以西結書 第 22 章

1

(THR) Iâ-hô-hoa ê ōe koh lîm-kàu góa kóng,

(BCL) 耶和華的話閣臨到我講：

2

(THR) Jîn-chú ah, lí beh sím-mn̄g, sím-mn̄g hō͘ lâng lâu huih ê siâⁿ mah? tio̍h hō͘ i chai i it-chhè khó-ò͘ⁿ ê sū.

(BCL) 「人子啊，你欲審問，審問互人流血的城嗎？著互伊知伊一切可惡的事。

3

(THR) Lí tio̍h kóng, Chú Iâ-hô-hoa án-ni kóng, Chit ê siâⁿ, ū lâu lâng ê huih tī hit lāi-bīn, hō͘ i ê jı̍t-chí kàu; koh chng ngó͘-siōng phah lâ-sâm ka-kī, hām-hāi ka-kī.

(BCL) 你著講，主耶和華按呢講：此個城有流人的血佇彼內面，互伊的日子到，閣妝偶像拍垃墋家己，陷害家己。

4

(THR) In-ūi lí hō͘ lâng lâu huih, chiū ū chōe; lí chng ngó͘-siōng sī phah lâ-sâm ka-kī; chiū lí hō͘ lí ê jı̍t kūn, lí í-keng kàu lí ê nî; só͘-í Góa hō͘ lí siū lia̍t-kok ê lêng-jio̍k, lia̍t-pang ê thí-chhiò.

(BCL) 因為你互人流血，就有罪；你妝偶像，是拍垃墋家己，就你互你的日近，你已經到你的年。所以我互你受列國的凌辱，列邦的恥笑。

5

(THR) Lí chit-ê chhàu-miâ chōe-chōe jiáu-lōan ê siâⁿ ah! hiah-ê lī-khui lí kūn, lī-khui lí hn̄g--ê, lóng beh thí-chhiò lí.

(BCL) 你此個臭名多多擾亂的城啊，許個離開你近、離開你遠者攏欲恥笑你。

6

(THR) Khòaⁿ ah, Í-sek-lia̍t ê siú-léng, ta̍k-ê théng i khùi-la̍t, tī lí tiong-kan lâu lâng ê huih.

(BCL) 「看啊，以色列的首領逐個逞伊氣力，佇你中間流人的血。

7

(THR) Tī lí tiong-kan ū bú-bān pē-bú; tī lí tiong-kan ū ap-chè chhut-gōa lâng; tī lí tiong-kan ū khui-hū ko͘-jî kóaⁿ-hū--ê.

(BCL) 佇你中間有侮慢父母，佇你中間有壓制出外人，佇你中間有虧負孤兒寡婦者。

8

(THR) Lí khòaⁿ-khin Góa ê sèng-mı̍h, hōan-tio̍h Góa ê an-hioh-jı̍t.

(BCL) 你看輕我的聖物，犯著我的安息日。

9

(THR) Tī lín tiong-kan ū húi-pòng lâng, beh hō͘ lâng lâu huih--ê; tī lín tiong-kan ū tī soaⁿ-téng chia̍h chè-mı̍h, tī lín tiong-kan ū kiâⁿ îm-lōan.

(BCL) 佇恁中間有誹謗人、欲互人流血者；佇恁中間有佇山頂食祭物，佇恁中間有行淫亂。

10

(THR) Tī lín tiong-kan ū lō͘-hiān lāu-pē ê ē-thé; tī lín tiong-kan ū lêng-jio̍k ge̍h-keng bô chheng-khì ê hū-jîn-lâng--ê.

(BCL) 佇恁中間有露現老父的下體，佇恁中間有凌辱月經無清氣的婦仁人者。

11

(THR) Ū lâng kap chhù-piⁿ ê bó͘ kiâⁿ khó-ò͘ⁿ ê sū; iā ū lâng îm i ê sim-pū lâi phah lâ-sâm--i; tī lín tiong-kan ia̍h ū lâng lêng-jio̍k i ê chí-bē, chiū-sī i ê lāu-pē ê cha-bó͘-kiáⁿ.

(BCL) 有人及厝邊的某行可惡的事；也有人淫伊的媳婦來拍垃墋伊；佇恁中間亦有人凌辱伊的姊妹就是伊的老父的查某子。

12

(THR) Tī lín tiong-kan ū siū pò͘-lō͘, lâi lâu lâng ê huih, lí ia̍h ū the̍h lāi-chîⁿ, thó lī-sek; lí in-ūi tham-sim, le̍k-sek chhù-piⁿ, tit-tio̍h châi-lī; kéng-jiân bōe-kì-tit Góa; che sī Chú Iâ-hô-hoa kóng--ê.

(BCL) 佇恁中間有受賄賂來流人的血；你亦有提利錢討利息。你因為貪心，勒索厝邊得著財利，竟然記得我。這是主耶和華講的。

13

(THR) Khòaⁿ ah, Góa in-ūi lí só͘ tit put-gī ê chîⁿ, kap lí tiong-kan só͘ lâu ê huih, Góa chiū phah-chhiú.

(BCL) 「看啊，我因為你所得不義的錢，及你中間所流的血，我就拍手。

14

(THR) Kàu Góa pān lí ê jı̍t, lí ê sim iáu ōe jím-siū mah? lí ê chhiú iáu ōe ū la̍t mah? Góa Iâ-hô-hoa kóng chit ê ōe, chiū beh chiàu án-ni kiâⁿ.

(BCL) 到我辦你的日，你的心猶會忍受嗎？你的手猶會有力嗎？我──耶和華講此個話，就欲照按呢行。

15

(THR) Góa beh hun-sòaⁿ lí tī lia̍t-kok, sì-sòaⁿ lí tī lia̍t-pang; Góa beh tû lí tiong-kan ê ù-òe.

(BCL) 我欲分散你佇列國，四散你佇列邦。我欲除你中間的污穢。

16

(THR) Lí beh tī lia̍t-kok lâng ê bīn-chêng, in-ūi ka-kī só͘ kiâⁿ--ê, siū siat-to̍k; lí chiū chai Góa sī Iâ-hô-hoa.

(BCL) 你欲佇列國人的面前，因為家己所行的受褻瀆，你就知我是耶和華。」

17

(THR) Iâ-hô-hoa ê ōe lîm-kàu góa kóng,

(BCL) 耶和華的話臨到我講：

18

(THR) Jîn-chú ah, Í-sek-lia̍t-ke chāi Góa khòaⁿ sī che-tái; in lóng sī hé-lô͘-tiong ê tâng, siah, thih, iân; sī gûn ê che-tái.

(BCL) 「人子啊，以色列家在我看是渣滓。攏是火爐中的銅、錫、鐵、鉛，是銀的渣滓。

19

(THR) Só͘-í Chú Iâ-hô-hoa án-ni kóng, In-ūi lín lóng chiâⁿ-chòe che-tái; khòaⁿ ah, Góa beh chū-chı̍p lín tī Iâ-lō͘-sat-léng ê tiong-kan.

(BCL) 所以主耶和華按呢講：因為恁攏成做渣滓，看啊，我欲聚集恁佇耶路撒冷的中間。

20

(THR) Lâng cháiⁿ-iūⁿ chiong gûn, tâng, thih, iân, siah, chū-chı̍p tī hé-lô͘-tiong; khan-hé hō͘ i iûⁿ; án-ni Góa ia̍h beh ēng Góa ê siū-khì, kap tōa siū-khì, chū-chı̍p lín, hē lín tī-hia, lâi iûⁿ-hòa lín.

(BCL) 人怎樣將銀、銅、鐵、鉛、錫，聚集佇火爐中，牽火互伊鎔；按呢，我亦欲用我的受氣及大受氣，聚集恁下恁佇遐，來鎔化恁。

21

(THR) Góa beh chū-chı̍p lín, ēng Góa tōa siū-khì ê hé pûn lín, lín chiū tī hit tiong-kan iûⁿ-hòa.

(BCL) 我欲聚集恁，用我大受氣的火歕恁，恁就佇彼中間鎔化。

22

(THR) Gûn cháiⁿ-iūⁿ iûⁿ tī hé-lô͘-tiong, lín ia̍h beh án-ni iûⁿ tī hit tiong-kan; lín chiū chai Góa Iâ-hô-hoa piàⁿ-chhut Góa ê tōa siū-khì tī lín ê téng-bīn.

(BCL) 銀怎樣鎔佇火爐中，恁亦欲按呢鎔佇彼中間，恁就知我──耶和華傾出我的大受氣佇恁的頂面。」

23

(THR) Iâ-hô-hoa ê ōe lîm-kàu góa kóng,

(BCL) 耶和華的話臨到我講：

24

(THR) Jîn-chú ah, lí tio̍h tùi chit ê tōe kóng, Lí sī bē tit-tio̍h chheng-khì ê tōe, tī tōa siū-khì ê jı̍t, ia̍h bô lo̍h-hō͘ tī lí hia.

(BCL) 「人子啊，你著對此個地講：你是未得著清氣的地，佇大受氣的日亦無落雨佇你遐。

25

(THR) I tiong-kan ê sian-ti lóng kiat-tóng, chhin-chhiūⁿ hm̄-hm̄-háu ê sai, jiàu-tio̍h só͘ chhiúⁿ ê mı̍h, in thun-chia̍h lâng ê sîn-hûn, chhiúⁿ lâng ê hè-châi pó-mı̍h; hō͘ in ê tiong-kan ê chiú-kóaⁿ-lâng koh khah-chōe.

(BCL) 伊中間的先知攏結黨，親像噤噤哮的獅抓著所搶的物。吞食人的神魂，搶人的貨財寶物，互的中間的守寡人閣卡多。

26

(THR) I ê chè-si kóe-chho̍ah Góa ê lu̍t-hoat, siat-to̍k Góa ê sèng-só͘, bô hun-piat sèng-ê kap chho͘-sio̍k-ê, ia̍h bô hō͘ lâng hun-piat bô chheng-khì--ê, kap chheng-khì--ê; koh ng ba̍k-chiu m̄ khòaⁿ Góa chiah ê an-hioh-jı̍t, Góa ia̍h tī in tiong-kan siū siat-to̍k.

(BCL) 伊的祭司改斜我的律法，褻瀆我的聖所，無分別聖的及粗俗的，亦無互人分別無清氣的及清氣的，閣掩目睭呣看我諸個安息日；我亦佇中間受褻瀆。

27

(THR) I ê kùi-cho̍k chhin-chhiūⁿ chhâi-lông, jiàu-tio̍h só͘ chhiúⁿ ê mı̍h, thâi lâng lâu huih, siong-hāi lâng ê sìⁿ-miā, ài tit-tio̍h put-gī ê chîⁿ.

(BCL) 伊的貴族親像豺狼抓著所搶的物，人流血，傷害人的生命，愛得著不義的錢。

28

(THR) I ê sian-ti chhin-chhiūⁿ ēng he-chúi kā in chhéng-pe̍h, khòaⁿ hu-ké ê īⁿ-siōng, ēng pe̍h-chha̍t kā in chiam-pok, kóng, Chú Iâ-hô-hoa án-ni kóng, kî-sı̍t Iâ-hô-hoa bô-iáⁿ kóng.

(BCL) 伊的先知親像用灰水給筅白，看虛假的異像，用白賊給占卜，講：『主耶和華按呢講』，其實耶和華無影講。

29

(THR) Kok-lāi ê peh-sìⁿ it-bī kiâⁿ ap-chè kòan-liān chhiúⁿ lâng; khui-hū sòng-hiong khùn-khó͘--ê, bô chêng-lí khi-ap chhut-gōa lâng.

(BCL) 國內的百姓一味行壓制，慣練搶人，虧負喪鄉困苦者，無情理欺壓出外人。

30

(THR) Góa tī in tiong-kan chhē-khòaⁿ ū chı̍t-lâng thang lâi ûi-chhiûⁿ, tī Góa ê bīn-chêng ūi-tio̍h chit ê kok khiā tī phòa-khiah ê só͘-chāi, hō͘ góa bô châu-bia̍t i; chóng-sī chhē bô chı̍t-ê.

(BCL) 我佇中間尋看有一人通來圍牆，佇我的面前為著此個國徛佇破隙的所在，互我無剿滅伊，總是尋無一個。

31

(THR) Só͘-í Góa ēng Góa ê thòng-hūn piàⁿ tī in ê téng-bīn, ēng Góa tōa siū-khì ê hé bia̍t--in; chiàu in só͘ kiâⁿ--ê, pò-èng tī in ê thâu-khak-téng; che sī Chú Iâ-hô-hoa kóng--ê.

(BCL) 所以我用我的痛恨傾佇的頂面，用我大受氣的火滅，照所行的報應佇的頭殼頂。這是主耶和華講的。」

Bible Color Mark

• 台語漢字羅馬本
• 巴克禮全羅