創世記 第 11 章

1

(THR) Hit-sî thiⁿ-ē ê kháu-im, giân-gú, lóng chı̍t-iūⁿ.

(BCL) 彼時，天下的口音、言語攏一樣。

2

(THR) In sóa-khì tang-sì ê sî-chūn, tī Sī-ná tōe tú-tio̍h chı̍t-phiàn ê pîⁿ-iûⁿ, chiū tòa tī-hia.

(BCL) 徙去東勢的時陣，佇示拿地抵著一片的平洋，就住佇遐。

3

(THR) In tāi-ke chham-siông kóng, Lâi ah, lán tio̍h chòe chng, sio hō͘ i se̍k. In ū chng thang thòe chio̍h, koh ū chio̍h-iû thang thòe he-thô͘.

(BCL) 大家參詳講：「來啊！咱著做磚，燒互伊熟。」有磚通替石，閣有石油通替灰土。

4

(THR) Koh kóng, Lâi ah, lán tio̍h khí siâⁿ kap thah, thah-téng tú-thiⁿ, ūi lán lı̍p chı̍t ê miâ, bián-tit lán sì-sòaⁿ tī chôan-tōe.

(BCL) 閣講：「來啊！咱著起城及塔，塔頂抵天，為咱立一個名，免得咱四散佇全地。」

5

(THR) Iâ-hô-hoa kàng-lîm, beh khòaⁿ sè-kan lâng só͘ khí ê siâⁿ kap thah.

(BCL) 耶和華降臨，欲看世間人所起的城及塔。

6

(THR) Iâ-hô-hoa kóng, Khòaⁿ ah, chiah ê peh-sìⁿ lóng ha̍p-it, giân-gú ia̍h chı̍t-iūⁿ; hiān-kim í-keng khí-chhiú chòe chit ê sū; í-āu in só͘ beh chòe ê, bô chı̍t-hāng ōe kìm-chí.

(BCL) 耶和華講：「看啊！諸個百姓攏合一，言語亦一樣，現今已經起手做此個事，以後所欲做的無一項會禁止。

7

(THR) Lâi ah, lán lo̍h-lâi-khì, tī-hia phah-lōan in ê kháu-im, hō͘ in ê giân-gú tāi-ke bōe siong-thong.

(BCL) 來啊！咱落來去，佇遐拍亂的口音，互的言語大家相通。」

8

(THR) Tùi án-ni, Iâ-hô-hoa hō͘ in tùi-hia sì-sòaⁿ tī chôan-tōe; in chiū thêng-kang, bô khí hit ê siâⁿ.

(BCL) 對按呢耶和華互對遐四散佇全地；就停工，無起彼個城。

9

(THR) Só͘-í hit ê siâⁿ miâ-kiò Pa-pia̍t, in-ūi Iâ-hô-hoa tī-hia phah-lōan thiⁿ-ē ê giân-gú; Iâ-hô-hoa hō͘ lâng tùi-hia sì-sòaⁿ tī chôan-tōe-chiūⁿ.

(BCL) 所以彼個城名叫巴別，因為耶和華佇遐拍亂天下的言語，耶和華互人對遐四散佇全地上。

10

(THR) Siám ê sè-hē kì tī ē-tóe. Siám chı̍t-pah hè, tōa-chúi í-āu nn̄g-nî siⁿ A-hoat-sat.

(BCL) 閃的世系記佇下底。閃一百歲，大水以後二年，生亞法撒。

11

(THR) Siám siⁿ A-hoat-sat liáu-āu, iáu o̍ah gō͘-pah nî, koh ū siⁿ kiáⁿ cha-bó͘-kiáⁿ.

(BCL) 閃生亞法撒了後猶活五百年，閣有生子查某子。

12

(THR) A-hoat-sat saⁿ-cha̍p gō͘ hè siⁿ Sa-la̍h.

(BCL) 亞法撒三十五歲生沙拉。

13

(THR) A-hoat-sat siⁿ Sa-la̍h liáu-āu, iáu o̍ah sì-pah liân saⁿ nî, koh ū siⁿ kiáⁿ cha-bó͘-kiáⁿ.

(BCL) 亞法撒生沙拉了後猶活四百連三年，閣有生子查某子。

14

(THR) Sa-la̍h saⁿ-cha̍p hè siⁿ Hi-pek.

(BCL) 沙拉三十歲，生希伯。

15

(THR) Sa-la̍h siⁿ Hi-pek liáu-āu, iáu o̍ah sì-pah liân saⁿ nî, koh ū siⁿ kiáⁿ cha-bó͘-kiáⁿ.

(BCL) 沙拉生希伯了後猶活四百連三年，閣有生子查某子。

16

(THR) Hi-pek saⁿ-cha̍p-sì hè siⁿ Hoat-le̍k .

(BCL) 希伯三十四歲，生法勒。

17

(THR) Hi-pek siⁿ Hoat-le̍k liáu-āu, iáu o̍ah sì-pah saⁿ-cha̍p nî, koh ū siⁿ kiáⁿ cha-bó͘-kiáⁿ.

(BCL) 希伯生法勒了後猶活四百三十年，閣有生子查某子。

18

(THR) Hoat-le̍k saⁿ-cha̍p hè siⁿ La̍h-ngô͘.

(BCL) 法勒三十歲，生拉吳。

19

(THR) Hoat-le̍k siⁿ La̍h-ngô͘ liáu-āu, iáu o̍ah nn̄g-pah liân káu nî, koh ū siⁿ kiáⁿ cha-bó͘-kiáⁿ.

(BCL) 法勒生拉吳了後猶活二百連九年，閣有生子查某子。

20

(THR) La̍h-ngô͘ saⁿ-cha̍p jī hè siⁿ Se-lo̍k.

(BCL) 拉吳三十二歲，生西鹿。

21

(THR) La̍h-ngô͘ siⁿ Se-lo̍k liáu-āu, iáu o̍ah nn̄g-pah liân chhit nî, koh ū siⁿ kiáⁿ cha-bó͘-kiáⁿ.

(BCL) 拉吳生西鹿了後猶活二百連七年，閣有生子查某子。

22

(THR) Se-lo̍k saⁿ-cha̍p hè siⁿ Ná-ho̍k.

(BCL) 西鹿三十歲，生拿福。

23

(THR) Se-lo̍k siⁿ Ná-ho̍k liáu-āu, iáu o̍ah nn̄g-pah nî, koh ū siⁿ kiáⁿ cha-bó͘-kiáⁿ.

(BCL) 西鹿生拿福了後猶活二百年，閣有生子查某子。

24

(THR) Ná-ho̍k jī-cha̍p káu hè siⁿ Tha-la̍h.

(BCL) 拿福二十九歲，生他拉。

25

(THR) Ná-ho̍k siⁿ Tha-la̍h liáu-āu, iáu o̍ah chı̍t-pah cha̍p-káu nî, koh ū siⁿ kiáⁿ cha-bó͘-kiáⁿ.

(BCL) 拿福生他拉了後猶活一百十九年，閣有生子查某子。

26

(THR) Tha-la̍h chhit-cha̍p hè siⁿ A-pek-lân, Ná-ho̍k, Hap-lân.

(BCL) 他拉七十歲，生亞伯蘭、拿福、哈蘭。

27

(THR) Tha-la̍h ê sè-hē kì tī ē-tóe. Tha-la̍h siⁿ A-pek-lân, Ná-ho̍k, Hap-lân; Hap-lân siⁿ Lô-tek.

(BCL) 他拉的世系記佇下底。他拉生亞伯蘭、拿福、哈蘭；哈蘭生羅得。

28

(THR) Hap-lân sí tī i ê lāu-pē Tha-la̍h ê bīn-chêng, tī i ê pún-tōe Ka-le̍k-tí ê Jíⁿ siâⁿ.

(BCL) 哈蘭死佇伊的老父他拉的面前，佇伊的本地迦勒底的珥城。

29

(THR) A-pek-lân, Ná-ho̍k, kok ū chhōa-bó͘. A-pek-lân ê bó͘ miâ kiò Sat-lāi; Ná-ho̍k ê bó͘ miâ-kiò Bı̍t-ka, sī Hap-lân ê cha-bó͘-kiáⁿ; Hap-lân sī Bı̍t-ka ê lāu-pē, ia̍h sī Í-sū-ka ê lāu-pē.

(BCL) 亞伯蘭、拿福各有娶某：亞伯蘭的某名叫撒萊；拿福的某名叫密迦，是哈蘭的查某子；哈蘭是密迦的老父，亦是以斯迦的老父。

30

(THR) Sat-lāi bô hôai-īn, bô kiáⁿ.

(BCL) 撒萊無懷孕，無子。

31

(THR) Tha-la̍h chhōa i ê kiáⁿ A-pek-lân, kap i ê sun Lô-tek, chiū-sī Hap-lân ê kiáⁿ, í-kı̍p i ê sim-pū Sat-lāi, chiū-sī i ê kiáⁿ A-pek-lân ê bó͘, in saⁿ-kap chhut Ka-le̍k-tí ê Jíⁿ siâⁿ; beh khì Ka-lâm tōe; in kàu Hap-lân chiū tòa tī-hia.

(BCL) 他拉導伊的子亞伯蘭及伊的孫羅得就是哈蘭的子，以及伊的媳婦撒萊就是伊的子亞伯蘭的某，相及出迦勒底的珥城，欲去迦南地；到哈蘭就住佇遐。

32

(THR) Tha-la̍h hióng-siū nn̄g-pah liân gō͘ hè; Tha-la̍h sí tī Hap-lân.

(BCL) 他拉享壽二百連五歲，他拉死佇哈蘭。

Bible Color Mark

• 台語漢字羅馬本
• 巴克禮全羅