哈巴谷書 第 1 章

1

(THR) Sian-ti Hap-pa-kok só͘ tit-tio̍h ê be̍k-sī.

(BCL) 先知哈巴谷所得著的默示

2

(THR) Iâ-hô-hoa ah, góa âu-kiò, Lí bô thiaⁿ, beh kàu tī-sî ah? góa in-ūi kiông-pō kiò-khó͘, Lí iáu bô chín-kiù.

(BCL) 耶和華啊！我喉叫，你無聽，欲到底時啊？我因為強暴叫苦，你猶無拯救。

3

(THR) Lí siáⁿ-sū hō͘ góa khòaⁿ-kìⁿ chōe-ok? hêng-ge̍k ê sū, Lí siáⁿ-sū tiāⁿ-tiāⁿ khòaⁿ? húi-bia̍t kap kiông-pō tī góa bīn-chêng, saⁿ-chiⁿ saⁿ-phah lóng hoat-khí.

(BCL) 你啥事互我看見罪惡？橫逆的事，你啥事定定看？毀滅及強暴佇我面前，相爭相拍攏發起。

4

(THR) In-ūi án-ni lu̍t-hoat pàng-sang, bô kiâⁿ kong-pêng; pháiⁿ-lâng ûi-khùn gī-lâng; só͘-í sím-phòaⁿ bô chèng-tı̍t.

(BCL) 因為按呢律法放鬆，無行公平；歹人圍困義人，所以審判無正直。

5

(THR) Lín tio̍h tī lia̍t-kok-tiong khòaⁿ lâi siūⁿ i; tōa-tōa gông-ngia̍h; in-ūi tng lín ê jı̍t, Góa beh kiâⁿ chı̍t-hāng sū, sui-jiân kā lín kóng, lín iā m̄-sìn.

(BCL) 恁著佇列國中看來想伊，大大卬愕；因為當恁的日，我欲行一項事，雖然給恁講，恁也呣信。

6

(THR) Khòaⁿ ah, Góa beh heng-khí Ka-le̍k-tí lâng, chiū-sī chân-jím sò-pō ê pang-kok, piàn-kiâⁿ chôan-tōe, pà-chiàm hiah-ê m̄-sī sio̍k i khiā-khí ê só͘-chāi;

(BCL) 看啊，我欲興起迦勒底人，就是殘忍躁暴的邦國，遍行全地，霸佔許個呣是屬伊徛起的所在。

7

(THR) i ê ui-hong thang kiaⁿ, phòaⁿ-tòan kap kôan-sè, lóng chhut tī ka-kī ê ì-sù.

(BCL) 伊的威風通驚，判斷及權勢攏出佇家己的意思。

8

(THR) In ê bé pí pà khah-kín, pí ê-hng-sî ê chhâi-lông khah-béng; bé-peng pâi-lia̍t khui-khoah, bé-peng tùi hn̄g-hn̄g lâi; in chhin-chhiūⁿ eng kín-kín pe beh lâi chia̍h.

(BCL) 的馬比豹卡緊，比下昏時的豺狼卡猛。馬兵排列開闊，馬兵對遠遠來；親像鷹緊緊飛欲來食，

9

(THR) In lâi beh kiâⁿ kiông-pō; in ê bīn hiông-hiông chìn-chêng; chū-chı̍p só͘ lia̍h ê lâng, chhin-chhiūⁿ soa hiah-chōe.

(BCL) 來欲行強暴，的面雄雄進前，聚集所掠的人，親像沙許多。

10

(THR) I biáu-sī kun-ông, ki-chhì kùi-cho̍k; léng-chhiò lóng-chóng ê ōe-só͘; khí thô͘-tui lâi kong-chhú--i.

(BCL) 伊藐視君王，譏刺貴族，冷笑攏總的衛所，起土堆來攻取伊。

11

(THR) Tùi án-ni i chhin-chhiūⁿ hong sàu kè-khì, i keng-kè chiū hōan-chōe; lia̍h ka-kī ê khùi-la̍t chòe siōng-tè.

(BCL) 對按呢伊親像風掃過去，伊經過就犯罪，掠家己的氣力做上帝。

12

(THR) Iâ-hô-hoa góa ê Siōng-tè góa ê Sèng--ê ah, Lí kiám m̄-sī tùi éng-óan chiū ū mah? góan bōe tì-kàu sí, Iâ-hô-hoa ah, Lí ūi-tio̍h sím-phòaⁿ lâi siat-lı̍p i, Chio̍h-pôaⁿ ah, Lí ūi-tio̍h khiàn-chek lâi pī-pān i.

(BCL) 耶和華──我的上帝，我的聖者啊，你豈呣是對永遠就有嗎？阮致到死。耶和華啊，你為著審判來設立伊；石磐啊，你為著譴責來備辦伊。

13

(THR) Lí ê ba̍k-chiu chheng-khì bô beh khòaⁿ siâ-ok, bô beh khòaⁿ hêng-ge̍k, kiâⁿ khúi-chà--ê, Lí siáⁿ-sū tiāⁿ-tiāⁿ khòaⁿ in ah? pháiⁿ-lâng thun-bia̍t pí i khah kong-gī--ê, Lí siáⁿ-sū chēng-chēng ah?

(BCL) 你的目睭清氣，無欲看邪惡，無欲看橫逆；行詭詐者，你啥事定定看啊？歹人吞滅比伊卡公義者，你啥事靜靜啊？

14

(THR) Lí siáⁿ-sū hō͘ lâng chhin-chhiūⁿ hái--nih ê hî, koh chhin-chhiūⁿ teh sô ê thâng, bô thâu-ba̍k kóan-lí ah?

(BCL) 你啥事互人親像海裡的魚，閣親像趖的蟲，無頭目管理啊？

15

(THR) I ēng kau it-chīn tiò--in, i ēng bāng-á lia̍h in, ēng tōa-bāng pha in; ūi-tio̍h án-ni, i hoaⁿ-hí khòai-lo̍k.

(BCL) 伊用一盡釣，伊用網仔掠，用大網拋；為著按呢，伊歡喜快樂，

16

(THR) Chiū hiàn-chè hō͘ i ê bāng-á, sio-hiuⁿ hō͘ i ê tōa-bāng; in-ūi in tùi chiah-ê tit-tio̍h pûi-súi ê hūn-gia̍h, kap chhiong-chiok ê chia̍h-mı̍h.

(BCL) 就獻祭互伊的網仔，燒香互伊的大網，因為對諸個得著肥娞的份額及充足的食物。

17

(THR) I kiám thang piàⁿ-khang i ê bāng, siông-siông thâi-sí lia̍t-kok ê lâng, iā bô pó-sioh mah?

(BCL) 伊豈通傾空伊的網，常常死列國的人，也無保惜嗎？

Bible Color Mark

• 台語漢字羅馬本
• 巴克禮全羅