創世記 第 48 章

1

(THR) Chiah ê tāi-chì liáu-āu, ū lâng kā Iok-sek kóng, Lín lāu-pē phòa-pīⁿ lah; i chiū chhōa i nn̄g ê kiáⁿ Má-ná-se, Í-hoat-liân, saⁿ-kap khì.

(BCL) 諸個代誌了後，有人給約瑟講：「恁老父破病啦。」伊就導伊二個子瑪拿西、以法蓮相及去。

2

(THR) Ū lâng thong-ti Ngá-kok kóng, Lí khòaⁿ, lí ê kiáⁿ Iok-sek lâi beh chhē lí; Í-sek-lia̍t chiū bián-kióng khí-lâi, chē tī bîn-chhn̂g.

(BCL) 有人通知雅各講：「你看，你的子約瑟來欲尋你。」以色列就勉強起來坐佇眠床。

3

(THR) Ngá-kok kā Iok-sek kóng, Chôan-lêng ê Siōng-tè bat tī Ka-lâm tōe ê Lō͘-su tùi góa chhut-hiān, sù-hok góa;

(BCL) 雅各給約瑟講：「全能的上帝曾佇迦南地的路斯對我出現，賜福我，

4

(THR) kā góa kóng, Góa beh hō͘ lí siⁿ-thòaⁿ chōe-chōe, chiâⁿ-chòe chōe-chōe peh-sìⁿ; ia̍h beh chiong chit ê tōe siúⁿ-sù lí ê hō͘-è, chòe éng-óan ê gia̍p.

(BCL) 給我講：『我欲互你生湠多多，成做多多百姓，亦欲將此個地賞賜你的後裔，做永遠的業。』

5

(THR) Góa bē kàu Ai-kı̍p lí chia ê tāi-seng, lí tī Ai-kı̍p tōe só͘ siⁿ nn̄g ê kiáⁿ, Í-hoat-liân Má-ná-se, sī góa-ê, chhin-chhiūⁿ Liû-piān Se-biān sī góa-ê chı̍t-iūⁿ.

(BCL) 我未到埃及你遮的代先，你佇埃及地所生二個子以法蓮、瑪拿西是我的，親像流便、西緬是我的一樣。

6

(THR) Tī in í-āu, lí só͘ siⁿ ê kiáⁿ, chiū-sī lí ê; in thang kui tī in nn̄g ê hiaⁿ ê miâ-ē, tit-tio̍h gia̍p.

(BCL) 佇以後你所生的子就是你的，通歸佇二個兄的名下得著業。

7

(THR) Lūn-kàu góa, góa tùi Pa-tàn lâi ê sî, La̍h-kiat sí tī góa ê ba̍k-chiu-chêng, tī Ka-lâm tōe, tī lō͘-nı̍h ê tiong-kan, lī-khui Í-hoat-tha iáu ū chı̍t-chām; góa chiū kā i bâi-chòng tī Í-hoat-tha ê lō͘. (Í-hoat-tha chiū-sī Pek-lī-hêng)

(BCL) 論到我，我對巴旦來的時，拉結死佇我的目睭前，佇迦南地佇路裡的中間，離開以法他猶有一站，我就給伊埋葬佇以法他的路（以法他就是伯利恆）。」

8

(THR) Í-sek-lia̍t khòaⁿ-kìⁿ Iok-sek nn̄g ê kiáⁿ, chiū kóng, Che sī chī-chūi?

(BCL) 以色列看見約瑟二個子，就講：「這是是誰？」

9

(THR) Iok-sek kā in lāu-pē kóng, Che sī góa ê kiáⁿ, Siōng-tè tī-chia siúⁿ-sù góa-ê. Kóng, Chhiáⁿ lí chhōa in óa-kūn góa; góa beh kā in chiok-hok.

(BCL) 約瑟給老父講：「這是我的子上帝佇遮賞賜我的。」講：「請你導倚近我，我欲給祝福。」

10

(THR) Í-sek-lia̍t nî-lāu, ba̍k-chiu hoe bōe khòaⁿ-kìⁿ; Iok-sek chhōa in kūn-óa i ê bīn-chêng, i chiū kā in chim-chhùi phō in.

(BCL) 以色列年老，目睭花，看見。約瑟導近倚伊的面前，伊就給唚嘴，抱。

11

(THR) Í-sek-lia̍t kā Iok-sek kóng, Góa bô phah-sǹg ōe kìⁿ-tio̍h lí ê bīn; taⁿ Siōng-tè koh hō͘ góa khòaⁿ-tio̍h lí ê kiáⁿ.

(BCL) 以色列給約瑟講：「我無拍算會見著你的面，今上帝閣互我看著你的子。」

12

(THR) Iok-sek chiong nn̄g ê kiáⁿ tùi i nn̄g ê kha-thâu-u-tiong chhōa-chhut-lâi; pún-sin chiū phak-lo̍h tōe pài.

(BCL) 約瑟將二個子對伊二個腳頭窩中導出來，本身就仆落地拜。

13

(THR) Āu-lâi Iok-sek koh khan in nn̄g-ê, chiàⁿ-chhiú khan Í-hoat-liân ǹg Í-sek-lia̍t ê tò-chhiú, tò-chhiú khan Má-ná-se ǹg Í-sek-lia̍t ê chiàⁿ-chhiú, chhōa in kūn-óa i.

(BCL) 後來，約瑟閣牽二個，正手牽以法蓮向以色列的倒手，倒手牽瑪拿西向以色列的正手，導近倚伊。

14

(THR) Í-sek-lia̍t chhun chiàⁿ-chhiú hōaⁿ Í-hoat-liân ê thâu-khak, i sī tē-jī-ê, koh phah-chhe ēng tò-chhiú hōaⁿ Má-ná-se ê thâu-khak, Má-ná-se pún sī tōa-kiáⁿ.

(BCL) 以色列伸正手，按以法蓮的頭殼，（伊是第二個），閣拍叉用倒手按瑪拿西的頭殼，（瑪拿西本是大子）。

15

(THR) I chiū kā Iok-sek chiok-hok kóng, Gōan góa ê chó͘ A-pek-la̍h-hán, kap góa ê pē Í-sat, só͘ kiâⁿ tī I bīn-chêng ê Siōng-tè, chiū-sī it-seng pó-iúⁿ góa kàu tī kin-á-jı̍t ê Siōng-tè,

(BCL) 伊就給約瑟祝福講：「願我的祖亞伯拉罕及我的父以撒所行佇伊面前的上帝，就是一生保養我到佇今仔日的上帝，

16

(THR) kiù-sio̍k góa thoat-lī it-chhè ê hōan-lān, hit ê Sù-chiá, sù-hok hō͘ chí nn̄g ê gín-á; gōan in kui tī góa ê miâ-ē, kap góa chó͘ A-pek-la̍h-hán, góa ê pē Í-sat, ê miâ-ē; koh gōan in tī sè-kài-tiong siⁿ-thòaⁿ chin-chōe.

(BCL) 救贖我脫離一切的患難彼個使者，賜福互此二個囝仔。願歸佇我的名下及我祖亞伯拉罕、我的父以撒的名下。閣願佇世界中生湠真多。」

17

(THR) Iok-sek khòaⁿ i ê lāu-pē ēng chiàⁿ-chhiú hōaⁿ tī Í-hoat-liân ê thâu-khak, bô hoaⁿ-hí; chiū tháⁿ i ê lāu-pē ê chhiú, beh tùi Í-hoat-liân ê thâu-khak sóa kàu Má-ná-se ê thâu-khak.

(BCL) 約瑟看伊的老父用正手按佇以法蓮的頭殼，無歡喜，就伊的老父的手，欲對以法蓮的頭殼徙到瑪拿西的頭殼。

18

(THR) Iok-sek kā i ê lāu-pē kóng, Góa ê pē ah, m̄-sī án-ni; chit-ê sī tōa-kiáⁿ, kiû lí ēng chiàⁿ-chhiú hōaⁿ i ê thâu-khak.

(BCL) 約瑟給伊的老父講：「我的父啊，呣是按呢。此個是大子，求你用正手按伊的頭殼。」

19

(THR) I ê lāu-pē m̄-thàn kóng, Góa chai, góa ê kiáⁿ, góa chai; i ia̍h beh chiâⁿ-chòe chı̍t-cho̍k, ia̍h beh khoah-tōa; chóng-sī i ê sió-tī chiong-lâi pí i khah-tōa; i ê sió-tī ê hō͘-è beh chiâⁿ-chòe chōe-chōe cho̍k.

(BCL) 伊的老父呣趁講：「我知，我的子，我知。伊亦欲成做一族，亦欲闊大。總是伊的小弟將來比伊卡大；伊的小弟的後裔欲成做多多族」。

20

(THR) Tng hit-jı̍t chiū kā in chiok-hok kóng, Í-sek-lia̍t lâng beh kí lí lâi chiok-hok lâng kóng, Gōan Siōng-tè hō͘ lí chhin-chhiūⁿ Í-hoat-liân, chhin-chhiūⁿ Má-ná-se chı̍t-iūⁿ; tùi án-ni lı̍p Í-hoat-liân tī Má-ná-se ê tāi-seng.

(BCL) 當彼日就給祝福講：「以色列人欲指你來祝福人講：『願上帝互你親像以法蓮、親像瑪拿西一樣。』」對按呢立以法蓮佇瑪拿西的代先。

21

(THR) Í-sek-lia̍t koh kā Iok-sek kóng, Góa beh sí lah; chóng-sī Siōng-tè beh kap lí tī-teh, beh chhōa lín tò-khì lín lia̍t-chó͘ ê tōe.

(BCL) 以色列閣給約瑟講：「我欲死啦，總是上帝欲及你佇，欲導恁倒去恁列祖的地。

22

(THR) Góa chêng ēng góa ê keng, góa ê to, tùi A-mô͘-lī lâng ê chhiú chhiúⁿ-lâi hit tè-tōe, góa taⁿ hō͘ lí, pí lí ê hiaⁿ-tī tit-tio̍h khah-ke.

(BCL) 我前用我的弓、我的刀對亞摩利人的手搶來彼塊地，我今互你，比你的兄弟得著卡加。」

Bible Color Mark

• 台語漢字羅馬本
• 巴克禮全羅