以西結書 第 36 章

1

(THR) Jîn-chú ah, lí tio̍h tùi Í-sek-lia̍t chiah ê soaⁿ lâi soan-thôan, kóng, Í-sek-lia̍t chiah ê soaⁿ ah, tio̍h thiaⁿ Iâ-hô-hoa ê ōe.

(BCL) 「人子啊，你著對以色列諸個山來宣傳講：以色列諸個山啊，著聽耶和華的話。

2

(THR) Chú Iâ-hô-hoa án-ni kóng, In-ūi tùi-te̍k kong-kek lí kóng, Hō͘--chāi, kó͘-chá kôaiⁿ ê só͘-chāi lóng hō͘ góan chòe-gia̍p lah.

(BCL) 主耶和華按呢講：因為對敵攻擊你講：『呼哉！古早高的所在攏互阮做業啦！』

3

(THR) Só͘-í lí tio̍h soan-thôan kóng, Chú Iâ-hô-hoa án-ni kóng, In-ūi in hō͘ lí pha-hng, tī sì-ûi thun-kā lí; beh hō͘ lí kui tī só͘ chhun ê gōa-pang-lâng chòe gia̍p; iā hō͘ kāu-kháu-sia̍t ê lâng gī-lūn lí, hō͘ chèng peh-sìⁿ húi-pòng lí;

(BCL) 所以你著宣傳講，主耶和華按呢講：因為互你拋荒，佇四圍吞咬你，欲互你歸佇所剩的外邦人做業，也互厚口舌的人議論你，互眾百姓誹謗你。

4

(THR) só͘-í Í-sek-lia̍t chiah ê soaⁿ ah, tio̍h thiaⁿ Chú Iâ-hô-hoa ê ōe: Chú Iâ-hô-hoa tùi chiah ê soaⁿ, chiah ê niá, chiah ê khiⁿ-kau, chiah ê soaⁿ-kok, chiah ê pha-hng ê só͘-chāi, siū khì-sak ê siâⁿ, hō͘ sì-ûi só͘ chhun ê gōa-pang-lâng chhiúⁿ-kiap ki-chhì--ê, án-ni kóng;

(BCL) 所以，以色列諸個山啊，著聽主耶和華的話。主耶和華對諸個山、諸個嶺、諸個坑溝、諸個山谷、諸個拋荒的所在，受棄拺的城，互四圍所剩的外邦人搶劫譏刺者，按呢講，

5

(THR) só͘-í Chú Iâ-hô-hoa án-ni kóng, Góa sı̍t-chāi tī jia̍t-jia̍t ê òan-tò͘, ēng ōe chek-pī lia̍t-pang só͘ chhun--ê í-kı̍p Í-tong ê chôan-tōe; in-ūi in hun-phài Góa ê tōe chòe ka-kī ê gia̍p; móa-sim hoaⁿ-hí, sîn-hûn biáu-sī; ài kóaⁿ-tio̍k i ê peh-sìⁿ, lâi chhiúⁿ-kiap--i.

(BCL) 所以主耶和華按呢講：我實在佇熱熱的怨妒，用話責備列邦所剩者以及以東的全地。因為分派我的地做家己的業，滿心歡喜，神魂藐視，愛趕逐伊的百姓，來搶劫伊。

6

(THR) Só͘-í lí tio̍h lūn Í-sek-lia̍t tōe lâi soan-thôan; tùi i chiah ê soaⁿ, chiah ê niá, chiah ê khiⁿ-kau, chiah ê soaⁿ-kok kóng, Chú Iâ-hô-hoa án-ni kóng, Khòaⁿ ah, Góa tī góa ê òan-tò͘, kap Góa ê tōa siū-khì lâi kóng, in-ūi lí í-keng siū īⁿ-pang lâng ê lêng-jio̍k;

(BCL) 所以，你著論以色列地來宣傳，對伊諸個山、諸個嶺、諸個坑溝、諸個山谷講，主耶和華按呢講：看啊，我佇我的怨妒及我的大受氣來講，因為你已經受異邦人的凌辱，

7

(THR) só͘-í Chú Iâ-hô-hoa án-ni kóng, Góa kú-khí Góa ê chhiú, kóng, Tī lín sì-ûi ê īⁿ-pang lâng, in sı̍t-chāi beh siū in ê lêng-jio̍k.

(BCL) 所以主耶和華按呢講，我舉起我的手講：佇恁四圍的異邦人，實在欲受的凌辱。

8

(THR) To̍k-to̍k lín Í-sek-lia̍t chiah ê soaⁿ ah, lín tek-khak hoat-chhut lín ê ki-ōaiⁿ, koh beh kiat ké-chí hō͘ Góa ê peh-sìⁿ Í-sek-lia̍t; in-ūi in kūn-kūn beh kàu lah.

(BCL) 「獨獨恁以色列諸個山啊，恁的確發出恁的枝椏，閣欲結果子互我的百姓以色列，因為近近欲到啦。

9

(THR) Khòaⁿ ah, Góa sī ūi lín ê, góa beh o̍at-tńg ǹg lín, chiū lín beh hō͘ lâng chèng-choh.

(BCL) 看啊，我是為恁的，我欲越轉向恁，就恁欲互人種作。

10

(THR) Góa koh beh ke-thiⁿ lâng tī lín ê téng-bīn, chiū-sī Í-sek-lia̍t ke-ke hō͘-hō͘, it-chhè lóng án-ni; chiū i chiah ê siâⁿ beh ū lâng khiā-khí; pha-hng ê só͘-chāi tit-tio̍h khí-chō.

(BCL) 我閣欲加添人佇恁的頂面，就是以色列家家戶戶一切攏按呢，就伊諸個城欲有人徛起，拋荒的所在得著起造。

11

(THR) Góa iā beh ke-thiⁿ lâng kap cheng-siⁿ tī lín ê téng-bīn; in beh siⁿ-thòaⁿ chin-chōe; Góa beh hō͘ lín chiàu-kū ū lâng khiā-khí; koh beh hó khóan-thāi lín, iâⁿ-kè khí-thâu ê sî; lín chiū chai Góa sī Iâ-hô-hoa.

(BCL) 我也欲加添人及精牲佇恁的頂面；欲生湠真多。我欲互恁照舊有人徛起，閣欲好款待恁贏過起頭的時，恁就知我是耶和華。

12

(THR) Góa beh hō͘ lâng kiâⁿ tī lín ê téng-bīn, chiū-sī Góa ê peh-sìⁿ Í-sek-lia̍t; in beh tit-tio̍h lí, lí beh chòe in ê gia̍p; lí iā bô koh hō͘ in cho̍at-sû.

(BCL) 我欲互人行佇恁的頂面，就是我的百姓以色列。欲得著你，你欲做的業；你也無閣互絕嗣。

13

(THR) Chú Iâ-hô-hoa án-ni kóng, In-ūi lâng tùi lín kóng, Lí sī thun-chia̍h lâng--ê, koh hō͘ peh-sìⁿ cho̍at-sû;

(BCL) 主耶和華按呢講：因為人對恁講：『你是吞食人者，閣互百姓絕嗣』，

14

(THR) só͘-í Chú Iâ-hô-hoa án-ni kóng, Lí bô beh koh thun-chia̍h lâng, ia̍h bô beh koh hō͘ lí ê kok-bîn cho̍at-sû.

(BCL) 所以主耶和華按呢講：你無欲閣吞食人，亦無欲閣互你的國民絕嗣。

15

(THR) Góa bô beh hō͘ lí koh thiaⁿ-kìⁿ gōa-pang lâng ê lêng-jio̍k, lí iā bô koh siū bān peh-sìⁿ ê húi-pòng, lí iā bô koh hō͘ lí ê kok-bîn tio̍h-tak; che sī Chú Iâ-hô-hoa kóng--ê.

(BCL) 我無欲互你閣聽見外邦人的凌辱，你也無閣受萬百姓的誹謗，你也無閣互你的國民著觸。這是主耶和華講的。」

16

(THR) Iâ-hô-hoa ê ōe koh lîm-kàu góa kóng,

(BCL) 耶和華的話閣臨到我講：

17

(THR) Jîn-chú ah, Í-sek-lia̍t-ke, khiā-khí tī pún só͘-chāi ê sî, ēng in ê só͘-kiâⁿ só͘-chòe, phah lâ-sâm--i; in ê só͘-kiâⁿ tī Góa ê bīn-chêng sī chhin-chhiūⁿ hū-jîn-lâng keng-kî kàu ê lâ-sâm.

(BCL) 「人子啊，以色列家徛起佇本所在的時，用的所行所做拍垃墋伊。的所行佇我的面前，是親像婦仁人經期到的垃墋。

18

(THR) In-ūi in tī hit ê só͘-chāi lâu lâng ê huih, koh in-ūi in ēng ngó͘-siōng phah lâ-sâm--i; só͘-í Góa piàⁿ-chhut Góa ê siū-khì tī i ê téng-bīn.

(BCL) 因為佇彼個所在流人的血，閣因為用偶像拍垃墋伊，所以我傾出我的受氣佇伊的頂面。

19

(THR) Góa hun-sòaⁿ in tī lia̍t-kok, in chiū sì-sòaⁿ tī lia̍t-pang-tiong; Góa chiū chiàu in ê só͘-kiâⁿ, in ê só͘-chòe lâi sím-phòaⁿ--in.

(BCL) 我分散佇列國，就四散佇列邦中，我就照的所行，的所做來審判。

20

(THR) In khì kàu in só͘ kàu ê gōa-pang lâng hia, siat-to̍k Góa ê sèng-miâ; in-ūi lâng chí in lâi kóng, Che sī Iâ-hô-hoa ê peh-sìⁿ, tùi I ê tōe chhut-lâi--ê.

(BCL) 去到所到的外邦人遐，褻瀆我的聖名；因為人指來講，這是耶和華的百姓，對伊的地出來者。

21

(THR) Chóng-sī Góa pó-sioh Góa ê sèng-miâ; chiū-sī Í-sek-lia̍t-ke, tī in só͘ kàu ê lia̍t-kok-tiong, só͘ siat-to̍k--ê.

(BCL) 總是我保惜我的聖名，就是以色列家佇所到的列國中所褻瀆者。

22

(THR) Só͘-í lí tio̍h tùi Í-sek-lia̍t-ke kóng, Chú Iâ-hô-hoa án-ni kóng, Í-sek-lia̍t-ke ah, Góa kiâⁿ chit-ê, m̄-sī ūi-tio̍h lín ê iân-kò͘, chiū-sī ūi-tio̍h Góa ê sèng-miâ ê iân-kò͘; chiū-sī lín kiâⁿ-kàu ê lia̍t-kok-tiong só͘ siat-to̍k--ê.

(BCL) 「所以，你著對以色列家講，主耶和華按呢講：以色列家啊，我行此個，呣是為著恁的緣故，就是為著我的聖名的緣故，就是恁行到的列國中所褻瀆者。

23

(THR) Góa ê tōa-miâ siū siat-to̍k tī īⁿ-pang-tiong, chiū-sī lín só͘ siat-to̍k tī in tiong-kan--ê; Góa beh hō͘ i chòe-sèng; koh Góa tùi lín hián-bêng ka-kī chòe-sèng tī in ê ba̍k-chiu-chêng; chiū īⁿ-pang-lâng beh chai Góa sī Iâ-hô-hoa; che sī Chú Iâ-hô-hoa só͘ kóng--ê.

(BCL) 我的大名受褻瀆佇異邦中；就是恁所褻瀆佇中間者；我欲互伊做聖。閣我對恁顯明家己做聖，佇的目睭前，就異邦人欲知我是耶和華。這是主耶和華所講的。

24

(THR) Góa beh tòa lín chhut lia̍t-pang, tùi lia̍t-kok-tiong chū-chı̍p lín, chhōa lín jı̍p lín ê pún só͘-chāi.

(BCL) 我欲帶恁出列邦，對列國中聚集恁，導恁入恁的本所在。

25

(THR) Góa iā beh ēng chheng ê chúi hiù lín, lín chiū chheng-khì; Góa beh sóe-chheng lín, tû-khì lín it-chhè ê lâ-sâm, kap lín it-chhè ê ngó͘-siōng.

(BCL) 我也欲用清的水灑恁，恁就清氣。我欲洗清恁，除去恁一切的垃墋，及恁一切的偶像。

26

(THR) Góa beh ēng sin ê sim siúⁿ-sù lín; iā beh ēng sin ê sîn hē tī lín ê lāi-bīn; koh beh tùi lín ê jio̍k-thé-tiong tû-khì chhin-chhiūⁿ chio̍h ê sim, siúⁿ-sù lín chhin-chhiūⁿ bah ê sim.

(BCL) 我欲用新的心賞賜恁，也欲用新的神下佇恁的內面，閣欲對恁的肉體中除去親像石的心，賞賜恁親像肉的心。

27

(THR) Góa beh chiong Góa ê sîn hē tī lín ê lāi-bīn, hō͘ lín sūn-thàn Góa ê lu̍t-lē, siú Góa ê hoat-tō͘ lâi kiâⁿ--i.

(BCL) 我欲將我的神下佇恁的內面，互恁順趁我的律例，守我的法度來行伊。

28

(THR) Lín beh khiā-khí tī Góa só͘ siúⁿ-sù lín ê lia̍t-chó͘ ê tōe; lín beh chòe Góa ê peh-sìⁿ, Góa beh chòe lín ê Siōng-tè.

(BCL) 恁欲徛起佇我所賞賜恁的列祖的地。恁欲做我的百姓，我欲做恁的上帝。

29

(THR) Góa beh kiù lín thoat-lī lín it-chhè ê ù-òe; iā beh kiò ngó͘-kok hō͘ i hong-sēng, bô hō͘ lín tú-tio̍h ki-hng.

(BCL) 我欲救恁脫離恁一切的污穢，也欲叫五穀互伊豐盛，無互恁抵著飢荒。

30

(THR) Góa beh ke-thiⁿ chhiū-ba̍k ê ké-chí, í-kı̍p chhân-hn̂g ê thó͘-sán; hō͘ lín bô koh in-ūi ki-hng siū gōa-pang-lâng ê lêng-jio̍k.

(BCL) 我欲加添樹木的果子，以及田園的土產，互恁無閣因為飢荒受外邦人的凌辱。

31

(THR) Hit-sî lín beh kì-tit lín ê pháiⁿ só͘-kiâⁿ, kap lín m̄-hó ê só͘-chòe; chiū in-ūi lín ê chōe-kòa, kap khó-ò͘ⁿ ê sū, tī ka-kī ê bīn-chêng lâi iàm-chiān ka-kī.

(BCL) 彼時，恁欲記得恁的歹所行，及恁呣好的所做，就因為恁的罪過及可惡的事，佇家己的面前來厭賤家己。

32

(THR) Chú Iâ-hô-hoa kóng, Lín tio̍h chai Góa án-ni kiâⁿ m̄-sī ūi-tio̍h lín ê iân-kò͘; Í-sek-lia̍t-ke ah, lín tio̍h ūi ka-kī ê só͘-kiâⁿ, lâi làu-khùi kiàn-siàu.

(BCL) 主耶和華講：恁著知，我按呢行呣是為著恁的緣故。以色列家啊，恁著為家己的所行來漏氣見誚。

33

(THR) Chú Iâ-hô-hoa án-ni kóng, Góa sóe-chheng lín, tû-khì lín it-chhè chōe-kòa ê jı̍t, beh hō͘ lín ê siâⁿ ū lâng khiā-khí, pha-hng ê só͘-chāi tit-tio̍h khí-chō.

(BCL) 「主耶和華按呢講：我洗清恁，除去恁一切罪過的日，欲互恁的城有人徛起，拋荒的所在得著起造。

34

(THR) Chêng kè-lō͘ ê lâng khòaⁿ-chòe hong-hòe ê tōe, taⁿ chit ê hong-hòe ê tōe koh ū lâng chèng-choh.

(BCL) 前過路的人看做荒廢的地，今此個荒廢的地閣有人種作。

35

(THR) Lâng beh kóng, Chêng chòe hong-hòe ê tōe, taⁿ chhin-chhiūⁿ Ai-tiân ê hn̂g; chit ê hong-hòe, léng-chēng, húi-hōai ê siâⁿ, taⁿ khí chin kian-kò͘, ū lâng khiā-khí.

(BCL) 人欲講：『前做荒廢的地，今親像伊甸的園；此個荒廢冷靜、毀壞的城今起真堅固，有人徛起。』

36

(THR) Hit-sî tī lín sì-ûi só͘ chhun ê gōa-pang-lâng, beh chai Góa Iâ-hô-hoa khí-chō hiah ê tó-hōai ê só͘-chāi, chai-pôe hong-hòe ê tōe; Góa Iâ-hô-hoa í-keng kóng--i, tek-khak chiâⁿ--i.

(BCL) 彼時，佇恁四圍所剩的外邦人欲知我─耶和華起造許個倒壞的所在，栽培荒廢的地。我─耶和華已經講伊，的確成伊。

37

(THR) Chú Iâ-hô-hoa án-ni kóng, Góa beh hō͘ Í-sek-lia̍t-ke ūi-tio̍h chit ê sū kiû Góa, tì-kàu Góa kā in chiâⁿ; Góa beh ke-thiⁿ in ê lâng-gia̍h, chhin-chhiūⁿ iûⁿ-kûn.

(BCL) 「主耶和華按呢講：我欲互以色列家為著此個事求我，致到我給成。我欲加添的人額，親像羊群。

38

(THR) Chhin-chhiūⁿ hiàn-chè ê iûⁿ-kûn, chiū-sī chhin-chhiūⁿ Iâ-lō͘-sat-léng siú-choeh ê sî ê iûⁿ-kûn; án-ni, chiah ê pha-hng ê siâⁿ, tek-khak ū kui-kûn lâng móa-móa; in chiū chai Góa sī Iâ-hô-hoa.

(BCL) 親像獻祭的羊群，就是親像耶路撒冷守節的時的羊群，按呢，諸個拋荒的城的確有歸群人滿滿。就知我是耶和華。」

Bible Color Mark

• 台語漢字羅馬本
• 巴克禮全羅