創世記 第 28 章

1

(THR) Í-sat kiò Ngá-kok lâi, kā i chiok-hok, ia̍h hoan-hù i kóng, Lí m̄-thang chhōa Ka-lâm ê cha-bó͘-gín-á chòe bó͘.

(BCL) 以撒叫雅各來，給伊祝福亦吩咐伊講：「你呣通娶迦南的查某囝仔做某。

2

(THR) Lí khí-lâi, khì Pa-tàn-a-lân, kàu lí ê gōa-kong Pí-thó͘-lī ê ke; tī lí ê bú-kū La̍h-pan cha-bó͘-kiáⁿ ê tiong-kan, chhōa chı̍t-ê chòe bó͘.

(BCL) 你起來去巴旦亞蘭，到你的外公彼土利的家，佇你的母舅拉班查某子的中間娶一個做某。

3

(THR) Gōan chôan-lêng ê Siōng-tè sù-hok lí, hō͘ lí siⁿ-thòaⁿ chin-chōe, chiâⁿ-chòe chōe-chōe cho̍k.

(BCL) 願全能的上帝賜福你，互你生湠真多，成做多多族，

4

(THR) Koh chiong só͘ èng-ún A-pek-la̍h-hán ê hok-khì hō͘ lí, kap lí ê hō͘-è; hō͘ lí sêng-chiap lí só͘-kià-ku ê tōe, chiū-sī Siōng-tè só͘ hō͘ A-pek-la̍h-hán-ê.

(BCL) 閣將所應允亞伯拉罕的福氣互你及你的後裔，互你承接你所寄居的地，就是上帝所互亞伯拉罕的。」

5

(THR) Í-sat chhe Ngá-kok khì; i chiū khì Pa-tàn-a-lân; kàu A-lân lâng Pí-thó͘-lī ê kiáⁿ La̍h-pan hia; i sī Ngá-kok Í-sò ê bú-kū.

(BCL) 以撒差雅各去，伊就去巴旦亞蘭，到亞蘭人彼土利的子拉班遐。伊是雅各、以掃的母舅。

6

(THR) Í-sò khòaⁿ-kìⁿ Í-sat kā Ngá-kok chiok-hok, koh chhe i khì Pa-tàn-a-lân, beh tùi hia chhōa-bó͘; ia̍h khòaⁿ-kìⁿ chiok-hok i ê sî, hoan-hù i kóng, M̄-thang chhōa Ka-lâm ê cha-bó͘-gín-á chòe bó͘;

(BCL) 以掃看見以撒給雅各祝福，閣差伊去巴旦亞蘭，欲對遐娶某，亦看見祝福伊的時吩咐伊講：「呣通娶迦南的查某囝仔做某」，

7

(THR) koh khòaⁿ-kìⁿ Ngá-kok thiaⁿ pē-bú ê ōe, khì Pa-tàn-a-lân;

(BCL) 閣看見雅各聽父母的話去巴旦亞蘭，

8

(THR) Í-sò chiū chai Ka-lâm ê cha-bó͘-gín-á, i ê lāu-pē Í-sat m̄-tèng-ì;

(BCL) 以掃就知迦南的查某囝仔伊的老父以撒呣中意，

9

(THR) Í-sò chiū khì Í-sı̍t-má-lī hia, tī i hiah ê bó͘ í-gōa, koh chhōa Má-hap-la̍h chòe-bó͘; i sī A-pek-la̍h-hán ê kiáⁿ Í-sı̍t-má-lī ê cha-bó͘-kiáⁿ, Nî-pâi-iok ê sió-bē.

(BCL) 以掃就去以實瑪利遐，佇伊許個某以外閣娶瑪哈拉做某。伊是亞伯拉罕的子以實瑪利的查某子，尼拜約的小妹。

10

(THR) Ngá-kok lī-khui Pia̍t-sī-pa, ǹg Hap-lân khì.

(BCL) 雅各離開別是巴，向哈蘭去；

11

(THR) Kàu chı̍t só͘-chāi, in-ūi jı̍t lo̍h, chiū tī-hia hioh-mî; tùi hiah ê chio̍h-thâu ê tiong-kan, the̍h chı̍t-tè chòe chím-thâu, tī-hia khùn.

(BCL) 到一所在，因為日落，就佇遐歇暝，對許個石頭的中間提一塊做枕頭，佇遐睏，

12

(THR) Bāng-kìⁿ ū thui khiā tī tōe-nı̍h, thui-téng tú-thiⁿ; ū Siōng-tè ê sù-chiá tī thui-nı̍h teh chiūⁿ-lo̍h.

(BCL) 夢見有梯　佇地裡，梯頂抵天，有上帝的使者佇梯裡上落。

13

(THR) Iâ-hô-hoa khiā tī thui-téng, kóng, Góa sī Iâ-hô-hoa lí ê chó͘ A-pek-la̍h-hán ê Siōng-tè, ia̍h sī Í-sat ê Siōng-tè. Góa beh chiong lí hiān-chāi só͘ khùn ê tōe siúⁿ-sù lí, kap lí ê hō͘-è.

(BCL) 耶和華徛佇梯頂，講：「我是耶和華──你的祖亞伯拉罕的上帝，亦是以撒的上帝；我欲將你現在所睏的地賞賜你及你的後裔。

14

(THR) Lí ê hō͘-è beh chhin-chhiūⁿ tōe-chiūⁿ ê thô͘-soa; lí beh tùi tang, sai, lâm, pak lâi hoat-tián; tōe-chiūⁿ bān-cho̍k beh in-ūi lí kap lí ê hō͘-è tit-tio̍h hok-khì.

(BCL) 你的後裔欲親像地上的土沙，你欲對東西南北來發展；地上萬族欲因為你及你的後裔得著福氣。

15

(THR) Góa ia̍h kap lí tī-teh, lí bô-lūn khì tah-lo̍h, Góa beh pó-hō͘ lí; ia̍h beh chhōa lí tò-lâi chit só͘-chāi, lóng bô pàng-sak lí, kàu Góa chiâⁿ tùi lí só͘ kóng-ê.

(BCL) 我亦及你佇。你無論去叨落，我欲保護你，亦欲導你倒來此所在，攏無放拺你，到我成對你所講的。」

16

(THR) Ngá-kok khùn-chhíⁿ kóng, Iâ-hô-hoa chin-chiàⁿ tī-chia, góa kéng-jiân m̄-chai.

(BCL) 雅各睏醒，講：「耶和華真正佇遮，我竟然呣知！」

17

(THR) Chiū kiaⁿ kóng, Chit só͘-chāi kàu chiah thang kiaⁿ! m̄-sī pa̍t-hāng, che sī Siōng-tè ê chhù, che sī thiⁿ ê mn̂g.

(BCL) 就驚講：「此所在到即通驚！呣是別項，這是上帝的厝，這是天的門。」

18

(THR) Ngá-kok chá-chá khí-lâi, chiong i chòe chím-thâu ê chio̍h khiā chòe thiāu; tò iû tī téng-bīn.

(BCL) 雅各早早起來，將伊做枕頭的石　做柱，倒油佇頂面。

19

(THR) Chiū miâ hit só͘-chāi kiò Pek-te̍k-lī, chit ê siâⁿ pún miâ Lō͘-su.

(BCL) 就名彼所在叫伯特利；此個城本名路斯。

20

(THR) Ngá-kok hē-gōan kóng, Siōng-tè nā kap góa tī-teh, tī góa só͘ kiâⁿ ê lō͘ pó-hō͘ góa, koh hō͘ góa ū mı̍h thang chia̍h, ū saⁿ thang chhēng,

(BCL) 雅各下願講：「上帝若及我佇，佇我所行的路保護我，閣互我有物通食，有衫通穿，

21

(THR) hō͘ góa an-jiân tò-lâi góa ê pē ê chhù, chiū Iâ-hô-hoa tek-khak chòe góa ê Siōng-tè.

(BCL) 互我安然倒來我的父的厝，就耶和華的確做我的上帝。

22

(THR) Góa só͘ khiā chòe thiāu ê chio̍h beh chòe Siōng-tè ê chhù; kìⁿ-nā Lí só͘ siúⁿ-sù góa ê, góa beh chiong cha̍p-hūn ê chı̍t-hūn hiàn hō͘ Lí.

(BCL) 我所　做柱的石欲做上帝的厝；見若你所賞賜我的，我欲將十份的一份獻互你。」

Bible Color Mark

• 台語漢字羅馬本
• 巴克禮全羅