出埃及記 第 24 章

1

(THR) Iâ-hô-hoa kā Mô͘-se kóng, Lí kap A-lûn, Ná-tap, A-pí-hō͘, kap Í-sek-lia̍t tiúⁿ-ló-tiong chhit-cha̍p lâng, lóng tio̍h chiūⁿ kàu Iâ-hô-hoa chia, hn̄g-hn̄g phak-lo̍h-khì pài.

(BCL) 耶和華給摩西講：「你及亞倫、拿答、亞比戶，及以色列長老中七十人，攏著上到耶和華遮，遠遠仆落去拜。

2

(THR) To̍k-to̍k Mô͘-se thang chhin-kūn Iâ-hô-hoa, kî-û m̄-thang chhin-kūn; peh-sìⁿ iā m̄-thang kap i chiūⁿ-lâi.

(BCL) 獨獨摩西通親近耶和華；其餘呣通親近；百姓也呣通及伊上來。」

3

(THR) Mô͘-se kàu, chiong Iâ-hô-hoa it-chhè ê ōe, it-chhè ê hoat-tō͘, kóng hō͘ peh-sìⁿ thiaⁿ; chèng peh-sìⁿ tâng-siaⁿ ìn kóng, Iâ-hô-hoa só͘ kóng ê ōe, góan beh lóng chun-thàn.

(BCL) 摩西到，將耶和華一切的話一切的法度講互百姓聽。眾百姓同聲應講：「耶和華所講的話，阮欲攏遵趁。」

4

(THR) Mô͘-se chiong Iâ-hô-hoa ê ōe, lóng siá-khí-lâi; thàu-chá khí-lâi, tī soaⁿ-ē khí chı̍t chō tôaⁿ, chiàu Í-sek-lia̍t cha̍p-jī chi-phài, khiā cha̍p-jī ki thiāu.

(BCL) 摩西將耶和華的話攏寫起來。透早起來，佇山下起一座壇，照以色列十二支派　十二支柱，

5

(THR) Koh chhe Í-sek-lia̍t-tiong ê siàu-liân lâng, khì hiàn sio-chè. Iā ēng gû chòe pêng-an-chè, hiàn hō͘ Iâ-hô-hoa.

(BCL) 閣差以色列中的少年人去獻燒祭，也用牛做平安祭獻互耶和華。

6

(THR) Mô͘-se chiong huih ê chı̍t-pòaⁿ tóe tī phûn-nı̍h, chı̍t-pòaⁿ hiù tī tôaⁿ-nı̍h.

(BCL) 摩西將血的一半貯佇盆裡，一半灑佇壇裡；

7

(THR) Koh the̍h iok ê chheh, tha̍k hō͘ peh-sìⁿ thiaⁿ; in kóng, Iâ-hô-hoa só͘ kóng-ê, góan beh lóng chun-thàn lâi kiâⁿ.

(BCL) 閣提約的冊讀互百姓聽。講：「耶和華所講的，阮欲攏遵趁來行。」

8

(THR) Mô͘-se chiong huih hiù peh-sìⁿ, kóng, Khòaⁿ ah, che sī lı̍p-iok ê huih, sī Iâ-hô-hoa chiàu che it-chhè ê ōe kap lín só͘ lı̍p-ê.

(BCL) 摩西將血灑百姓，講：「看啊！這是立約的血，是耶和華照這一切的話及恁所立的。」

9

(THR) Mô͘-se, A-lûn, Ná-tap, A-pí-hō͘, kap Í-sek-lia̍t tiúⁿ-ló-tiong chhit-cha̍p-lâng, lóng chiūⁿ-khì.

(BCL) 摩西、亞倫、拿答、亞比戶，及以色列長老中七十人，攏上去。

10

(THR) In khòaⁿ-kìⁿ Í-sek-lia̍t ê Siōng-tè, I ê kha-ē ū chhin-chhiūⁿ pîⁿ-pho͘ ê lâm-pó-chio̍h, chhin-chhiūⁿ thiⁿ gôan-chit-ê kng-liāng.

(BCL) 看見以色列的上帝，伊的腳下有親像平舖的藍寶石，親像天原質的光亮。

11

(THR) I bô chhut-chhiú hāi Í-sek-lia̍t chun-kùi ê lâng; in khòaⁿ-kìⁿ Siōng-tè, in iā chia̍h iā lim.

(BCL) 伊無出手害以色列尊貴的人。看見上帝；也食也飲。

12

(THR) Iâ-hô-hoa kā Mô͘-se kóng, Lí chiūⁿ-soaⁿ chiū-kūn Góa, tiàm tī-chia, Góa beh chiong chio̍h-pi kap lu̍t-hoat, í-kı̍p kài-bēng, Góa só͘ siá-ê, siúⁿ-sù lí, thang kà-sī in.

(BCL) 耶和華給摩西講：「你上山就近我，踮佇遮，我欲將石碑及律法以及誠命，我所寫的賞賜你，通教示。」

13

(THR) Mô͘-se kap kun-sûi i ê Iok-su-a khí-lâi; Mô͘-se chiūⁿ Siōng-tè ê soaⁿ;

(BCL) 摩西及跟隨伊的約書亞起來，摩西上上帝的山。

14

(THR) kā tiúⁿ-ló kóng, Lín tiàm chia tán góan, thèng-hāu góan tò-tńg-lâi lín chia; khòaⁿ ah, A-lûn Hō͘-jíⁿ kap lín tī-teh; lâng nā ū tāi-chì, thang lâi chhē in.

(BCL) 給長老講：「恁踮遮等阮，聽候阮倒轉來恁遮，看啊，亞倫、戶珥及恁佇。人若有代誌，通來尋。」

15

(THR) Mô͘-se chiūⁿ soaⁿ, soaⁿ ū hûn jia-khàm.

(BCL) 摩西上山，山有雲遮蓋。

16

(THR) Iâ-hô-hoa ê êng-kng thêng tī Se-nái soaⁿ, hûn jia i la̍k-jı̍t kú; tē-chhit jı̍t I tùi hûn-tiong kiò Mô͘-se.

(BCL) 耶和華的榮光停佇西奈山；雲遮伊六日久，第七日伊對雲中叫摩西。

17

(THR) Iâ-hô-hoa êng-kng ê khóan-sit, chhin-chhiūⁿ hé sio tī soaⁿ-téng; Í-sek-lia̍t lâng chhin-ba̍k khòaⁿ-kìⁿ.

(BCL) 耶和華榮光的款式，親像火燒佇山頂，以色列人親目看見。

18

(THR) Mô͘-se jı̍p hûn-tiong chiūⁿ-soaⁿ; Mô͘-se tī soaⁿ-téng sì-cha̍p jı̍t sì-cha̍p-mî.

(BCL) 摩西入雲中上山，摩西佇山頂四十日四十暝。

Bible Color Mark

• 台語漢字羅馬本
• 巴克禮全羅