出埃及記 第 25 章

1

(THR) Iâ-hô-hoa kā Mô͘-se kóng,

(BCL) 耶和華給摩西講：

2

(THR) Lí kā Í-sek-lia̍t lâng kóng, Tio̍h hiàn lé-mı̍h hō͘ Góa; kìⁿ-nā sim só͘ kam-gōan-ê, lín thang kā i siu-lâi, chòe lé-mı̍h hō͘ Góa.

(BCL) 「你給以色列人講，著獻禮物互我；見若心所甘願的，恁通給伊收來做禮物互我。

3

(THR) Só͘ tio̍h siu ê lé-mı̍h, chiū-sī kim, gûn, tâng,

(BCL) 所著收的禮物：就是金、銀、銅、

4

(THR) lâm-sek, chí-sek, chu-âng-sek ê liāu, iù-tōe, soaⁿ-iûⁿ-mn̂g,

(BCL) 藍色、紫色、朱紅色的料，幼苧，山羊毛，

5

(THR) ní âng ê kang-iûⁿ-phê, hái-káu phê,

(BCL) 染紅的公羊皮，海狗皮，皂莢柴，

6

(THR) chō-kiap-chhâ, tiám teng ê iû, phang-phang ê phín-liāu, thang chòe ko-iû lâi boah, iā chòe phang-hiuⁿ,

(BCL) 點燈的油，芳芳的品料通做膏油來抹，也做芳香，

7

(THR) âng-bé-ló, kap pa̍t-iūⁿ ê pó-chio̍h, thang siuⁿ í-hut-tek kap pó͘-kòa.

(BCL) 紅瑪瑙及別樣的寶石，通鑲以弗得及補。

8

(THR) In tio̍h kā Góa khí sèng ê só͘-chāi, hō͘ Góa thang tiàm tī in tiong-kan.

(BCL) 著給我起聖的所在，互我通踮佇中間。

9

(THR) Chiàu Góa it-chhè só͘ chí-sī lí ê, chiū-sī hōe-bō͘ ê khóan-sit, kap lāi-tiong khì-kū khóan-sit, lín tio̍h chiàu án-ni lâi chō.

(BCL) 照我一切所指示你的，就是會幕的款式及內中器具款式，恁著照按呢來造。」

10

(THR) In tio̍h ēng chō-kiap-chhâ chòe chı̍t ê kūi, tn̂g nn̄g-tiú-pòaⁿ, khoah tiú-pòaⁿ, kôaiⁿ tiú-pòaⁿ.

(BCL) 「著用皂莢柴做一個櫃，長二肘半，闊肘半，高肘半。

11

(THR) Lí tio̍h ēng hó-kim pau, lāi-gōa lóng tio̍h pau; sì-ûi tio̍h khí kim-sòaⁿ.

(BCL) 你著用好金包，內外攏著包，四圍著齒金線。

12

(THR) Lí tio̍h kā i chù sì ê kim-khôan, an tī i ê sì-kha, chit-pêng nn̄g-khôan, hit-pêng nn̄g-khôan.

(BCL) 你著給伊鑄四個金環，安佇伊的四腳；此旁二環，彼旁二環。

13

(THR) Tio̍h ēng chō-kiap-chhâ chòe nn̄g ki kǹg, ēng kim pau i.

(BCL) 著用皂莢柴做二支槓，用金包伊。

14

(THR) Tio̍h chiong kǹg chhng tī kūi-piⁿ ê khôan-lāi, thang ēng lâi kng kūi;

(BCL) 著將槓串佇櫃邊的環內，通用來扛櫃。

15

(THR) chiah-ê kǹg tio̍h siông-siông tī kūi ê khôan-lāi, m̄-thang thiu-chhut-lâi.

(BCL) 諸個槓著常常佇櫃的環內，呣通抽出來。

16

(THR) Tio̍h ēng Góa só͘ beh siúⁿ-sù lí ê lu̍t-hoat hē tī kūi-lāi.

(BCL) 著用我所欲賞賜你的律法下佇櫃內。

17

(THR) Tio̍h ēng hó-kim chòe si-un-só͘, tn̂g nn̄g-tiú-pòaⁿ, khoah tiú-pòaⁿ.

(BCL) 著用好金做施恩所，長二肘半，闊肘半。

18

(THR) Tio̍h ēng kim chòe nn̄g ê ki-lō͘-peng, ēng phah ê hoat chòe-i, tī si-un-só͘ ê siang-thâu.

(BCL) 著用金做二個兵用拍的法做伊，佇施恩所的雙頭。

19

(THR) Chit-thâu chòe chı̍t ê ki-lō͘-peng, hit-thâu chòe chı̍t ê ki-lō͘-peng; siang-thâu ê ki-lō͘-peng, kap si-un-só͘, tio̍h kui-tè, chòe saⁿ-liân.

(BCL) 此頭做一個兵，彼頭做一個兵，雙頭的兵，及施恩所著歸塊做相連。

20

(THR) Nn̄g ê ki-lō͘-peng tio̍h kôaiⁿ-kôaiⁿ thí-khui sı̍t, ēng in ê sı̍t jia si-un-só͘; in ê bīn tio̍h saⁿ-tùi; ki-lō͘-peng ê bīn tio̍h àⁿ si-un-só͘.

(BCL) 二個兵著高高展開翅，用的翅遮施恩所。的面著相對，兵的面著俯施恩所。

21

(THR) Tio̍h chiong si-un-só͘ an tī kūi-téng, koh chiong Góa só͘ beh siúⁿ-sù lí ê lu̍t-hoat hē tī kūi-lāi.

(BCL) 著將施恩所安佇櫃頂，閣將我所欲賞賜你的律法下佇櫃內。

22

(THR) Góa beh tī-hia kap lí chū-hōe, koh beh tùi si-un-só͘ téng, chiū-sī tùi hoat-kūi téng, nn̄g ê ki-lō͘-peng ê tiong-kan, kap lí kóng Góa só͘ beh hoan-hù lí thôan hō͘ Í-sek-lia̍t lâng it-chhè ê sū.

(BCL) 我欲佇遐及你聚會，閣欲對施恩所頂就是對法櫃頂二個兵的中間，及你講我所欲吩咐你傳互以色列人一切的事。」

23

(THR) Lí tio̍h ēng chō-kiap-chhâ chòe chı̍t tè toh, tn̂g nn̄g-tiú, khoah chı̍t-tiú, kôaiⁿ tiú-pòaⁿ.

(BCL) 「你著用皂莢柴做一塊桌，長二肘，闊一肘，高肘半。

24

(THR) Tio̍h ēng hó-kim pau, sì-ûi khí kim-sòaⁿ.

(BCL) 著用好金包，四圍齒金線。

25

(THR) Toh ê sì-ûi, kok chòe chı̍t pa-chiúⁿ khoah ê hôaiⁿ-niû, hôaiⁿ-niû-téng sì-ûi khí kim-sòaⁿ.

(BCL) 桌的四圍，各做一巴掌闊的橫樑，橫樑頂四圍齒金線。

26

(THR) Lí tio̍h chòe sì ê kim-khôan, an tī i ê sì-kha ê sì-kak.

(BCL) 你著做四個金環，安佇伊的四腳的四角。

27

(THR) An khôan ê só͘-chāi tio̍h óa-kūn hôaiⁿ-niû, thang chhng-kǹg lâi kng toh.

(BCL) 安環的所在著倚近橫樑，通串槓來扛桌。

28

(THR) Tio̍h ēng chō-kiap-chhâ chòe nn̄g ki kǹg ēng kim pau-i, thang ēng lâi kng toh.

(BCL) 著用皂莢柴做二支槓，用金包伊，通用來扛桌。

29

(THR) Tio̍h chòe pôaⁿ, óaⁿ, poe, pân, thang lâi kòan-tiān, lóng tio̍h ēng hó-kim chòe.

(BCL) 著做盤、碗、杯、瓶通來灌奠；攏著用好金做。

30

(THR) Toh-téng siông-siông hē pâi-lia̍t ê piáⁿ tī Góa ê bīn-chêng.

(BCL) 桌頂常常下排列的餅，佇我的面前。」

31

(THR) Lí tio̍h ēng hó-kim chòe chı̍t ê teng-tâi; teng-tâi ê chō, kap tiong-thiāu, i ê poe, i ê ba̍k, i ê hoe, lóng ēng phah ê hoat, chòe kui-chō.

(BCL) 「你著用好金做一個燈台。燈台的座及中柱，伊的杯，伊的木，伊的花，攏用拍的法做歸座。

32

(THR) Tī i ê piⁿ-á tio̍h pun-chhut la̍k-ki; teng-tâi ê chit-pêng tio̍h ū saⁿ-ki, teng-tâi ê hit-pêng tio̍h ū saⁿ-ki.

(BCL) 佇伊的邊仔著分出六枝；燈台的此旁著有三枝，燈台的彼旁著有三枝。

33

(THR) Chit-pêng múi-ki ū saⁿ ê poe, khóan-sit chhin-chhiūⁿ hēng-hoe, ū ba̍k ū hoe; hit-pêng múi-ki iā ū saⁿ ê poe, khóan-sit chhin-chhiūⁿ hēng-hoe, ū ba̍k ū hoe; tùi teng-tâi pun-chhut ê la̍k-ki lóng sī án-ni.

(BCL) 此旁每枝有三個杯，款式親像杏花，有木、有花；彼旁每枝也有三個杯，款式親像杏花，有木，有花。對燈台分出的六枝攏是按呢。

34

(THR) Teng-tâi-thiāu ū sì ê poe, khóan-sit chhin-chhiūⁿ hēng-hoe, ū i ê ba̍k kap i ê hoe.

(BCL) 燈台柱有四個杯，款式親像杏花，有伊的木，及伊的花。

35

(THR) Nn̄g-ki ê ē-bīn ū chı̍t ba̍k kap i saⁿ-liân, koh nn̄g-ki ê ē-bīn ū chı̍t ba̍k kap i saⁿ-liân, koh nn̄g-ki ê ē-bīn ū chı̍t-ba̍k kap i saⁿ-liân; teng-tâi só͘ chhut ê la̍k-ki lóng sī án-ni.

(BCL) 二枝的下面有一木及伊相連。閣二枝的下面有一木及伊相連。閣二枝的下面有一木及伊相連。燈台所出的六枝攏是按呢。

36

(THR) Hiah-ê ba̍k kap hiah-ê ki, lóng kap i liân chòe chı̍t-ê, lóng ēng hó-kim, chiàu phah ê hoat chòe.

(BCL) 許個木及許個枝攏及伊連做一個，攏用好金照拍的法做。

37

(THR) Tio̍h kā i chòe chhit-ê teng-chóaⁿ, tio̍h tiám hiah-ê teng, hō͘ i chiò-kng tī tùi-bīn.

(BCL) 著給伊做七個燈盞。著點許個燈，互伊照光佇對面。

38

(THR) Teng-tâi ê chián kap i ê pôaⁿ, lóng tio̍h ēng hó-kim chòe-i.

(BCL) 燈台的剪及伊的盤攏著用好金做伊。

39

(THR) Chòe teng-tâi kap che it-chhè ê khì-kū, ēng hó-kim chı̍t tha-liân-tek.

(BCL) 做燈台及這一切的器具用好金一他連得。

40

(THR) Lí tio̍h kín-sīn chòe chiah-ê mı̍h-kiāⁿ, lóng tio̍h chiàu tī soaⁿ-téng chí-sī lí ê khóan-sit.

(BCL) 你著謹慎做諸個物件，攏著照佇山頂指示你的款式。」

Bible Color Mark

• 台語漢字羅馬本
• 巴克禮全羅