申命記 第 16 章

1

(THR) Lí tio̍h chù-ì A-pit ge̍h, lâi siú Iâ-hô-hoa lí Siōng-tè ê pôaⁿ-kè-choeh; in-ūi Iâ-hô-hoa lí Siōng-tè tī A-pit ge̍h mî-sî chhōa lí chhut Ai-kı̍p.

(BCL) 「你著注意亞筆月，來守耶和華──你上帝的過節，因為耶和華──你上帝佇亞筆月暝時導你出埃及。

2

(THR) Lí tio̍h tī Iâ-hô-hoa só͘ beh kéng lâi an-tì I ê miâ ê só͘-chāi, tùi lí ê iûⁿ-kûn gû-kûn, ēng jû-o̍at-choeh ê cheng-siⁿ, hiàn-chè hō͘ Iâ-hô-hoa lí ê Siōng-tè.

(BCL) 你著佇耶和華所欲揀來安置伊的名的所在，對你的羊群牛群，用逾越節的精牲，獻祭互耶和華──你的上帝。

3

(THR) Lí m̄-thang ēng ū-kàⁿ ê piáⁿ chham teh chia̍h; chhit-jı̍t kú lí tio̍h ēng bô-kàⁿ ê piáⁿ chham teh chia̍h, chiū-sī khùn-khó͘ ê piáⁿ; beh hō͘ lí it-seng ê jı̍t kì-tit lí chhut Ai-kı̍p tōe ê jı̍t; in-ūi lí chhut Ai-kı̍p tōe ê sî chin kóaⁿ-kín.

(BCL) 你呣通用有酵的餅參食；七日久你著用無酵的餅參食，就是困苦的餅──欲互你一生的日記得你出埃及地的日──因為你出埃及地的時真趕緊。

4

(THR) Tī lí ê sì-kéng-lāi, chhit-jı̍t kú lóng m̄-thang khòaⁿ-kìⁿ kàⁿ; thâu-chı̍t-jı̍t ê-hng só͘ hiàn ê chè-bah, m̄-thang lâu chı̍t-tiám-á kàu thiⁿ-kng.

(BCL) 佇你的四境內，七日久攏呣通看見酵，頭一日下昏所獻的祭肉，呣通留一點仔到天光。

5

(THR) Tī Iâ-hô-hoa lí Siōng-tè só͘ siúⁿ-sù hiah ê siâⁿ-mn̂g-lāi lí m̄-thang hiàn pôaⁿ-kè-choeh ê chè.

(BCL) 佇耶和華──你上帝所賞賜許個城門內，你呣通獻過節的祭；

6

(THR) To̍k-to̍k tio̍h tī Iâ-hô-hoa lí Siōng-tè só͘ beh kéng chòe an-tì I ê miâ ê só͘-chāi, kàu ê-hng jı̍t-lo̍h ê sî, chiū-sī lí chhut Ai-kı̍p ê sî, tio̍h hiàn pôaⁿ-kè-choeh ê chè;

(BCL) 獨獨著佇耶和華──你上帝所欲揀做安置伊的名的所在，到下昏日落的時，就是你出埃及的時，著獻過節的祭。

7

(THR) tio̍h tī Iâ-hô-hoa lí Siōng-tè só͘ beh kéng ê só͘-chāi, pek lâi chia̍h i; keh chá-khí lí o̍at-tò-khì lí ê pò͘-pîⁿ.

(BCL) 著佇耶和華──你上帝所欲揀的所在來食伊，隔早起你越倒去你的布棚。

8

(THR) Lí tio̍h chia̍h bô-kàⁿ-piáⁿ la̍k-jı̍t; tē-chhit jı̍t lí tio̍h siú Iâ-hô-hoa lí Siōng-tè ê giâm-siok-hōe; lóng m̄-thang chòe-kang.

(BCL) 你著食無酵餅六日，第七日你著守耶和華──你上帝的嚴肅會，攏呣通做工。」

9

(THR) Lí tio̍h ūi ka-kī sǹg chhit ê chhit-jı̍t; tùi lí khí-thâu ēng liâm-á koah ngó͘-kok ê sî, chiū sǹg chhit ê chhit-jı̍t.

(BCL) 「你著為家己算七個七日：對你起頭用鐮仔割五穀的時，就算七個七日。

10

(THR) Lí tio̍h tī Iâ-hô-hoa lí Siōng-tè ê bīn-chêng siú chhit-chhit-jı̍t-choeh; chiong lí ê chhiú ê lé-mı̍h hōng-hiàn, sī chiàu lí ê sim só͘ gōan-ê, iā chiàu Iâ-hô-hoa lí ê Siōng-tè sù-hok lí ê.

(BCL) 你著佇耶和華──你上帝的面前守七七日節，將你的手的禮物奉獻，是照你的心所願的，也照耶和華──你的上帝賜福你的。

11

(THR) Lí kap lí ê kiáⁿ, cha-bó͘-kiáⁿ, lô͘-po̍k, lú-pī, kap tiàm tī lí siâⁿ-mn̂g-lāi ê Lī-bī lâng, í-kı̍p tī lín tiong-kan kià-kha-ê, kap ko͘-jî, kóaⁿ-hū, lóng tio̍h tī Iâ-hô-hoa lí ê Siōng-tè só͘ beh kéng an-tì I ê miâ ê só͘-chāi, tī Iâ-hô-hoa lí Siōng-tè ê bīn-chêng hoaⁿ-hí.

(BCL) 你及你的子、查某子、奴僕、女婢，及踮佇你城門內的利未人，以及佇恁中間寄腳的及孤兒寡婦，攏著佇耶和華──你的上帝所欲揀安置伊的名的所在，佇耶和華──你上帝的面前歡喜。

12

(THR) Lí tio̍h kì-tit lí tī Ai-kı̍p bat chòe lô͘-châi; lí tio̍h chip-siú lâi kiâⁿ chiah ê lu̍t-lē.

(BCL) 你著記得你佇埃及曾做奴才。你著執守來行諸個律例。」

13

(THR) Gō͘-kak-tiûⁿ kap chiú-khut só͘ chhut ê, lí siu-khǹg liáu-āu, tio̍h siú tah chháu-liâu-á choeh chhit-jı̍t;

(BCL) 「五穀場及酒窟所出的，你收囥了後，著守搭草寮仔節七日。

14

(THR) siú choeh ê sî, lí kap lí ê kiáⁿ, cha-bó͘-kiáⁿ, lô͘-po̍k, lú-pī, kap tiàm tī lí siâⁿ-mn̂g-lāi ê Lī-bī lâng, í-kı̍p kià-kha-ê, kap ko͘-jî, kóaⁿ-hū, lóng tio̍h hoaⁿ-hí.

(BCL) 守節的時，你及你的子、查某子、奴僕、女婢，及踮佇你城門內的利未人，以及寄腳的及孤兒寡婦，攏著歡喜。

15

(THR) Tī Iâ-hô-hoa só͘ beh kéng ê só͘-chāi, lí tio̍h siú Iâ-hô-hoa lí ê Siōng-tè ê choeh chhit-jı̍t; in-ūi Iâ-hô-hoa lí ê Siōng-tè tī lí it-chhè ê bu̍t-sán, kap lí ê chhiú it-chhè só͘ chòe ê, beh sù-hok lí, lí chiū chin tōa hoaⁿ-hí.

(BCL) 佇耶和華所欲揀的所在，你著守耶和華──你的上帝的節七日；因為耶和華──你的上帝佇你一切的物產及你的手一切所做的欲賜福你，你就真大歡喜。

16

(THR) Lí it-chhè ê ta-po͘-teng, tio̍h tī tû-kàⁿ-choeh, chhit-chhit-choeh, tah-liâu-á choeh, chı̍t-nî saⁿ-pái, lóng kàu Iâ-hô-hoa lí Siōng-tè ê bīn-chêng, tī I só͘ beh kéng ê só͘-chāi; iā m̄-thang khang-chhiú kàu Iâ-hô-hoa ê bīn-chêng;

(BCL) 你一切的查甫丁著佇除酵節、七七節、搭寮仔節，一年三擺，攏到耶和華──你上帝的面前，佇伊所欲揀的所在，也呣通空手到耶和華的面前。

17

(THR) ta̍k-lâng tio̍h chiàu i ê khùi-la̍t lâi hiàn, chiū-sī chiàu Iâ-hô-hoa lí Siōng-tè só͘ siúⁿ-sù lí ê hok-hūn.

(BCL) 逐人著照伊的氣力來獻，就是照耶和華──你上帝所賞賜你的福份。」

18

(THR) Lí tio̍h tī Iâ-hô-hoa lí ê Siōng-tè só͘ siúⁿ-sù ta̍k ê siâⁿ-mn̂g-lāi, chiàu lí hiah ê chi-phài, ūi ka-kī siat-lı̍p sím-phòaⁿ-koaⁿ kap koaⁿ-tiúⁿ; in tio̍h chiàu kong-gī ê phòaⁿ-tòan, lâi sím-phòaⁿ peh-sìⁿ.

(BCL) 「你著佇耶和華──你的上帝所賞賜逐個城門內，照你許個支派為家己設立審判官及官長。著照公義的判斷來審判百姓。

19

(THR) Lí ê sím-phòaⁿ m̄-thang oan-óng, m̄-thang khòaⁿ lâng ê gōa-māu, iā m̄-thang siū pò͘-lō͘; in-ūi pò͘-lō͘ ōe hō͘ tì-hūi ê lâng ba̍k-chiu chhiⁿ-mî, koh ōe hō͘ gī-lâng ê ōe péng-tò-tńg.

(BCL) 你的審判呣通冤枉；呣通看人的外貌。也呣通受賄賂；因為賄賂會互智慧的人目睭睛暝，閣會互義人的話反倒轉。

20

(THR) Lí tio̍h tui-jip chì-kong chì-gī, hō͘ lí ōe o̍ah, sêng-chiap Iâ-hô-hoa lí Siōng-tè só͘ siúⁿ-sù lí ê tōe.

(BCL) 你著追至公至義，互你會活，承接耶和華──你上帝所賞賜你的地。

21

(THR) Lí ūi ka-kī só͘ khí Iâ-hô-hoa lí Siōng-tè ê tôaⁿ, m̄-thang tī hit piⁿ-á chai sím-mı̍h chhiū-ba̍k, chòe A-sià-la̍h;

(BCL) 「你為家己所起耶和華──你上帝的壇，呣通佇彼邊仔栽甚麼樹木做亞舍拉。

22

(THR) iā m̄-thang ūi ka-kī chhāi tiau-khek ê thiāu; che sī Iâ-hô-hoa lí ê Siōng-tè só͘ òan-hūn ê.

(BCL) 也呣通為家己祀雕刻的柱；這是耶和華──你的上帝所怨恨的。」

Bible Color Mark

• 台語漢字羅馬本
• 巴克禮全羅