希伯來書 第 1 章

1

(THR) Siōng-tè tī chāi-chá í-keng thok hiah ê sian-ti, ēng chōe-chōe tōaⁿ, chōe-chōe hong-hoat, kā lia̍t-chó͘ kóng;

(BCL) 上帝佇在早已經託許個先知用多多段、多多方法給列祖講，

2

(THR) taⁿ tī hiah ê jı̍t ê lō͘-bé, thok I ê Kiáⁿ kā lán kóng; chiū-sī I só͘ siat-lı̍p chòe sêng-chiap bān mı̍h ê hō͘-sû, ia̍h bat tùi I lâi chhòng-chō chiah ê sè-kài.

(BCL) 今佇許個日的路尾託伊的子給咱講；就是伊所設立做承接萬物的後嗣，亦曾對伊來創造諸個世界。

3

(THR) I sī Siōng-tè ê êng-iāu só͘ hoat-chhut ê kng, sī Siōng-tè pún-chit ê chin siōng, I ēng I kôan-lêng ê ōe teh hû-chài bān mı̍h, í-keng chiâⁿ chheng-kiat chōe ê sū, chiū chē tī ke̍k kôaiⁿ ê thiⁿ-téng, tōa ui-giâm ê ê tōa pêng;

(BCL) 伊是上帝的榮耀所發出的光，是上帝本質的真像，伊用伊權能的話扶載萬物。已經成清潔罪的事，就坐佇極高的天頂大威嚴者的大旁。

4

(THR) chiâⁿ-chòe pí chiah ê thiⁿ-sài khah tōa, ha̍p tī I só͘ sêng-chiap ê miâ, pí in khah chun-kùi.

(BCL) 成做比諸個天使卡大，合佇伊所承接的名，比卡尊貴。

5

(THR) In-ūi Siōng-tè kiám bat tùi sím-mı̍h thiⁿ-sài kóng: Lí chiū-sī góa ê Kiáⁿ, Góa kin-á-jı̍t siⁿ lí?koh kóng, Góa beh chòe I ê Pē, I beh chòe góa ê Kiáⁿ.

(BCL) 因為上帝豈曾對甚麼天使講：你就是我的子，我今仔日生你？閣講：我欲做伊的父，伊欲做我的子？

6

(THR) Kàu I koh chhōa tōa Kiáⁿ jı̍p sè-kan ê sî, chiū kóng, Siōng-tè chiah ê thiⁿ-sài lóng tio̍h pài I.

(BCL) 到伊閣導大子入世間的時，就講：上帝諸個天使攏著拜伊。

7

(THR) Lūn-kàu thiⁿ-sài chiū kóng: Hō͘ I ê thiⁿ-sài chòe hong, I ê chhe-ēng chòe hé-iām:

(BCL) 論到天使，就講：互伊的天使做風，伊的差用做火焰；

8

(THR) nā-sī lūn-kàu Kiáⁿ chiū kóng, Siōng-tè ah, lí ê chō-ūi tāi-tāi tī-teh, Lí ê kok kôan-pèng sī chèng-tı̍t ê kôan-pèng.

(BCL) 若是論到子就講：上帝啊，你的座位代代佇；你的國權柄是正直的權柄。

9

(THR) Lí ài kong-gī, òan-hūn put-hoat; Só͘-í Siōng-tè, lí ê Siōng-tè, ēng hoaⁿ-hí ê iû boah lí, Iâⁿ-kè lí chiah ê tâng-phōaⁿ.

(BCL) 你愛公義，怨恨不法；所以上帝，你的上帝，用歡喜的油抹你，贏過你諸個同伴；

10

(THR) Koh kóng, Chú ah, khí-thâu ê sî, lí hē tōe ê tōe-ki, Chiah ê thiⁿ ia̍h sī lí ê chhiú só͘ chō ê:

(BCL) 閣講：主啊，起頭的時你下地地基；諸個天亦是你的手所造的。

11

(THR) In beh bia̍t-bô; to̍k-to̍k lí kú-tn̂g tī-teh: In lóng beh chhin-chhiūⁿ i-ho̍k chiām-chiām kū;

(BCL) 欲滅無，獨獨你久長佇。攏欲親像衣服漸漸舊；

12

(THR) Lí beh chiong in kńg-khí-lâi, chhin-chhiūⁿ gōa-saⁿ, Chhin-chhiūⁿ i-ho̍k, in chiū beh piàn-ōaⁿ: To̍k-to̍k lí gôan-chāi sī án-ni, lí ê hè-siū bô kiông-chīn.

(BCL) 你欲將捲起來，親像外衫，親像衣服，就欲變換。獨獨你原在是按呢；你的歲壽無窮盡。

13

(THR) Siōng-tè bat tùi tá-lo̍h chı̍t ê thiⁿ-sài kóng, Chē góa ê tōa pêng, Thèng-hāu góa hē lí ê tùi-te̍k chòe lí ê kha-ta̍h-í?

(BCL) 上帝曾對叨落一個天使講：坐我的大旁，聽候我下你的對敵做你的腳踏椅？

14

(THR) In kiám m̄ sī lóng chòe chhe-ēng ê sîn, hōng-chhe lâi ho̍k-sāi teh-beh tit kiù ê lâng mah?

(BCL) 豈呣是攏做差用的神、奉差來服事欲得救的人嗎？

Bible Color Mark

• 台語漢字羅馬本
• 巴克禮全羅