以賽亞書 第 14 章

1

(THR) Iâ-hô-hoa beh lîn-bín Ngá-kok, beh koh kéng Í-sek-lia̍t, chiong in an-tì tī pún só͘-chāi, kià-kha-ê beh kui-óa in, kap Ngá-kok ke liân-ha̍p.

(BCL) 耶和華欲憐憫雅各，欲閣揀以色列，將安置佇本所在。寄腳的欲歸倚，及雅各家聯合。

2

(THR) Lia̍t-pang beh chiong in tòa-tò--lâi pún só͘-chāi; Í-sek-lia̍t ke beh tī Iâ-hô-hoa ê tōe tit-tio̍h in chòe lô͘-po̍k lú-pī, ia̍h beh chhiúⁿ-lia̍h chêng chhiúⁿ-lia̍h in--ê, kóan-hat chêng ap-chè in--ê.

(BCL) 列邦欲將帶倒來本所在；以色列家欲佇耶和華的地得著做奴僕女婢，亦欲搶掠前搶掠者，管轄前壓制者。

3

(THR) Tng Iâ-hô-hoa hō͘ lí thoat-lī kan-khó͘ hôan-ló, kap lâng bián-kióng lí chòe ê khó͘-kang, tit-tio̍h pêng-an ê jı̍t,

(BCL) 當耶和華互你脫離艱苦、煩惱，及人勉強你做的苦工，得著平安的日，

4

(THR) lí beh chòe chit ê koa lūn Pa-pí-lûn ông, kóng, Chè-ap lâng-ê, cháiⁿ-iūⁿ kéng-jiân bô--khì! le̍k-sek lâng ê, cháiⁿ-iūⁿ kéng-jiân bô-khì!

(BCL) 你欲做此個歌論巴比倫王講：制壓人的怎樣竟然無去？勒索人的怎樣竟然無去？

5

(THR) Iâ-hô-hoa ū at-chı̍h pháiⁿ-lâng ê kóaiⁿ, kap kóan-hat lâng--ê ê kôan-pèng,

(BCL) 耶和華有遏折歹人的柺，及管轄人者的權柄，

6

(THR) chiū-sī tī siū-khì-tiong liân-liân phah chiah ê peh-sìⁿ ê, tī siū-khì-tiong kóan-hat lia̍t-kok, kiâⁿ khún-pek bô lâng chó͘-chí ê.

(BCL) 就是佇受氣中連連拍諸個百姓的，佇受氣中管轄列國，行窘迫無人阻止的。

7

(THR) Taⁿ chôan-tōe tit-tio̍h an-hioh pêng-chēng; lâng lóng chhut hoaⁿ-hí ê siaⁿ.

(BCL) 今全地得著安息、平靜；人攏出歡喜的聲。

8

(THR) Siông-chhiū kap Lī-pa-lùn ê pek-hiuⁿ-chhiū, lóng in-ūi lí hoaⁿ-hí, kóng, Tùi lí tó--lo̍h-khì, bô lâng koh chiūⁿ-lâi chhò góan.

(BCL) 松樹及黎巴嫩的柏香樹攏因為你歡喜，講：對你倒落去，無人閣上來剉阮。

9

(THR) Lí lo̍h--khì ê sî, im-kan chiū ūi lí tín-tāng, lâi ngiâ-chih lí; koh in-ūi lí keng-tāng hiah ê bat tī sè-kan chòe léng-siù ê im-hûn; ia̍h hō͘ hiah ê bat chòe lia̍t-kok ê kun-ông ê lóng tùi i ê chō-ūi khiā--khí-lâi.

(BCL) 你落去的時，陰間就為你振動來迎接你，閣因為你驚動許個曾佇世間做領袖的陰魂，亦互許個曾做列國的君王的，攏對伊的座位徛起來。

10

(THR) In lóng beh ìn lí kóng, Lí ia̍h pìⁿ-chòe lóan-jio̍k chhin-chhiūⁿ góan mah? lí ia̍h kap góan saⁿ-chhin-chhiūⁿ mah?

(BCL) 攏欲應你講：你亦變做軟弱親像阮嗎？你亦及阮相親像嗎？

11

(THR) Lí ê ui-hong kap lí ê khîm-sek ê siaⁿ, lóng lo̍h kàu im-kan; pho͘ tī lí ê ē-bīn--ê sī thâng, khàm tī lí ê téng-bīn--ê sī chhu.

(BCL) 你的威風及你的琴瑟的聲攏落到陰間。舖佇你的下面的是蟲，蓋佇你的頂面的是蛆。

12

(THR) Thiⁿ-kng-chá ê khé-bêng-chhiⁿ ah, lí cháiⁿ-iūⁿ tùi thiⁿ tūi-lo̍h! lí chit-ê kong-phòa lia̍t-kok--ê, cháiⁿ-iūⁿ siū khám-tó tī tōe-chiūⁿ.

(BCL) 天光早的啟明星啊，你怎樣對天墜落？你此個攻破列國的怎樣受砍倒佇地上？

13

(THR) Lí ê sim-lāi bat kóng, Góa beh chiūⁿ-kàu thiⁿ-téng, góa beh kú-khí góa ê chō-ūi tī Siōng-tè chèng-chhiⁿ ê téng-bīn; góa beh chē tī chū-hōe ê soaⁿ, tī pak-hng ê ke̍k-thâu.

(BCL) 你的心內曾講：我欲上到天頂；我欲舉起我的座位佇上帝眾星的頂面；我欲坐佇聚會的山，佇北方的極頭。

14

(THR) Góa beh chiūⁿ-kàu pí hûn khah-kôaiⁿ ê téng-bīn; góa beh kap Chì-kôaiⁿ-ê pîⁿ-téng.

(BCL) 我欲上到比雲卡高的頂面；我欲及至高者平等。

15

(THR) Chóng-sī lí beh tūi-lo̍h im-kan, kàu chhim khiⁿ ê ke̍k-thâu.

(BCL) 總是，你欲墜落陰間，到深坑的極頭。

16

(THR) Hōan-nā khòaⁿ-kìⁿ lí-ê lóng beh chù-ba̍k khòaⁿ lí, liû-sim siūⁿ lí, kóng,

(BCL) 凡若看見你的攏欲注目看你，留心想你，講：

17

(THR) Hō͘ tōa-tōe iô-choah, hō͘ lia̍t-kok tín-tāng, hō͘ sè-kài pha-hng, hō͘ siâⁿ-chhiûⁿ chhia-tó, bô tháu-pàng siū-lia̍h ê lâng tò--khì in tau, sī chit ê lâng mah?

(BCL) 互大地搖泏，互列國振動，互世界拋荒，互城牆捙倒，無解放受掠的人倒去兜，是此個人嗎？

18

(THR) Lia̍t-kok ê kun-ông lóng ta̍k-ê ū êng-kng, khùn tī i ê bōng.

(BCL) 列國的君王攏逐個有榮光睏佇伊的墓。

19

(THR) To̍k-to̍k lí siū hiat-ka̍k, bōe tit-tio̍h jı̍p lí ê bōng, chhin-chhiūⁿ thang iàm-chiān ê ki, ēng siū-thâi ê lâng chòe saⁿ, chiū-sī siū to chha̍k-sí, tūi-lo̍h khiⁿ-tiong chio̍h-thâu hit-ūi--ê; lí koh chhin-chhiūⁿ siū thún-ta̍h ê sin-si.

(BCL) 獨獨你受擲，得著入你的墓，親像通厭賤的枝，用受的人做衫，就是受刀鑿死，墜落坑中石頭彼位者；你閣親像受　踏的身屍。

20

(THR) Lí bōe tit-tio̍h kap in tâng bâi-chòng, in-ūi lí pāi-hōai lí ê kok, thâi-sí lí ê peh-sìⁿ; pháiⁿ-lâng ê hō͘-è tek-khak éng-óan bô-miâ.

(BCL) 你得著及同埋葬；因為你敗壞你的國，死你的百姓。歹人的後裔的確永遠無名。

21

(THR) In-ūi chó͘-kong ê chōe, tio̍h pī-pān thâi-sí in ê kiáⁿ-sun, bián-tit in heng-khí lâi chiàm-tōe, khí siâⁿ piàn sè-kan.

(BCL) 因為祖公的罪，著備辦死的子孫，免得興起，來佔地，起城遍世間。

22

(THR) Bān-kun ê Iâ-hô-hoa kóng, Góa beh khí-lâi kong-kek in, beh tùi Pa-pí-lûn tû-bia̍t i ê miâ, kap só͘-chhun-ê, í-kı̍p i ê kiáⁿ i ê sun; che sī Iâ-hô-hoa kóng ê.

(BCL) 萬軍的耶和華講：我欲起來攻擊，欲對巴比倫除滅伊的名及所剩的，以及伊的子伊的孫。這是耶和華講的。

23

(THR) Góa beh hō͘ i ê tōe chòe hô-ti só͘ tiàm ê ūi, koh pìⁿ-chòe chúi-tî; Góa beh ēng bia̍t-bô ê sàu-chiú(**chhiú) sàu-tû i; che sī bān-kun ê Iâ-hô-hoa kóng ê.

(BCL) 我欲互伊的地做河豬所踮的位，閣變做水池；我欲用滅無的掃帚掃除伊。這是萬軍的耶和華講的。

24

(THR) Bān-kun ê Iâ-hô-hoa ū chiù-chōa kóng, Góa só͘ siūⁿ-ê koat-tòan beh chiâⁿ; Góa só͘ tiāⁿ-tio̍h-ê koat-tòan kiàn-lı̍p.

(BCL) 萬軍的耶和華有咒誓講：我所想的，決斷欲成；我所定著的，決斷建立，

25

(THR) Góa beh phah-pāi A-su̍t lâng tī Góa ê tōe, thún-ta̍h i tī Góa ê soaⁿ; i ê taⁿ beh lī-khui Góa ê peh-sìⁿ; i ê tāng-tàⁿ beh lī-khui Góa ê peh-sìⁿ ê keng-thâu.

(BCL) 我欲拍敗亞述人佇我的地，　踏伊佇我的山。伊的軛欲離開我的百姓；伊的重擔欲離開我的百姓的肩頭。

26

(THR) Che sī í-keng tiāⁿ-tio̍h beh kiâⁿ tī chôan-tōe ê chí-ì; che sī chhun tī bān-kok téng-bīn ê chhiú.

(BCL) 這是已經定著欲行佇全地的旨意；這是伸佇萬國頂面的手，

27

(THR) Bān-kun ê Iâ-hô-hoa í-keng tiāⁿ-tio̍h chí-ì, chī-chūi ōe hòe-bô i? I ê chhiú í-keng chhun-chhut, chī-chūi ōe hō͘ i kiu tò-tńg?

(BCL) 萬軍的耶和華已經定著旨意，是誰會廢無伊？伊的手已經伸出，是誰會互伊勼倒轉？

28

(THR) A-hap-su ông sí hit-nî, ū chit ê be̍k-sī.

(BCL) 亞哈斯王死彼年，有此個默示：

29

(THR) Hui-lī-sū ê chôan-tōe ah, bo̍h-tit in-ūi phah lí ê kóaiⁿ í-keng chı̍h lâi hoaⁿ-hí; in-ūi tùi chôa ê nn̄g beh siⁿ-chhut to̍k-chôa, i só͘-siⁿ-ê sī pe ê hé-chôa.

(BCL) 非利士的全地啊，莫得因為拍你的枴已經折來歡喜。因為對蛇的卵欲生出毒蛇；伊所生的是飛的火蛇。

30

(THR) Sòng-hiong lâng ê tōa-kiáⁿ beh tit-tio̍h chia̍h, khiàm-kheh ê lâng beh an-jiân tó-teh; Góa beh ēng ki-hng gō-sí lí ê chéng-lūi, i beh thâi-sí lí só͘-chhun-ê.

(BCL) 喪鄉人的大子欲得著食；欠缺的人欲安然倒。我欲用飢荒餓死你的種類；伊欲死你所剩的。

31

(THR) Mn̂g--ah, tio̍h thî-khàu; siâⁿ--ah, tio̍h âu-kiò; Hui-lī-sū chôan-tōe ah, lí siau-bô lah; in-ūi ū ian tùi pak--sì lâi, i ê peng-teng bô chı̍t-ê làu-tīn.

(BCL) 門啊，著啼哭！城啊，著喉叫！非利士全地啊，你消無啦！因為有煙對北勢來，伊的兵丁無一個漏陣。

32

(THR) Beh cháiⁿ-iūⁿ ìn lia̍t-kok ê sù-chiá ah? Tio̍h kóng, Iâ-hô-hoa kiàn-lı̍p Sek-an, I ê peh-sìⁿ-tiong khùn-khó͘ ê lâng beh tâu-hioh tī hit lāi-bīn.

(BCL) 欲怎樣應列國的使者啊？著講：耶和華建立錫安；伊的百姓中困苦的人欲投歇佇彼內面。

Bible Color Mark

• 台語漢字羅馬本
• 巴克禮全羅