以西結書 第 35 章

1

(THR) Iâ-hô-hoa ê ōe lîm-kàu góa kóng,

(BCL) 耶和華的話臨到我講：

2

(THR) Jîn-chú ah, lí tio̍h bīn ǹg Se-jíⁿ soaⁿ, soan-thôan lâi kong-kek i.

(BCL) 「人子啊，你著面向西珥山宣傳，來攻擊伊，

3

(THR) Tùi i kóng, Chú Iâ-hô-hoa án-ni kóng, Khòaⁿ ah, Se-jíⁿ soaⁿ ah, Góa kap lí chòe tùi-te̍k, Góa beh chhun-chhiú kong-kek lí; hō͘ lí léng-chēng, thang hō͘ lâng gông-ngia̍h.

(BCL) 對伊講，主耶和華按呢講：看啊，西珥山啊，我及你做對敵，我欲伸手攻擊你，互你冷靜，通互人卬愕。

4

(THR) Góa beh hō͘ lí chiah ê siâⁿ pìⁿ-chòe pha-hng, hō͘ lí léng-chēng; lí chiū chai Góa sī Iâ-hô-hoa.

(BCL) 我欲互你諸個城變做拋荒，互你冷靜。你就知我是耶和華。

5

(THR) In-ūi lí khǹg éng-óan ê òan-hūn; tī Í-sek-lia̍t cho̍k tú-tio̍h chai-ē, chōe-kòa kiat-kio̍k ê sî, lí chiong in kau hō͘ to-kiàm ê sè-le̍k.

(BCL) 因為你囥永遠的怨恨，佇以色列族抵著災禍，罪過結局的時，你將交互刀劍的勢力，

6

(THR) Só͘-í Chú Iâ-hô-hoa án-ni kóng, Góa chí Góa ê éng-o̍ah lâi chiù-chōa, Góa tek-khak hō͘ lí tú-tio̍h lâu-huih ê pò-èng; chōe tek-khak tui-kóaⁿ lí; lí í-keng bô òan-hūn thâi lâng lâu huih, só͘-í chit ê chōe tek-khak tui-jip lí.

(BCL) 所以主耶和華按呢講：我指我的永活來咒誓，我的確互你抵著流血的報應，罪的確追趕你；你已經無怨恨人流血，所以此個罪的確追你。

7

(THR) Góa beh hō͘ Se-jíⁿ-soaⁿ pha-hng léng-chēng; tùi-hia óng-lâi ê lâng Góa beh chián-tû i.

(BCL) 我欲互西珥山拋荒冷靜，對遐往來的人我欲剪除伊。

8

(THR) Góa beh hō͘ i hiah ê soaⁿ, siū thâi ê lâng móa-móa; hō͘ to-kiàm thâi-sí--ê beh tó tī lí ê sió-soaⁿ, kap soaⁿ-kok, kap it-chhè ê khiⁿ-kau.

(BCL) 我欲互伊許個山，受的人滿滿。互刀劍死者，欲倒佇你的小山，及山谷，及一切的坑溝。

9

(THR) Góa beh hō͘ lí éng-óan pha-hng, lí chiah ê siâⁿ tek-khak bô lâng khiā-khí; chiū lín tek-khak chai Góa sī Iâ-hô-hoa.

(BCL) 我欲互你永遠拋荒，你諸個城的確無人徛起，就恁的確知我是耶和華。

10

(THR) In-ūi lín kóng, Chí nn̄g-kok nn̄g ê tōe-hng, lóng beh kui góa, góan beh tit-tio̍h; kî-sı̍t Iâ-hô-hoa tī-hia.

(BCL) 「因為恁講：『此二國二個地方攏欲歸我，阮欲得著』（其實耶和華佇遐），

11

(THR) Só͘-í Chú Iâ-hô-hoa án-ni kóng, Góa kí Góa ê éng-o̍ah lâi chiù-chōa; Góa beh chiàu lí ê siū-khì, kap chiàu lí ūi-tio̍h òan-hūn lâi kiâⁿ tī in ê òan-tò͘, khóan-thāi lí; chiū Góa sím-phòaⁿ lí ê sî beh hián-bêng ka-kī tī in tiong-kan.

(BCL) 所以主耶和華按呢講：我指我的永活來咒誓，我欲照你的受氣，及照你為著怨恨來行佇的怨妒款待你。就我審判你的時，欲顯明家己佇中間。

12

(THR) Lí chiū chai Góa Iâ-hô-hoa í-keng thiaⁿ-kìⁿ lí kong-kek Í-sek-lia̍t chiah ê soaⁿ só͘ kóng ê pòng-to̍k, sī kóng, Pha-hng lah, in í-keng kau tī góan, hō͘ góan thang thun i.

(BCL) 你就知我──耶和華已經聽見你攻擊以色列諸個山所講的謗瀆，是講：『拋荒啦，已經交佇阮，互阮通吞伊。』

13

(THR) Koh lín ēng chhùi ǹg Góa lâi ka-kī khoa-kháu; ke-thiⁿ lín chiah ê ōe lâi kong-kek Góa; Góa thiaⁿ-kìⁿ lah.

(BCL) 閣恁用嘴向我來家己誇口，加添恁諸個話來攻擊我，我聽見啦。

14

(THR) Chú Iâ-hô-hoa án-ni kóng, Tng chôan-tōe hoaⁿ-hí ê sî, Góa beh hō͘ lí pha-hng.

(BCL) 主耶和華按呢講：當全地歡喜的時，我欲互你拋荒。

15

(THR) Lí in-ūi Í-sek-lia̍t-ke ê ki-gia̍p pha-hng, lâi hoaⁿ-hí; Góa iā beh án-ni khóan-thāi lí; Se-jíⁿ soaⁿ ah, lí beh pha-hng, í-kı̍p Í-tong chôan-tōe iā án-ni; in chiū chai Góa sī Iâ-hô-hoa.

(BCL) 你因為以色列家的基業拋荒來歡喜，我也欲按呢款待你。西珥山啊，你欲拋荒以及以東全地也按呢。就知我是耶和華。」

Bible Color Mark

• 台語漢字羅馬本
• 巴克禮全羅