-ūi ta̍k jı̍t ê kiong-kip, bô kò͘-tio̍h in ê kóaⁿ-hū.

(BCL) 當彼時，學生加添多多，有講希利尼話的猶太人對希伯來人出怨言，因為逐日的供給無顧著in的寡婦。

2

(THR) Cha̍p-jī ê sù-tô͘ kiò chèng ha̍k-seng lâi tùi in kóng, Góan chiong Siōng-tè ê tō-lí pàng-hē teh, lâi pān-lí chia̍h-sı̍t, m̄ ha̍p-gî.

(BCL) 十二個使徒叫眾學生來，對in講：「阮將上帝的道理放下teh來辦理食食，呣合宜。

3

(THR) Só͘-í hiaⁿ-tī ah, tio̍h tùi lín tiong-kan kéng ū hó miâ-siaⁿ, siū Sîn kap tì-hūi chhiong-móa ê, chhit lâng, góan chiū siat-lı̍p in kóan-lí chit ê sū.

(BCL) 所以兄弟啊，著對恁中間揀有好名聲、受神，及智慧充滿的七人，阮就設立in管理此個事。

4

(THR) Góan beh choan-bū kî-tó, thôan-tō.

(BCL) 阮欲專務祈禱、傳道。」

5

(THR) Chèng lâng hoaⁿ-hí chit ê ōe; chiū kéng Sū-thê-hóan, i sī ū sìn kap Sèng Sîn móa-móa ê lâng, koh kéng Hui-le̍k, Pek-lô-ko-lô, Nî-ka-ná, Thê-bûn, Pa-bí-ná, kap bat jı̍p Iû-thài kàu ê An-thê-o lâng Nî-ko-lah;

(BCL) 眾人歡喜此個話，就揀司提反，伊是有信及聖神滿滿的人，閣揀腓利、伯羅哥羅、尼迦挪、提門、巴米拿，及曾入猶太教的安提阿人尼哥拉，

6

(THR) hō͘ in khiā tī sù-tô͘ ê bīn-chêng; chiū kî-tó, kā in hōaⁿ chhiú.

(BCL) 互in徛佇使徒的面前。就祈禱，給in按手。

7

(THR) Siōng-tè ê tō-lí ná heng-ōng; tī Iâ-lō͘-sat-léng ha̍k-seng ê siàu-gia̍h ke-thiⁿ chin chōe; chè-si sūn-ho̍k tī hok-im ia̍h chōe-chōe.

(BCL) 上帝的道理愈興旺；佇耶路撒冷學生的數額加添真多，祭司順服佇福音亦多多。

8

(THR) Sū-thê-hóan siū un-tián kap châi-lêng móa-móa, kiâⁿ tōa ê kî-sū sîn-jiah tī peh-sìⁿ ê tiong-kan.

(BCL) 司提反受恩典及才能滿滿，行大的奇事神蹟佇百姓的中間。

9

(THR) Hit sî ū hōe-tn̂g kiò chòe Lī-pek-tē-ná ê, kap Kó͘-lī-nāi ê, A-le̍k-san-thài ê, í-kı̍p tùi Ki-lī-ka, A-se-a lâi ê, kúi-nā lâng khí-lâi kap Sū-thê-hóan piān-lūn,

(BCL) 彼時有會堂叫做利百地拿的、及古利奈的、亞歷山大的、以及對基利家、亞西亞來的幾若人，起來及司提反辯論。

10

(THR) Sū-thê-hóan ēng tì-hūi ēng Sîn lâi kóng, in bōe-ōe tí-tng.

(BCL) 司提反用智慧用神來講，會抵當，

11

(THR) Chiū ēng lâng chhut-lâi, kóng, Góan bat thiaⁿ-kìⁿ i kóng pòng-to̍k Mô͘-se kap Siōng-tè ê ōe.

(BCL) 就用人出來講：「阮曾聽見伊講謗瀆摩西及上帝的話。」

12

(THR) In koh kàu-so peh-sìⁿ, kap tiúⁿ-ló, kap keng-ha̍k-sū, hut-jiân kàu, lia̍h i, tòa kàu kong-hōe, kiò ké kan-chèng lâi, kóng,

(BCL) 閣教唆百姓、及長老、及經學士，忽然到，掠伊，帶到公會，

13

(THR) Chit lâng kóng-ōe kong-kek chit ê sèng ê só͘-chāi kap lu̍t-hoat bô soah;

(BCL) 叫假干證來，講：「此人講話攻擊此個聖的所在及律法無息。

14

(THR) in-ūi góan bat thiaⁿ-kìⁿ i kóng, Chit ê Ná-sat-le̍k lâng Iâ-so͘ beh húi-hōai chit ê só͘-chāi, iā beh kóe-ōaⁿ Mô͘-se só͘ thôan hō͘ lán ê kui-lē.

(BCL) 因為阮曾聽見伊講，此個拿撒勒人耶穌欲毀壞此個所在，也欲改換摩西所傳互咱的規例。」

15

(THR) Hit tia̍p chē tī kong-hōe tiong ê lâng, lóng chù-ba̍k khòaⁿ i, khòaⁿ i ê bīn chhin-chhiūⁿ thiⁿ-sài ê bīn.

(BCL) 彼霎坐佇公會中的人攏注目看伊，看伊的面，親像天使的面。

Bible Color Mark

• 台語漢字羅馬本
• 巴克禮全羅