以斯帖記 第 8 章

1

(THR) Tng hit-jı̍t A-hap-sûi-ló͘ ông chiong Iû-tāi lâng ê tùi-te̍k Hap-bān ê ke-sán siúⁿ-sù ông-hō͘ Í-su-thiap. Bo̍k-tí-kái iā lâi ông ê bīn-chêng, in-ūi Í-su-thiap í-keng kā ông kóng, Bo̍k-tí-kái sī i ê sím-mı̍h chhin.

(BCL) 當彼日，亞哈隨魯王將猶大人的對敵哈曼的家產賞賜王后以斯帖。末底改也來王的面前，因為以斯帖已經給王講，末底改是伊的甚麼親。

2

(THR) Ông pak ka-kī ê chhiú-chí lâi hō͘ Bo̍k-tí-kái, chiū-sī tùi Hap-bān the̍h tò-tńg-ê; Í-su-thiap koh siat-lı̍p Bo̍k-tí-kái lâi kóan-lí Hap-bān ê ke-sán.

(BCL) 王剝家己的手指來互末底改，就是對哈曼提倒轉的。以斯帖閣設立末底改來管理哈曼的家產。

3

(THR) Í-su-thiap koh kóng tī ông ê bīn-chêng, phak tī i ê kha-ē, lâu ba̍k-sái, kiû i tû A-kah cho̍k Hap-bān ê hām-hāi, í-kı̍p i bô͘-hāi Iû-tāi lâng ê kè-bô͘.

(BCL) 以斯帖閣講佇王的面前，仆佇伊的腳下，流目屎，求伊除亞甲族哈曼的陷害以及伊謀害猶大人的計謀。

4

(THR) Ông ǹg Í-su-thiap kia̍h-khí i kim ê kóaiⁿ-á, Í-su-thiap chiū khí-lâi khiā tī ông ê bīn-chêng, kóng,

(BCL) 王向以斯帖抬起伊金的枴仔；以斯帖就起來，徛佇王的面前，

5

(THR) Ông nā lia̍h-chòe hó, góa nā tit-tio̍h un-tián tī ông ê ba̍k-chiu-chêng, ông lia̍h chit ê sū chòe tio̍h, góa nā tit-tio̍h hoaⁿ-hí tī ông ê ba̍k-chiu chêng, chiū khún-kiû chhut-chiàu, chhú-siau A-kah cho̍k Hap-bí-tāi-tha ê kiáⁿ Hap-bān só͘ kè-bô͘ ê chiàu, chiū-sī i só͘ siá beh bia̍t ông ta̍k-séng ê Iû-tāi lâng ê;

(BCL) 講：「王若掠做好，我若得著恩典佇王的目睭前，王掠此個事做著，我若得著歡喜佇王的目睭前，就懇求出詔，取消亞甲族哈米大他的子哈曼所計謀的詔，就是伊所寫欲滅王逐省的猶大人的。

6

(THR) in-ūi góa thái ōe jím-tit khòaⁿ-kìⁿ ka-kī ê peh-sìⁿ siū hām-hāi? thái-ōe jím--tit khòaⁿ ka-kī ê chong-cho̍k siū bia̍t ah?

(BCL) 因為我豈會忍得看見家己的百姓受陷害？豈會忍得看家己的宗族受滅啊？」

7

(THR) A-hap-sûi-ló͘ ông chiū kā ông-hō͘ Í-su-thiap kap Iû-tāi lâng Bo̍k-tí-kái kóng, In-ūi Hap-bān bô͘-hāi Iû-tāi lâng, góa í-keng chiong i ê ke-sán hō͘ Í-su-thiap, lâng iā chiong Hap-bān tiàu tī chhâ-kè-téng.

(BCL) 亞哈隨魯王就給王后以斯帖及猶大人末底改講：「因為哈曼謀害猶大人，我已經將伊的家產互以斯帖，人也將哈曼吊佇柴架頂。

8

(THR) Lín iā thang ēng ông ê miâ chiàu lín ê ì-sù, siá jū-chí hō͘ Iû-tāi lâng, ēng ông ê chhiú-chí khàm-ìn. In-ūi kìⁿ-nā ēng ông ê miâ lâi siá ê, ēng ông ê chhiú-chí khàm-ìn ê chiàu, bô lâng ōe chhú-siau i.

(BCL) 恁也通用王的名照恁的意思寫諭旨互猶大人，用王的手指蓋印；因為見若用王的名來寫的，用王的手指蓋印的詔，無人會取消伊。」

9

(THR) Tē-saⁿ ge̍h, chiū-sī Se-oan ge̍h, jī-cha̍p-saⁿ jı̍t, hit-sî tiàu ông ê su-kì lâi, chiàu Bo̍k-tí-kái it-chhè só͘ bēng-lēng ê, chhut-chiàu hō͘ Iû-tāi lâng, iā kàu tī jîn-sîn, kap ta̍k-séng ê chóng-tok, siú-léng, chiū-sī tùi Ìn-tō͘ kàu Kó͘-sı̍t, kiōng chı̍t-pah jī-cha̍p-chhit séng, kàu tī ta̍k-séng chiàu in ê bûn-jī, kàu ta̍k-cho̍k ê peh-sìⁿ chiàu in ê khiuⁿ-kháu, kàu Iû-tāi lâng chiàu in ê bûn-jī, chiàu in ê khiuⁿ-kháu.

(BCL) 第三月，就是西彎月二十三日，彼時召王的書記來，照末底改一切所命令的，出詔互猶大人，也到佇人臣及逐省的總督、首領，就是對印度到古實共一百二十七省，到佇逐省照的文字，到逐族的百姓照的腔口，到猶大人照的文字、照的腔口。

10

(THR) Bo̍k-tí-kái ēng A-hap-sûi-ló͘ ông ê miâ siá jū-chí, ēng ông ê chhiú-chí khàm-ìn, chiong hit ê chiàu kau tī khiâ-bé ê cháu-bûn-su-ê, in khiâ ông ê bé-tiâu só͘ siⁿ ê, kok-lāi kong-sū ēng ê hó-bé, lâi thôan i;

(BCL) 末底改用亞哈隨魯王的名寫諭旨，用王的手指蓋印，將彼個詔交佇騎馬的走文書者，騎王的馬　所生的，國內公事用的好馬，來傳伊。

11

(THR) tī jū-chí ê lāi-bīn ông chún tī ta̍k ê siâⁿ ê Iû-tāi lâng chū-chı̍p, khí-lâi pó-hō͘ ka-kī ê sìⁿ-miā, kìⁿ-nā ta̍k-séng ê peng kap peh-sìⁿ beh kong-kek in ê, in thang châu-bia̍t in, thâi-sí in, hō͘ in sí-bô, kap in ê gín-ná, hū-jîn-lâng, chhiúⁿ in ê hè-châi chòe chong-bu̍t;

(BCL) 佇諭旨的內面，王准佇逐個城的猶大人聚集，起來保護家己的生命，見若逐省的兵及百姓欲攻擊的，通剿滅死互死無及的囝仔婦仁人，搶的貨財做贓物。

12

(THR) tī A-hap-sûi-ló͘ ông ê ta̍k-séng, tī cha̍p-jī ge̍h, chiū-sī A-ta̍t ge̍h cha̍p-saⁿ jı̍t, hit chı̍t jı̍t ê lāi-bīn thang án-ni chòe.

(BCL) 佇亞哈隨魯王的逐省，佇十二月，就是亞達月十三日，彼一日的內面通按呢做。

13

(THR) Chhau-siá hit ê jū-chí pan-hêng ta̍k-séng, pò-kò ta̍k-cho̍k, hō͘ Iû-tāi lâng pī-pān thèng-hāu hit-jı̍t, tùi i ê tùi-te̍k lâi pò-siû.

(BCL) 抄寫彼個諭旨，頒行逐省，報告逐族，互猶大人備辦聽候彼日，對伊的對敵來報仇。

14

(THR) Hiah ê cháu-bûn-su-ê hōng ông ê bēng-lēng chin pek-chhiat, khiâ kok-lāi kong-sū só͘ ēng ê khòai-bé, kín-kín khí-sin; chit ê chiàu iā pan-hêng Su-san kiong.

(BCL) 許個走文書者奉王的命令真迫切，騎國內公事所用的快馬緊緊起身，此個詔也頒行書珊宮。

15

(THR) Bo̍k-tí-kái chhēng lâm-sek pe̍h-sek ê tiâu-ho̍k, tì tōa-téng ê kim bián-liû, koh chhēng chí-sek iù-tōe-pò͘ ê gōa-ho̍k, tùi ông ê bīn-chêng chhut-lâi.

(BCL) 末底改穿藍色白色的朝服，戴大頂的金冕旒，閣穿紫色幼苧布的外服，對王的面前出來；書珊城的百姓攏出歡喜快樂的聲。

16

(THR) Su-san siâⁿ ê peh-sìⁿ lóng chhut hoaⁿ-hí khòai-lo̍k ê siaⁿ. Iû-tāi lâng ū êng-kng, hoaⁿ-hí, khòai-lo̍k, chun-kùi.

(BCL) 猶大人有榮光，歡喜快樂尊貴。

17

(THR) Ông ê jū-chí só͘ kàu ê ta̍k-séng ta̍k-siâⁿ, Iû-tāi lâng lóng hoaⁿ-hí khòai-lo̍k siat iân-sia̍h, lia̍h hit-jı̍t chòe hó-jı̍t. Hit só͘-chāi ê peh-sìⁿ in-ūi kiaⁿ Iû-tāi lâng, chōe-chōe jı̍p Iû-tāi che̍k.

(BCL) 王的諭旨所到的逐省逐城，猶大人攏歡喜快樂，設筵席，掠彼日做好日，彼所在的百姓，因為驚猶大人，多多入猶大籍。

Bible Color Mark

• 台語漢字羅馬本
• 巴克禮全羅